1 Umuntu niyahamagarwa ngo abe icabona, avuge ivyo yabonye canke azi, akanka kubivuga, bizomubera icaha, kandi ico caha aze agihanirwe.

2 Umuntu niyakora ku kintu gihumanye, nko ku muvyimba w’igikoko gihumanye caba ico mw’ishamba canke igitungano canke igikwega inda hasi, naho yoba atabimenye, azoba abaye uwuhumanye kandi azoba atsinzwe n’urubanza. 3 Canke umuntu niyakora ku bihumanya biva mu muntu, ibintu vyose bishobora gutuma umuntu ahumana, naho yoba atabizi, igihe azobimenyera azoba atsinzwe n’urubanza. 4 Umuntu niyasezerana canke akarahira atavyiyumviriye neza, akemera gukora ikintu, ari kibi canke ciza, naho yobigira atabizi, igihe azobimenyera azoba atsinzwe n’urubanza. 5 Umuntu niyashikirwa no gutsindwa n’urubanza mu buryo bumwe muri ubwo, aze yature ingene yacumuye, 6 hanyuma atange impongano y’icaha yakoze, ashikanire Uhoraho ishashi y’intama canke y’impene ivuye mu mukuku wiwe nk’ikimazi gitangirwa ivyaha. Umuherezi na we aze ayimutangire kw’incungu y’icaha ciwe.

7 Niyaba adashobora kuronka umwagazi w’intama, aze ashikanire Uhoraho intunguru zibiri canke inuma zibiri nk’impongano y’icaha ciwe; imwe itangwe nk’ikimazi gitangirwa ivyaha, iyindi itangwe nk’ikimazi co guturirirwa ku gicaniro. 8 Aze abizanire umuherezi, na we aze atangurire ku gutanga ikimazi c’ivyaha. Aze ahotore izosi ariko ntaritandukanye n’umutumba, 9 hanyuma aze amijagire igice c’amaraso y’ico kimazi gitangiwe ivyaha ku ruhande rumwe rw’igicaniro, ayandi maraso asigaye aze ayasese atembe hasi i ruhande y’igicaniro. Ico ni ikimazi co gutangirwa ivyaha. 10 Umuherezi aze aheze atange iya kabiri kw’ikimazi co guturirirwa ku gicaniro mu buryo bwashinzwe kugira ngo amutangire impongano y’icaha yakoze, na we azobabarirwa.

11 Ariko niyaba adashobora kuronka izo ntunguru canke izo numa, aze azane ic’icumi c’ingero efa* y’ifu inoze neza ayitange kw’ikimazi gitangirwa icaha. Ntaze ayisukeko amavuta canke ngo ayishireko ibimota neza, kuko ari ikimazi gitangirwa ivyaha. 12 Aze ayishire umuherezi, na we azoce akurako ifu yuzuye igipfunsi, nk’agace gatoya k’icibutso, ayituririre ku gicaniro hejuru y’amashikanwa yo guturirwa ashikaniwe Uhoraho. Izoba ibaye ikimazi gitangirwa ivyaha. 13 Uko ni ko umuherezi azomutangira impongano y’icaha cose muri ivyo azoba yakoze, na we azobabarirwa. Ibisigaye kuri iryo shikanwa bizoba ari ivy’uwo muherezi, nk’uko bigenzwa ku mashikanwa y’ifu.’ "

14 Uhoraho abarira Mose ati: 15 "Umuntu niyacumura atabishaka agakora ikizira ku bijanye n’ivyera vy’Uhoraho, aze ashikanire Uhoraho ikimazi c’indishi, kizobe ari impfizi y’intama akuye mu bitungwa vyiwe, arabe iyitagira agasembwa kandi igiciro cayo kizobe gikwiranye n’igiciro c’ifeza, ukoresheje ingero shekeli y’Ahera.* Ico kizoba ari ikimazi c’indishi. 16 Ategerezwa kandi gusubiza agaciro ico kintu co mu vyera vy’Uhoraho yahumanije mu kwongerako ica gatanu c’igiciro caco. Aze abishikirize umuherezi, na we amaze kumutangira ico kimazi c’indishi, azoca ababarirwa.

17 Umuntu niyacumura ku cagezwe na kimwe c’Uhoraho, naho atoba yabimenye, azoba ari uwo gutsindwa n’urubanza kandi azobihanirwa. 18 Aze ashire umuherezi impfizi y’intama akuye mu mukuku, itagira agasembwa kandi ifise igiciro gikwiye nk’uko bitegerezwa. Umuherezi aze amutangire ico kimazi c’indishi muri ubwo buryo, na we azobabarirwa. 19 Kizoba ari ikimazi c’indishi, kuko azoba yatsinzwe n’urubanza mu gucumura k’Uhoraho."