Gênesis 45

Yosɛf Ebu Yɛishu Akasɛ

1 Kɛlɛ Yosɛf agalà yɛishu anyanà evunũ nɛ bagɛ eepo yɛ nyɔɔ namɛ, kɛlɛ ebieyoyò, "Kɔ anɔnyianɔ ashɛ̃ nɛ mɛɔbha!" Kliso ananà agɛzã Yosɛf ɔbhà gɛebu yɛishu akasɛ yɛadzalɛ. 2 Kɛlɛ ebieyò nyagãa akɔ asɛ Egipteanɛ belũ yɛɔdɔ̃, kɛlɛ Faɖawo bɔpã belũiɛlɛ ɔdɔ̃.

3 Yosɛf etseɖe yɛadzalɛ asɛ, "Mɛinu Yosɛf! Mɛ akaa kalɛ nɛ ɛkpã dza?" Pɔ yɛadzalɛ bagɛ là ebuiliulũ akɔɛ, ɔmɔsɛ kifu dɛ balɛ nɛ yɛamɛ.

4 Kɛlɛ Yosɛf etseɖe yɛadzalɛ asɛ "Notsoba mɛɔba." Gɛ babhɛtɛ ana bekeɛ, aɖɔ asɛ "Mɛinu wɔnɔ adza Yosɛf, agɛ nɔdɛ ɔkpɛ Egipteɛ! 5 Kɛlɛ otsiɛ nɔ, nɔtɛ kɔ ɔwɔnyɔ̃nɔ aba wɔnɔ abha kɛlɛ ɔmɔpɔɛ otiyì wɔnɔ ishu sɛ nɔdɛ mɛ akpɛ ɛkɛlɛ̀, ɔmɔsɛ tɛ mɛibu ɛkpã kliso pɛ Owusoso Akaa asɛsɛ mɛ akpɛ otugba. 6 Agɔ taabha nyɔɔ naalɛ gɛ bɔbhɛ̃ dɔ nɛ kesiakpa nabha, kɛlɛ agɔ teetiɛ gɛ alɛ otugbaa bɔdɔ̃wɔawɔa nɛ bɔdɔpɔ̃pɔ̃ tɛ bazã. 7 Pɔ Owusoso Akaa asɛsɛ mɛ akpɛ wɔnɔ otugba asɛ tɛ ɛbalɛ akɔ wɔnɔ asɛ banɔ gɛ bagɔ̃ nɛ kesiakpa nabha kɛlɛ tɛ mɛibu wɔnɔ ɛ́kpã nɛ tibubu gbagbla mɛ.

8 "Klisoɔ, gɛinu wɔnɔ sɛsɛ mɛ nɛ ɛkɛlɛ, pɔ Owusoso Akaa. Yɛ abhɛtɛ mɛ akaa akɔ Faɖawo, apalete akɔ yɔɔpã petee nɛ̀ ekusi akɔ Egipte nyɔ̃ɔ. 9 Otsinɔ wɔnɔ nobu tsɛtsɛɖɛ mɛ tɛ notsyina vɛ mɛ akaa ɔbha tɛ notseɖe yɛ asɛ, 'Kibui ɛlɛ woeyianyɛ Yosɛf aaɖɔ: Owusoso Akaa abhɛtɛ mɛ apalete nɛ Egipte petee abha. Zhyi ɔba mɛɔbha; tɛwɔ kide. 10 Nɔ bɔzã Goshɛn yɛ kɛkɔtɔmɛ tɛ notso ɔplɛnɔ mɛ-wɔnɔ, wɔnɔ beyialɛ nɛ̀ wɔnɔ beshuialɛ, wɔnɔ baagã azaa nɛ̀ banɛntsyɔɛ nɛ̀ wɔnɔ ahɔɛ mɛ bɔdɔ̃ petee. 11 Ɛba ɖi wɔnɔ abha nɛ ɛkɛlɛ́, ɔmɔsɛ bɔbhɛ̃ agɔ teeti alɛ otugba abá. Onu gɛnɛ anaa, wɔnɔ nɛ̀ wɔnɔ bɔpã nɛ̀ banɔ kanyiaka gɛenu wɔnɔ ayɛ abadɔ kitsyuì.'

12 "Nɔbɔ mɔkɔ wɔnɔ ishu, kana mɛadza Bndzamin tsyɛ, asɛ mɛ ɛɖɔaɖɔ akɔ wɔnɔ kɛgbã. 13 Notseɖe mɛaka nɛ kanà gɛ bakpɛ mɛ nɛititì nɛ Egipte nɛ̀ kɛkanyiaka gɛ nɔ̀mɔ. Kɛlɛ nɔgbanà yɛ ozhyinɔ ɛkɛlɛ odunũ."

