Malhehero anaacha nisanduku no waapahera ashinama
1 "Nkoorosheke ittu thoko nisanduku no ulhikaana kila mpata, no ukhalha madhubahu o waapahera ashinama o isadaka no mwiri wo n’johoro. Nikhalheke no urekama miono nthanu, ukhanuwa miono nthanu, ni nchusha naya miono miraru. 2 Nkoorosheke ikhona ncheshe cho madhubahu ayo, ni ikhona chiyo chikhalheke ittu imoka ni nisanduku ninene nno. Nhina nisanduku mmo, nkhuneelheke wo uhika ishaaba. 3 Nkoorosheke ni ikaruma chaya, mavalhi o ukukuttelha itura, isepetu cho ukhupelha itura wuuthi madhubahu, inyipo, iyuuma cho urukunushelha inama ni isahani cho uvalhelha mooro. Chonkhaye chikooroshiyeke wo ishaaba. 4 Mwamalhakaru, nkoorosheke nttavi no ishaaba no waaneelha inama niwarihiye ibangili ncheshe kila ikhona yo nttavi nno. 5 Mweesheke nttavi nno unrekoni wuuthi madhubahu uwo, wiira nttavi nno niphiye variyari madhubahu. 6 Tho nkoorosheke mishaamu cho n’johoro cho uthathelha madhubahu ayo. Ni chiyo nhikeke ishaaba. 7 Mishaamu chiyo chikelhihiyeke mbangilini mmo, chinaakhalheke mipata miilhi cho madhubahu ayo vanothathiya aya vawo. 8 Nisanduku nno nkoorosheke wo imbau, ni nhina nikhalheke mwaari, thoko chenre aka wo uwoonihani umwaakoni ulhe.
Ntenje no Nihema Nitakatifu
(Utt 38:9-20)