1 Hapa Josepu jasidwa kuliiya palongi jaboa babahikanii naku, jalagalakiya apitaninya kunza. Henu Josepu jabiya kajika jaki pajilimanyisa kwa alongu baki. 2 Lakini jalela kwa sauti ngolongu mbaka bandu buku Misili bunzoini, ahelahe kabee na bandu ba alongu baka Falau nabombi bunzoini. 3 Josepu jaapwaagila akaalongu baki, "Nepani ndi Josepu. Boo, atati ba bakona bome?" Lakini akaalongu mundu ngasebawesiki kunzibu ndaba julujogopu lobabinaku palongi jaki. 4 Josepu jaapwagila akalongu baki, "Nhegaliya pambipi jango." Pabunhegaliya jaapwagila, "Nepani nu nndongu winu Josepu, jomunndombisa ku Misili." 5 Lakini henu mwihangajika wala kujilaumu ndaba juku nombesa ku Misili. Sapanga ndi jojaneta kongoni nunndonguliya ili nhokua womi wa bandu. 6 Senze saka sa pili pena toka inzala pajajingala pani pu nndema, na yakona yaka yengi nhwanu ngabiiwesi kulema wala kuhusa. 7 Sapanga janeta kongoo nundonguliya, ili kuulamisa womi nhigaliya mwabomi punndema na kwaakombo ku ukombosi nkolongu. 8 Henu ngamwanganya moonetiki nepani kongoo, ila ndi Sapanga. Ndi jojunhengiki ngati atati kwaka Falau, jojujemale nyumba jaki joti nu kulongosa Misili joti.

9 Henu ntenda nyata nzenda kwa atati mwakapwagila, Josepu mwana waku jupwaaga. Sapanga junhengiki miya nu nkolongu juku Misili henu jwiiselewa kuhika kwangu. 10 Wiitama pambipi nanepani ku Gosheni, wehapa bana baku na asoko baku, mipugu jaku na mali gaku goa. 11 Pawibiya ku Gosheni nepani nagutunza wehapa, alongu baku pamu na indu yaku yoti yemmbii naku ili mwiikuwa ni inzala, ndaba jakona yaka nhwanu yi inzala.

12 Ndipala Josepu jaapwaaga, "Mwanganya kwa mihu gii mmbweni nu nndongu waa Benjamini kwa miu gaki jubweni kuba nepani ndi Josepu nenongi na mwanganya. 13 Nzenda mwakaapwagila atati bangu namuna hembatiki isima ku Misili na goa gamwagabweni. Ndienu nhenga nyata mwakaaleta atati bangu kongo."

14 Ndipala Josepu anzobatiya Benjamini, nndongu waki nukulela, Benjamini najombi jatenda kulela koni ajobatani. 15 Pajabiya jakona jakalela, Josepu jaajobatiya alongu baki na kwaabusu. Hapa ndi alongu baki pabawesa kulongee naku.

16 Majambu haga pagahika ku Ikulu jaka Bambu nkolongu, kupwaaga alongu baka Josepu atei kuhika majambu ge haga gunndenganii ngamaa Falau na aka kilongosi baabii paijaki. 17 Henu Falau ampwagila Josepu, jaapwaagila alongu baki akwea misigu jabu mu maponda gabu abuja ku Kanani, 18 bakaaleta pamba atati babu na bukunyumba jaki boti. Nepani ngiti naapekiya pandu pa sapi papabii na mbolea ngani punndema wa pa Misili papuje biiwesa kutogule kupata ilebi yoti gupu nndema goni. 19 Waapwagila ajukua magali gagahutwa na ngamia kuhuma pa Misili pani ga kwaatoto bana babu akeki na akahanamundu na wala biikosa kuhika na atati babu. 20 Wakaapwagila biijogopa kupete mali gabu ndaba pandu pasapi kupeta poa pu nndema uku Misili piibiya gwabu.

21 Ndienu bana baka Yakobu bahenga ngati ebaalagalakiya. Josepu jaapekiya magali kulengana na malagisu gaka Falau na posu ja kula mwiindela. 22 Jaapekiya kila jumu wabu ingobu yukubadilisa, lakini Benjamini ampekiya ipandi selasini yu lupija ni ingobu inyai nhwanu yuku badilisa. 23 Kabee jaatumila atati baki nhupi yenze, maponda komi gagatotwi hindu ya sapi yuku Misili, maponda gakambomba komi gagatotwi ilebi, mabumunda na yakula yengi. 24 Ndienu Josepu jatabukana na alongu baki. Pababiya atenda kuboka jaalagaliya kupwaaga, "Mwiilosana mwiindela."

25 Ndienu baboka ku Misili nukubuja kunyumba kwa atati babu Yakobu, ku nndema uku Kanani. 26 Baapwagila atati babu, Josepu jubii mwome! Jombi ndi jojujemale hindu yupunndema goti guku Misili. Hapa atati babu batenda kusangaa, ndaba ngasebawesa kuhobale malobi gabu.

27 Lakini pabasimuliya goti gajalagalakiya Josepu na pajagabona magali gaampeki Josepu kunzukuu, mwoju waka Yakobu atati babu watenda kutuli. 28 Izilael japwaaga, "Henu nisiki, mwana wa Josepu jakona mwomi! Ngiti nyenda kummbona kabula ngasenguiki."