1 Egapeta majambu haga, Bambu Sapanga ampwagila Abulamu mu mabonu, "Abulamu Wijogopa! Nepani nitenda nagulenda. Nagupekia nhupi ngolongu!"

2 Abulamu japwaaga, "Bambu Sapanga, wiimbekiya kyane koni endale kutama sanga mwana na mundu jojilisa mali gango ndi jo Eliazali juku Damasiko? 3 Linga! Ngasegumbeki mwana. Mtumwa jojubelakiki mu nyumba jangu ndi jojibiya mndisi wangu!"

4 Ndienu, Bambu Sapanga ampwagila, "Eliazali ntumisi jwaku ngajikubi jukulisa mali gaku! Ila nagupekiya mwana ju kubeleka jojibiya jukulisa mali gaku." 5 Bambu Sapanga anndeta Abulamu kunza nukumpwagi, "Linga kulianga! Balanga ndondu ngati sakaka wiwesa kubalanga! Hela ndi ibeleku yaku eibiya hingi." 6 Abulamu anhobaliya Bambu Sapanga, najombi Bambu Sapanga anzetakiya Abulamu kuba ndi jojujetakiki palongi jaka Sapanga.

7 Bambu Sapanga ampwagila Abulamu kabee, "Nepani ndi Bambu Sapanga nenuguboa ku Uli musi wa Akalidayu, ili nugupekiya nndema gowiibia pai jaku."

8 Lakini Abulamu anndalukiya, "Bambu Sapanga, niwesa boo kumanya nndema gongo wiibia paijango?"

9 Bambu Sapanga ampwagila, "Netila ng'ombi ju nkolu ja yaka itatu, imbui ja yaka itatu ni likondoo likambaku la yaka itatu ni inzeba na gunda." 10 Abulamu anndetila haba boti juisekula kila kinyama ipandi ibeli, juipanga pandu pabeli koni itenda kulingalani lakini ijuni ngasejuisekwi ipandi ibele. 11 Libanga likolongu payapala kula mitui jela, Abulamu jwatenda kwaabenga.

12 Lyoba palabiya litenda kujingila, Abulamu lunkamwi lugonu lukolongu ni kiholu na lwii lwingi lwatenda kunhyekale. 13 Ndi Bambu Sapanga ampwagila Abulamu, "Gumanya sakaka ibeleku yaku itama ngati ageni mu musi wanga wabu, bibiya atumwa na biitesika kwa muda wa yaka mia nsesi. 14 Hata hela nagulapula bandu bandema heji babaahenga kuba atumwa, ndi biipita mu nndema hogu koni abii na mali gingi. 15 Lakini wamweti wiitama maisa malasu na wiikuwa mu useja waamboni. 16 Ibeleku yaku ikelubuka pamba mu kibeleku su nnsesi, ndaba mahakau ga bandu buku Amoli gakona ngase gajagani ili apata azabu."

17 Lyoba palajingala na lwii palwahika, litanulu lapoga liyoi na miengi japia mwotu wapeta pikilanda ji ipandi yi inyama yela. 18 Lisoba heli, Sapanga jahenga Lilaganu na Abulamu koni jakapwaga, "Ibeleku yaki niipeke nndema jenze kuhuma losi luku Misili mbaka losi lukolongu luku Eupulati. 19 Nndema yehei yabia ndi Aakemi na Aakenizi na Akadomoni, 20 Aiti na Apelezi na Alepai, 21 Aamoli na Akanaani na Agiligashi na Ayebusi."