1 Munndema gola japitila inzala ngolongu, inzala jeheji jabii ngolongu kupeta jejapitii kipindi saka Ibulaimu. Isaka jajenda ku musi uku Gelali kuka Abimeleki Bambu nkolongu jwa Apilisiti. 2 Bambu Sapanga ampitila Isaka nukumpwagi, "Wiijenda ku Misili, ila tama mu musi gonagupwagila. 3 Tama ku ugeni mu musi we hogu, nanepani nibiya pamu na wehapa nu kugupengale. Nanepani niitimisa lilaganu lenaapekiya atati baku Aibulaimu, ndaba nagupekiya wehapa ni ibeleku yaku milema heji joti, 4 Naijonzukiya ibeleku yaku ibiya hingi ngati ndondu yukunani kwa mahundi na kwaapeke milema heji joti. Kupete ibeleku yaku milema joti jiitenda kupengalewa. 5 Kwa ndaba atati baku Ibulaimu babiya anyetaki nepani nukuhenga ganunndagalakiya juhenga nukupwata malagisu gangu."

6 Ndienu, Isaka jatama ku musi uku Gelali. 7 Bandu buku Gelali pabunndalukiya majambu guku nhwanamundu, jombi jajibua, "Jonioju we nndombu wangu." Jajogupa kupwaaga joniojuwe nhwanamundu ndaba jaholaliya pangi bandu buku Gelali awesa kunkoma ili anzukua Lebeka, ndaba Lebeka jabii jojunyambiki namanopi. 8 Ejabiya jutami hoku ku kipindi kilasu, lisoba limu Abimeleki bambu nkolongu jwa Apilisiti jalingaliya kunza kupete pilindilisa laki ambona Isaka akunkamukamu Lebeka nhwanamundu. 9 Abimeleki ankema Isaka nukumpwagi, "Kumbi jonioju nhwanu waku! Mbona wapwaaga ndi nndombu wako?"

Isaka jajibua, "Najogopa bandu bunndema goni awesa kungoma ili anzukua Lebeka."

10 Ndienu Abimeleki anndalukiya, "Majambu boo, gautunhengile? Jumu wa bandu bangu kabiya juwesiki kugone nu nhwanuwaku, nawehapa wakabiya gutubweni twaabaja." 11 Ndienu Abimeleki jaalagalakiya bandu boti kupwaaga, "Jokapi jojanhengila liya mundu jonzo au nhwanamundu jitenda kukomeka."

12 Saka sehesi Isaka japanda imbeju mu nndema we hogu, jahusa mala mia jimu nakanopi, ndaba Bambu Sapanga jatei kumpenge, 13 najombi jabiya mundu jwana hindu hingi. Jajonzukika kupata mali na jabiya jwana hindu hingi ngani. 14 Jabii na makundi ga makondoo na ng`ombi na atumisi bingi, mbaka Apilisiti bumbonila wipu. 15 Henu, Apilisiti bayelaliya iliba yoti ya masi yebahembiki na atumisi baka Ibulaimu atati baki, batwelakiya luhombi.

16 Ndienu, Abimeleki ampwagila Isaka, "Boka munndema gwitu, ndaba wehapa gutupetiki makili nakanopi." 17 Ndienu, Isaka jaboka ku Gelali, jasenga likambi laki mu ligomba luku Gelali, jatama hoku. 18 Isaka jayelumbula iliba yebabiya ahembiki kipindi Ibulaimu atati baki pababii bomi, iliba yeyuye Apilisti babii ayelali baada ja kuwa Ibulaimu. Jiipekiya maina agalaga gabakema atati baki.

19 Ndienu Atumisi baka Isaka pabahemba mu ligomba lela bapata iliba ya masi gaganyambiki gabiya gatenda kutimbuka, 20 lakini alimi buku Gelali balosana na alimi baka Isaka kupwaaga, "Masi haga gitu." Henu ndi Isaka jikikema kiliba se hesi Eseki, maana jaki, "Kulosana."

21 Kabee atumisi baka Isaka bahemba kiliba sengi, nasombi kabee balosanii, henu Isaka jikikema kiliba sehesi Sitina mana jaki, "Kupenga." 22 Ndipala Isaka jajenda pandu pangi nu kuhemba kiliba sengi na ngakuba jobalosana naku, henu Isaka jikikema Lehoboti mana jaki, "Henu Bambu Sapanga jutupeki napwasi ngolongu, natwepani mbaka tuneng`ane nukujonzukeka mu musi we moni."

23 Isaka jaboka hapa nu kujenda ku musi uku Beelisheba. 24 Ikilu jejeji Bambu Sapanga ampitila nu kumpwaagi, "Nepani ndi na Sapanga wa Atati baku Ibulaimu. Wijogopa ndaba mii pamu na wehapa, nagupengaliya nukuijonzuke ibeleku yaku kwa ndaba jaka Ibulaimu, ntumisi wangu." 25 Henu, Isaka jasenga hoku mesa jukupiki litambiku, nukundumbali Bambu Sapanga. Jatama hoku na atumisi baki bahemba kiliba.

26 Abimeleki jahuma ku Gelali jabii pamu na Ahuzati nkosi waki, na Pikoli nkolongu wa alonda baki, anzendila Isaka. 27 Isaka anndalukiya, "Boo, ndaba jakii nhika kwangu koni ntenda kunzukila na mwamenga kwino?"

28 Bombi bunzibua, "Tukumbweni hotuhotu Bambu Sapanga jubii pamu nawehapa. Henu twapwaaga tuliga mbamba wehapa na twepani nukuhenga lilagi, 29 ana, ngautuhengi sindu siliya, na twepani ngasetuguhengi sindu siliya ngatwaguhengi sokapi. Tuguhengi gaamboni na tuguleka gujenda ku lukwali sanga kuguhenge sokapi siliya. Nahenu Bambu Sapanga wehapa jutei kugupenge." 30 Ndienu, Isaka jaahengila tipati, nabombi bakula na kunywa. 31 Kilabu jaki bajumuka pulukela namangani nu kuhenga malaganu. Ndipala Isaka jaahindakiya nukutabukana ku lukwali.

32 Lisoba alelale atumisi baka Isaka bunhikila nukumpwagi lijambu likiliba sela sebabiya ahembiki, nukupwaaga, "Tupatiki masi!" 33 Ndienu, Isaka jikikema kiliba sehesi Shiba mana jaki, "Kulapani," henu musi we hogu bugukema Beelisheba mbaka lelenu.

34 Esau pajabia na yaka alubaini, jajukua akammbomba abeli bilikabila la Ahiti, Judisi kamwali waka Beeli na Basemati kamwali waka Eloni. 35 Akammbomba behaba baleta usungu mu maisa gaka Isaka na Lebeka.