14 Kɛlɛ atahɔɛ akpɛ yɛadza Bɛndzamin shu kɛlɛ ebieyò, kɛlɛ Bendzamin anyanã yɛakpɛ kitẽ mɛ, kɛlɛ ebi yoyo. 15 Kɛlɛ akpɛ ahɔɛ nɛ yɛadzalɛ petee iliɛ pɛ ebieyò atɔɖɔ balɛ abha. Kidegbaa, yeadzalɛ aɖɔaɖɔ nɛ yɛ.

16 Gɛ kibuiɛ diyi nɛ Faɖawo yɛ bukusi bɔpã mɛ asɛ Yosɛf yeadzalɛ abaa, kiku Faɖawo nɛ yɛɔzãkɔanɛ awɔ̃. 17 Faɖawo etseɖe Yosɛf asɛ, "Tseɖe wɔadzalɛ asɛ, 'Bhɛtɛ kɛɛlɛ: Nɔkpɛ etukù akɔ wɔnɔ baagã tɛ notsyina ɔvɛ Kana kesiakpa nabha, 18 tɛ nɔlɔkɔ wɔnɔ akaa nɛ̀ wɔnɔ baapã tsyina mana mɛ. Ɛbakɔ wɔnɔ Egipte kesiakpa kalɛ ɔgbangbã kɔ kɛlɛ nɔbɔ ŋã kesiakpa kalɛ bɔbɔ ɔkɔ.'

19 "Ɛkpɛ ɔsha tsyɛ sɛ tɛ otseɖe balɛ asɛ, 'Bhɛtɛ kɛɛlɛ: Nɔlɔkɔ ihuɔ gɛ baagã eeteɛ odenɔ Egipte akɔ wɔnɔ beyialɛ nɛ wɔnɔ edzinialɛ, tɛ nɔgbanà wɔnɔ akaa tɛ nɔba. 20 Notì lu awɔ̃ nɛ wɔnɔ bahɔɛmɛ bɔdɔ̃ɔ nabha, ɔmɔsɛ bɔdɔ̃ gbangbã dɛ nɛ Egipte peteeɛ ebedzi wɔnɔ ayɛ.' "

21 Kliso Israɛl yɛeyianyɛ abhɛtɛ ana. Yosɛf akɔ balɛ ihuɔ gɛ baagã beeteɛ, asɛ kana gɛ Faɖawo akɔ yɛɔsha, kɛlɛ akɔ balɛ bɔdɔ̃ ŋãŋã tsyɛ akɔ balɛ kidzo gagã. 22 Akɔ balɛ ɔmayɛmɛ akanyiaka akpɛkpɛ vɔvɔ, pɔ Bɛndzamin xɔnɔ alɔkɔ ehoeyi akpã taata nɛ̀ akpɛkpɛ vɔvɔ edi teeti akɔ yɛ. 23 Kɛlɛ bɔdɔ̃ ɔlɛ yɛasɛsɛ yɛaka: akpɛ etuku akɔ badiku lɔfɔ nɛ̀ Egipte bɔdɔ̃ gbangbã, kɛlɛ bakpɛ etuku akɔ badikudzɛ lɔfɔ nɛ̀ bɔdɔ̃ɛeyi nɛ̀ abolo nɛ bɔdɔ̃ŋãŋã bhlatɔ akɔɖɔ akɔ yɛidzoɔ tɛgagã. 24 Kɛlɛ akpɛ yɛadzalɛ kidzo, kɛlɛ gɛ baa shɛ̃ɛ, etseɖe balɛ asɛ, "Nɔtɛ pɛ ebela nɛ kidzoɔ mɛ!"

25 Kliso bewù avɛ Egipte kɛlɛ bediku balɛ akaa ɔkɔ nɛ Kana kesiakpa nabha. 26 Betseɖe yɛasɛ, "Yosɛf akalɛ nɛkpã! Kibui gbã, yɛaŋã bukusi nɛ Egipte petee abha." Kibuiɛ yalɛ Yakɔb nyagãa; agɛ yɛkɛ balɛ abha ŋã. 27 Pɔ gɛ betseɖe ebuiɛ nyɔɔ gɛ Yosɛf etseɖe balɛ, kɛlɛ gɛ amɔ ihuɔ gɛ baagã beeteɛ gɛ Yosɛf asɛsɛ sɛ tɛ betuku yɛamanà, balɛ aka yɛ ɔfɔfuia nɔ otsodzi mɔ ɛkpã. 28 Kɛlɛ Israɛl aɖɔ asɛ, "Ɛmɔsɛ kɛgbã! Mɛeyianyɛ Yosɛf aka lɛ nɛkpã. Ɛbavɛ dɛ mɔɛ flogo tɛ itsí."