1 Ekwapeta kutwele kwa masi gingi, bana aka nalomi baka Noa, Shemu na Amu na Japeti, bapata bana bingi. Jenze ndi oloza ji ibeleku yabu.

2 Bana akanalomi baka Japeti babii Gomeli na Magogu na Madai na Javani na Tubali na Meshaki na Tilasi. 3 Bana akanalomi baka Gomeli babii Ashikenazi na Lipati na Togama. 4 Bana akanalomi baka Javani babii Elisha na Talushishi na Kitimu na Dodanimu. 5 Haba ndi akahoku babu ba bandu baatumbulia kutama kumbwani na ku kilwa kila bandu kwa luga jabu, ku lukolu lwabu ni milema gabu.

6 Bana akanalomi baka Amu babia Kushi na Misili na Puti na Kanani. 7 Bana akanalomi baka Kushi babia Seba na Awila na Sabita na Lama na Sabiteka. Bana akanalomi baka Lama babia Sheba na Didani. 8 Kushi babia atati baka Nimulodi jwabiya jutumbuli kumanyikana kwa makili gaki punndema. 9 Sapanga anhenga jubiya jojubenga inyama mwikioli nkolongu, ndienu bandu bapwaaga, "Bambu Sapanga juguhenga gubiya jojubenga inyama mwikioli jojumanyikana ngama ngati Nimulodi." 10 Misi jabu ju utumbuli mu ulongosi waki jabia Babuloni na Eleki na Akadi mu nndema ja Shinali. 11 Kuhuma hoku ku Nimulodi jajenda ku Ashulu, jasenga misi ja Ninawi na Lehobotili na Kala na, 12 Leseni musi gogubii kati ju ku Ninawi na musi nkolongu gwa Kala.

13 Misili jabiya Atati ba Aludi na Waanamu na Waleadi na Wanaputui, 14 Wapatualusi na Wakasilui hoku ndi kobahumila Apilisiti na Wakaputoli.

15 Kanani babia ahoku baka Sidoni jojabii mwana ju utumbuli na Ahiti, 16 kabee babii ahoku baka Ayebusi na Aamoli na Agiligashi, 17 Ahivi na Aaliki na Asini, 18 Aaluvadi na Asemali na Aamati. Mwenikatai bandu bangi buku Kanani batenda kuenea punndema. 19 Mipaka ju punndema jabu jajonzukika kuhuma ku Sidoni mbaka ku Gaza nu upandi golipiti lyoba uku Sodoma nuku Gomola na Adima na Sebuimu hadi ku Lasha. 20 Haba ndi ibeleku yaka Amu kulengana na makabila gabu na luga yabu na misi jabu ni milema jabu.

21 Shemu mmbeli waka Japeti jabii ndi atati ba Aebulania boti. 22 Bana akanalomi baka Shemu babii Elamu na Ashulu na Alufakasadi na Ludi na Alamu. 23 Bana akanalomi baka Alamu babii Usi na Uli na Geseli na Mashi. 24 Alufakasadi ambelika Shela na Shela ambelika Ebeli. 25 Ebeli jabii na bana akanalomi abeli, ju utumbuli ankema Pelegi ndaba kipindi se hesi bandu punndema batei kubaganiki na jwa pili ankema Jokitani. 26 Jokitani jabia atati baka Alumodadi na Shelepu na Hasalamaweti na Yela, 27 Adolamu na Uzali na Dikila, 28 Obali na Abimaeli na Sheba, 29 Opili na Awila na Yobabu. Haba boti babiya bana baka Jokutani. 30 Nndema yebatama yatumbuliya ku Mesha mbaka ku Sepisili pa pandu pi itombi pu upandi golipiti lyoba. 31 Haba ndi ibeleku yaka Shemu kulengana nu lukolu yabu na makabila gabu na luga yabu na misi yabu ni nndema yabu.

32 Haba ndi bandu bi ibeleku yaka Noa, kulengana ni ibeleku yabu na makabila gabu. Kuhumi mu nndema heji bandu baenia nndema joti baada jukupongo kwa masi gingi gagatweli punndema.