1 Lijoka labiya nu ujanza kupeta inyama yoti yumukioli yejuibombiki Bambu Sapanga. Ndienu, lijoka lunndalukiya mmbomba we hoju, "Ati Sapanga japwaaga mwikula matunda gu nkongu wokapi mu kijongo?" 2 Mmbomba jilijibua lijoka lela, "Tuwesa kula matunda gu nkongu gokapi gwa mu kijongu, 3 lakini Sapanga jutupwagila, ‘Mwiikula matunda gu nkongu gogubii pikilanda ji kijongu, wala mwiigusa ili mwiikuwa.’ "

4 Lijoka lumpwagila mmbomba jola, "Kye ngamwiikue! 5 Sapanga japwaaga hela ndaba jumanyiki ana nkuliki matunda gu nkongu hogu nanamu mwibiya ngati Sapanga, na mwiimanya gaamboni na mabaja."

6 Ndienu, mmbomba pajabona kuba matunda gu nkongu we hogu waasapi na galengane kwa kula, na paugalingali gatenda kulengane, kabee galengane kumpeke mundu malangu, jatongula litunda laki, jakula, ampekiya nu nndomi, najombi kabee jakuliki. 7 Apalapa malangu gabu gatenda kuyekuliwa, ndi bamanya abii heu, henu basona mahamba gu nkongu gobugukema ntini nu kugalenganake ingobu yukuwata mu kibunu.

8 Pakamii, kipindi sukuponga nhwai, mwanalomi hoju nu nhwanamundu bajoana Bambu Sapanga jwakajenda, nabombi bajoba pikilanda ji mikongu ji kijongu ili Bambu Sapanga jwaabona. 9 Lakini Bambu Sapanga ankema mwanalomi we hoju, "Adamu gubii kwako?" 10 Najombi jajibua, "Najoana gutenda kujenda mu kijongu, ndi natenda kujogopa naamua kujoba ndaba nakabii heu."

11 Bambu Sapanga jaalalukiya, "Nya jojugupwagila gubi heo? Boo, gukuliki lee litunda lu nkongu lenugulagalakiya wiikula?"

12 Mwanalomi we hoju jajibua, "Mmbomba jogumbeki jubiya pamu nanepani ndi jojumbeki litunda lu nkongu we hogu, nane natenda kula."

13 Ndipala Bambu Sapanga andalukiya mmbomba, "Guhengiki kike?"

Mmbomba jola jajibua, "Lijoka latenda kungonga, nepani naamua kula."

14 Ndipala Bambu Sapanga jilipwagila lijoka, "Kwa ndaba guhengiki hela, gupatiki lwaambamba kupeta inyama yoti yukupugwa, na kupeta inyama yoti imwikioli. Wiikwaba kulutumbu lwaku na wikula luombi masoba goti ga womi waku. 15 Nanhenga wehapa nu mmbomba hoju nsukiana, kuhuma mwi kibeleku saki jumu jakiponda kimutu saku na wehapa wanduma kinzekeni saki."

16 Ndipala ampwagila mmbomba, "Nakujonzukiya usungu kipindi sukupapa na ku usungu wipapa bana. Hata hela wibiya na hamu nu nndomi waku, najombi jiitenda kugulongosa."

17 Ndipala ampwagila Adamu, "Ndaba wehapa gunzoani nhwanu waku, gukuliki matunda gu nkongu ganugulakaliya wiikula, henu kwa ndaba guhengiki hela nndema nugulapi mbamba. Ili gupata posu kwa ndaba ja womi waku wiipata posu kwi lihengu lelinonwipi. 18 Nndema wagupapila miha na matungalusi, nawehapa wipalika kula makolu gi mwilitui. 19 Kwa makili gaku wiipata posu mbaka pawikelubuka muluombi kogwauma, ndaba wehapa ndi luhombi nu mu luhombi witenda kukelabuka." 20 Adamu ampekiya nhwanamundu liina la "Eva," ndaba jabiya nyongoo jwa bandu boti. 21 Bambu Sapanga jaalenganakiya Adamu nu nhwanamundu ingobu ya ngosi ikinyama, nakawatika.

22 Ndienu Bambu Sapanga japwaga, "Henu mundu jubii ngati twepani, jumanyiki gaamboni na giliya. Kutaki kumpengale kula litunda lu nkongu wa womi, ndaba anajukuliki jwiitama masoba goti ganga na mwisu!" 23 Ndienu, Bambu Sapanga ammbengila Adamu nu nhwanamundu kunza ji kijongu sa Edeni, ili jakalema mu ndema gowatumika kumbomba. 24 Ammbengila kunza nu kumbeka mlonda upandi golipiti lyoba ukijongu sa Edeni nu upanga wa mwotu gogwang`anambuka koni na koni, kujilenda indela jejijenda mu nkongu wa womi.