1 Uhoraho abwira Mose na Aroni ati: 2 "Barira Abisirayeli muti: ‘Mu bikoko vyose biba mu gihugu, ibi ni vyo mwemerewe kurya: 3 mwemerewe kurya igikoko cose gifise ikinono gisatuye kandi cuza ivyo cariye.

4 Hariho bimwe vyuza gusa canke bifise ikinono gisatuye gusa: ivyo ntimuze mubirye. Ingamiya, naho yuza ntifise ikinono gisatuye; irahumanye kuri mwebwe. 5 Inkezi naho yuza, ntifise ikinono gisatuye; irahumanye kuri mwebwe. 6 Agakwavu naho kuza ntigafise ikinono gisatuye; karahumanye kuri mwebwe. 7 Ingurube naho ifise ibinono bisatuye, ntiyuza; na yo irahumanye kuri mwebwe. 8 Ntimuze murye inyama zavyo canke ngo mukore ku mivyimba yavyo; ivyo birahumanye kuri mwebwe.

9 Mu biba mu mazi yo mu biyaga no mu nzuzi vyose, mwemerewe kurya ibifise amababa n’ibigaragamba. 10 Ariko ibiba mu mazi yo mu biyaga no mu nzuzi bitagira amababa n’ibigaragamba, vyaba ibigendera hamwe canke ibindi vyose biba mu mazi, muze mubigire umuziro. 11 Kandi ko ari ibizira kuri mwebwe, ntimuze mubirye kandi ntimuze mukore no ku mivyimba yavyo. 12 Ikintu cose kiri n’ubuzima kiba mu mazi ariko kidafise amababa n’ibigaragamba kirahumanye kuri mwebwe.

13 Ibi ni vyo muzofata nk’ibihumanye mu biguruka mu kirere kandi ntimuze mubirye kuko ari ibihumanye kuri mwebwe: inkona, ikinyakabaka, inkukuma, 14 ikinyamwanira, icaruzanyoni nk’uko amoko yavyo ari, 15 ubwoko bwose bw’ibikona, 16 ikigendabunyovu, sarumfune, inguriguri, n’amoko yose y’ubuca; 17 igihuna, ikirovyi, inyanana, 18 ikinyamwanira, inkongori, ikiryamivyimba, 19 agasoza, ubwoko bwose bw’inyange, samunsure, n’agahungarema.

20 Udukoko twose dufise amababa tukagendera ku maguru ane tuze tube uduhumanye kuri mwebwe. 21 Ariko hariho udukoko tumwetumwe tuguruka tukagendera no ku maguru ane mushobora kurya: ni udufise amaguru afatanye n’ikirenge dushobora gusimbagurika kw’isi. 22 Muri ivyo muze murye ubwoko bwose bw’inzige, ibihori canke intoteza. 23 Ariko udukoko twose tundi tuguruka dufise amaguru ane tuzoba duhumanye kuri mwebwe.

24 Umuntu wese azokora ku muvyimba w’utwo dukoko dutuma muhumana azoba ahumanye gushitsa ku mugoroba. 25 Uwuzotwara umuvyimba watwo ategerezwa kumesa impuzu ziwe, azoba ahumanye gushika ku mugoroba.

26 Igikoko cose kidafise ikinono gisatuye canke kituza kirahumanye kuri mwebwe; kandi uwuzokora ku muvyimba wa kimwe muri vyo azoba ahumanye. 27 Ibikoko vyose bifise amaguru ane ariko bitagira ibinono birahumanye kuri mwebwe. Uwuzokora ku muvyimba wa kimwe muri vyo azoba ahumanye gushika ku mugoroba. 28 Uwuzokora ku muvyimba wa kimwe muri vyo ategerezwa kumesa impuzu ziwe, kandi azoba ahumanye gushika ku mugoroba. Ivyo bikoko birahumanye kuri mwebwe.

29 Mu bikoko vyose bikwega inda hasi, ibi ni vyo bihumanye: ifuku, imbeba, ubwoko bwose bw’imiserebanyi, 30 icugu, ikivumbura, umuserebanyi mutoya, agacamano n’uruvuruvu. 31 Mu bikwega inda hasi vyose, ivyo ni vyo bizira kuri mwebwe. Umuntu azokora ku muvyimba wavyo azoba ahumanye gushika ku mugoroba. 32 Nihagira kimwe muri vyo gipfa kigakorokera ku kintu gikoreshwa, ico gikoresho, ico ari co cose, kizoba gihumanye, caba igikozwe mu giti, mu mpuzu, mu rusato canke mw’igunira, muze mugishire mu mazi; kize kigume gihumanye gushika ku mugoroba, hanyuma kizoba gihumanutse. 33 Nihagira igikorokera mu nkono y’ibumba, ibizoba biri muri yo vyose bizoba bihumanye, kandi muze mumene iyo nkono. 34 Ivyokurya vyose mwemerewe kurya bimaze gukorwako n’amazi yavuye muri iyo nkono bizoba bihumanye, kandi ibinyobwa vyose bizoba bivuye muri iyo nkono bizoba bihumanye. 35 Ikintu cose umuvyimba wavyo uzogwako kizoba gihumanye; iziko canke inkono iteka bize bimenagurwe. Bizoba bihumanye, kandi muze mubifate nk’ibihumanye. 36 Ariko niyaba ari isoko y’amazi canke ikinogo co kubikamwo amazi bizoguma ari ibidahumanye; ariko nihagira uwuzokora kuri uwo muvyimba azoba ahumanye. 37 Umuvyimba niwakorokera ku mbuto zo guterwa, zizoguma ari izidahumanye. 38 Ariko uwo muvyimba niwagwa ku mbuto zinitswe mu mazi, zizoba zihumanye kuri mwebwe.

39 Nihagira igikoko mu vyo mwemerewe kurya gipfa, umuntu wese azokora ku muvyimba waco azoba ahumanye gushika ku mugoroba. 40 Umuntu wese azorya kuri uwo muvyimba aze amesure impuzu ziwe, kandi aze agume ahumanye gushika ku mugoroba. Uwuzoterura uwo muvyimba aze amesure impuzu ziwe, kandi aze agume ahumanye gushika ku mugoroba.

41 Igihumeka cose gikwega inda hasi kize gifatwe nk’igihumanye, ntikize kiribwe. 42 Ntimuze murye ikintu na kimwe gikwega inda hasi, caba igikwega inda hasi canke ikigendera ku maguru ane canke ayarenga; ni igihumanye. 43 Ntimuze mwihumanishe ivyo vyaremwe. 44 Ndi Uhoraho Imana yanyu, muze mwiyeze mube abera, kuko nanje ndi uwera. Ntimuze mwiyandurishe na kimwe muri ivyo vyaremwe bikwega inda hasi. 45 Ndi Uhoraho, nabakuye muri Egiputa ngo ndababere Imana; nuko rero mube abera, kuko nanje ndi uwera.

46 Ayo ni yo mategeko agenga ibikoko, inyoni, ikintu cose gihumeka kigendagenda mu mazi n’ikigendagenda kw’isi. 47 Muze mutandukanye ibizira n’ibitazira, ivyemewe kuribwa mu bihumeka n’ibitemewe kuribwa.’ "