1 Manase yabaye umwami afise imyaka cumi n’ibiri, aganza imyaka mirongo itanu n’itanu ari i Yerusalemu. Nyina wiwe yitwa Hefiziba. 2 Manase akora ivyo Uhoraho abona ko ari bibi mu nyonga ziwe, agendera mu bizira vy’ubuyobe vyakorwa n’amahanga Uhoraho yari yarirukanye imbere y’Abisirayeli. 3 Asubira kwubaka ibibanza vyo gusengeramwo vyo ku misozi, ivyo se Hezekiya yari yarasanganguye; yongera kwubaka ibicaniro vya Bayali n’inkingi ya Ashera, nk’uko Ahabu umwami wa Isirayeli yari yarakoze. Yunamira ibinyenyeri vyose vyo kw’ijuru, arabisenga. 4 Yubaka ibicaniro mu Ngoro y’Uhoraho, iyo Uhoraho yari yaravuzeko ati: "I Yerusalemu nzohashira izina ryanje." 5 Mu rugo rwose rw’Ingoro y’Uhoraho ahubaka ibicaniro vy’ibinyenyeri vyose vyo kw’ijuru. 6 Agera n’aho atanga umuhungu wiwe kw’ikimazi co guturirwa, agendera mu bupfumu n’amareba, ahanuza abahamagara imizimu hamwe na ba kamenyi. Akora ibibi vyinshi mu nyonga z’Uhoraho, bituma amuratsa.

7 Afata inkingi ya Ashera yabazishije, ayishira mu Ngoro, imwe Uhoraho yari yabwiye Dawidi n’umuhungu wiwe Salomo ati: "Muri iyi Ngoro, n’i Yerusalemu, ni ho natoranije mu yindi miryango yose ya Isirayeli, ngo hitirirwe izina ryanje ibihe vyose. 8 Sinzosubira gutuma Abisirayeli bayerera ngo bave mu gihugu nahaye ba sekuruza babo nibagendera mu vyo nabategetse vyose, bagakurikiza Ivyagezwe vyose umusavyi wanje Mose yabahaye." 9 Ariko abantu ntibayumviye. Manase yarabazimije, atuma bava mu nzira z’Uhoraho, bakora ibibi birengeye ivy’amahanga Uhoraho yari yarahonereje imbere y’Abisirayeli.

10 Maze Uhoraho avugisha abasavyi biwe b’abavugishwa, 11 ati: "Manase, umwami w’i Buyuda, yakoze ivyaha birenze urugero. Yakoze ibibi bisumba ivy’Abamori baba mu gihugu imbere y’Abisirayeli, akwegera Abayuda mu vyaha vyo gusenga ibigirwamana. 12 None rero Uhoraho Imana ya Isirayeli, avuze ati: Nzotera amakuba Yerusalemu n’i Buyuda hose, gushika aho abazovyumva bose bazojorerwa. 13 I Yerusalemu nzohacira urubanza nk’urwo naciriye Samariya, ndahagerere no ku ngero nagereyeko umuryango wa Ahabu. Nzohanagura ababa i Yerusalemu nk’uwuhanagura isahani hanyuma akayubika. 14 Nzokwanka amasigarira y’ubwoko bwanje, ndabarekurire mu maboko y’abansi babo. Bazotwarwa ari inyagano ku bansi babo, 15 kuko bakoze ibizira mu nyonga zanje, bantera kubarakarira uhereye igihe nabakura muri Egiputa gushika n’uwu musi."

16 Ikigeretseko, Manase yasheshe amaraso y’abantu benshi ata co bazira, yuzura igisagara ca Yerusalemu uhereye iyo kiva kikagera. Ivyo vyiyongera ku vyaha yakwegeyemwo Abayuda, bakora ivyo Uhoraho abona ko ari bibi mu nyonga ziwe.

17 Ibindi vyabaye ku ngoma ya Manase n’ivyo yakoze vyose, harimwo n’ivyaha vyiwe, mbega ntivyanditswe mu gitabu c’ivyabaye ku ngoma z’abami b’i Buyuda? 18 Haheze igihe, Manase ahamvya ba sekuruza, ahambwa mw’itongo ryo ku kirimba iwe, mw’itongo ryitwa irya Uza. Umuhungu wiwe yitwa Amoni aca aba ari we amusubirira ku ngoma.

19 Amoni yari afise imyaka mirongo ibiri n’ibiri igihe yimikwa ngo abe umwami, aca aganza imyaka ibiri ari i Yerusalemu. Nyina wiwe yitwa Meshulemeti umukobwa wa Haruzi w’i Yotiba. 20 Akora ivyo Uhoraho abona ko ari bibi mu nyonga ziwe, nk’uko se Manase yakoze. 21 Yagendeye mu ngeso zose za se; yasenze ibigirwamana se yasenga, akama yikubita imbere yavyo. 22 Ava k’Uhoraho Imana ya ba sekuruza, ntiyigera agendera mu nzira z’Uhoraho na gatoya.

23 Maze abaganwa ba Amoni baja inama yo kumwica, bamutsinda mu ngoro iwe. 24 Ariko abantu bo muri ico gihugu baca bafata abishe umwami Amoni barabica, bimika Yosiya umuhungu wiwe, aba ari we amusubirira ku ngoma.

25 Ibindi vyabaye ku ngoma ya Amoni hamwe n’ivyo yakoze, vyanditswe mu gitabu c’ivyabaye ku ngoma z’abami b’i Buyuda. 26 Yahambwe mw’itongo ryitwa irya Uza, umuhungu wiwe Yosiya aba ari we amusubirira ku ngoma.