1 Bambu Sapanga ampitila Ibulaimu pambipi ji mikongu ji mialoni jaka Mamule. Ibulaimu jabiya jutami pandu pukujingalii mulihema laki kipindi sa lyotu la muhi. 2 Ibulaimu ejalinga kulongi, jaabona bandu atatu ajemiki patali kidogu palongi jaki. Pajaabona jabutuka imbelu kuhuma pandu pukujingali mulihema laki, jajenda kwaajopa. Ejahikila jajinama kwi isima. 3 Japwaaga, "Mwakabambu bangu, mpepa koku nunndoba mwiimbeta nepani nuntumisi winu ila mpetila kwangu. 4 Ngiti nundetila tumasi nkunywa nu kupomule pai ju nkongu. 5 Pampomule hapa niandia posu nzokopi mkula ili mpata makili gukuendale na sapwali jinu, ndaba nhiki nepani ntumisi winu."

Nabombi bapwaaga, "Tusengu ngamaa! Henga ngati egupwagiki."

6 Ibulaimu jakelubuka nyata mu lihema ampwagila Sala, "Andiya nyata uwembi wa sapi kilu komi na sita, guunya nu kujosa mabumunda." 7 Ndipala japita nyata jajenda mu likundi la ng`ombi, jasagula ng'ombi nzoku jimu jejikendiki, ankabisa ntumisi jusinza nukuteleka. 8 Kabee Ibulaimu jajukua kabee masiba gumugandu na masiba ga masi ni inyama jela jebaandii jaandaliya ageni haba posu najombi jajema pambipi nabombi kwaahudumi pababiya akula pai ju nkongu.

9 Ageni bala bundalukiya, "Boo, nhwanu waku Sala jubii kwako?"

Ibulaimu jajibua, "Jubii mu lihema."

10 Jumu wabu japwaaga, "Sakaka nihika kabee kipindi ngati senze pa mwaka, nu nhwanu waku Sala jiibia na mwana mwanalomi." Sala jabii munyuma ja pandu pukujingali ulihema jwatenda kujoane. 11 Ibulaimu na Sala babii aseja ngani, najombi Sala yaka yaki ukupapa mwana yabiya ipetiki. 12 Henu, Sala jaheka sumumwoju koni jupwaaga, "Nepani nu nndomi wangu twaaseja nganiwesi kupata mwana. Niwesa boo, kutogule lijambu heli nu kupata mwana?"

13 Hapa Bambu Sapanga anndalukiya Ibulaimu, "Ndaba jaki Sala juhekiki nu kulilaluki ana sakaka juwesa kubeleka mwana koni jubii nseja? 14 Boo, libii lijambu lokapi lelisindikana kwaka Bambu Sapanga? Nihika kipindi sekipangiki, kipindi ngati senze pa mwaka na Sala jiibiya na mwana mwanalomi."

15 Lakini Sala, koni jubii ni kiholu, jakana nu kupwaga, "Ngasenahekike!"

Bambu Sapanga ampwagila, "Hena ukahekike."

16 Ndi bandu bala pababiya atenda kuboka na Ibulaimu koni jutenda kwaahindaki, bahika pandu pabawesa kugubona musi uku Sodoma. 17 Ndienu, Bambu Sapanga jilipwagila mwoju. "Boo, nunhiya Ibulaimu lijambu lembala kuhenga? 18 Jombi jiibiya atati ba nndema ja bandu ba nndema jejibii na makili nukupete jombi ibeleku yoti iitenda kupengalewa! 19 Nunhagwi Ibulaimu ili jwaalongusa bana baki na bandu ba nyumba jaki apwata indela jangu sukuhenga majambu ga sapi na majambu gagajekeka palongi jangu. Anaahengiki haga ninhenga ganunndagi Ibulaimu."

20 Ndienu Bambu Sapanga apwaagila Ibulaimu, "Gabii malobi giliya ganagajoana gaahenga bandu buku Sodoma nuku Gomola na mahakau gabu gabii makolongu ngani. 21 Henu niihelala kujenda hoku nakalinga namweti ana mahakau gaahengiki galengana na malobi mabaja ganagajoani. Ana ngahela niitenda kumanya."

22 Kuhuma hapa bandu bala bakamula indela jukujenda ku Sodoma, lakini Bambu Sapanga jabiya juhigali koni jujemiki pamu na Ibulaimu. 23 Ndienu, Ibulaimu anhegaliya Bambu Sapanga nu kundaluki, "Boo, sakaka waakoma bandu baamboni pamu na bandu abaja? 24 Pangi kubii na bandu baamboni hamsini mu musi je homu. Boo, wagukoma musi gwoti badala jukuguleka ndaba ja bandu baamboni amsini haba? 25 Ngasehobale witenda hela! Kwaakoma bandu baamboni pamu na abaja, baamboni kwa ahenge sindu simu na abaja! Ngahela! Jojutemu nndema gwoti ngajikotoki kuhenga gagapalika."

26 Bambu Sapanga ampwagila, "Ana naakoli bandu baamboni hamsini ku musi uku Sodoma, ndienu nganaagukomi musi hogu ndaba ja bandu hamsini haba."

27 Ibulaimu japwaaga kabee, "Nhwesiki kulonge na Bambu sanga kujogopa, hata ngati nepani ndi luombi na maliu pena. 28 Anakubii na bandu alubaini nu nhwanu babii baamboni. Boo, wagukoma musi uku Sodoma woti ndaba ja bandu nhwanu bapungasike?"

Bambu Sapanga jajibua, "Nganaakomi bandu ba musi uku Sodoma ana abii bandu baamboni alubaini nu nhwanu."

29 Ibulaimu jaendaliya kupwaaga, "Tosa bandu alubaini awesa kupatikana momu."

Bambu Sapanga anzibua, "Ndaba ja bandu alubaini baamboni nganaakomi bandu ba musi we gola."

30 Ibulaimu jaendaliya kupwaaga, "Bambu nandi noba wiinhyomela, nanepani mbwaga kabee Tosa ahoto kupatikana bandu Selasini."

Bambu Sapanga anzibua, "Ngandendi hela, ananaakoli bandu ba amboni selasini."

31 Ibulaimu japwaaga, "Bambu na noba guneka nongila na wehapa kabee kupete lijambu le heli. Kwibiya boo, ana abii bandu baamboni ishilini."

Bambu Sapanga jajibua, "Ndaba ja haba ishilini, nganaakomi bandu musi we hogu."

32 Mwisu weni, Ibulaimu japwaga, "Bambu na nuguloba wiyoma, ila mbwaga kabee mala ja mwisu. Boo ana patakini bandu komi baamboni, kwibiya bole?"

Bambu Sapanga jajibua, "Ndaba ja bandu haba baamboni komi nganaakomi bandu ba musi we hogu." 33 Bambu Sapanga pajajomula kulonge na Ibulaimu jatenda kuboka, najombi Ibulaimu jabuja ku nyumba jaki.