1 Sala jatemi yaka miya jimu ni ishilini na saba ndi jatenda kuwa. 2 Jawelila ku Ebuloni nndema uku Kanani na Ibulaimu anndelila nu kunhenge matanga nhwanamundu Sala.

3 Ibulaimu juguleka ntui waka nhwanamundu, jaboka kujenda kulonge na Ahiti, jaapwagila, 4 "Nepani ndama pamba ngati nungeni kati jinu. Mmbekiya pandu panhwesa kuntaga nhwanu wangu."

5 Ahiti bunzibua Ibulaimu, 6 "Tujoaninya, wehapa ndi ukilongosi nkolongu kati jitu. Guntaga nhwanu waku pandu pokapi pagwihagula, ngamundu jokapi kati jitu jojuwesa kugujima pandu paki pukuntagi nhwanu waku."

7 Hapa Ibulaimu jajema nu kujinama kwi isima palongi ja Ahiti, 8 japwagila, "Anakubii nnyetaki kuntaga yega juku nhwanu wangu, mpepakoku munndoba Epuloni mwana waka Soali, 9 junombasiya likolo laki luku Makipela lelibii mu mpaka mwi litui laki. Munhingamakiya junombasiya nhenga litenge lyangu, jumbekiya kwa bei jokapi jejipala apambane palongi jinu."

10 Mweni Epuloni jabiya kati ja Ahiti bababii pu nndyangu wa musi. Epuloni Anzibua Ibulaimu palongi ja Ahiti boti, 11 "Ngaela Bambu, gupepa koku gunyoaninya. Nugupeke bwaka litui loti ni likolo lelibii momuje kabee nugupekee palongi ja Ahiti ajangu. Gutaga momo yega juku nhwanu waku."

12 Ibulaimu jajinama kabee kwi isima palongi ja Ahiti bala, 13 ampwagila Epuloni, koni Ahiti boti ajoane, "Gupepakoku gunyoaninya. Nagulepa lupija lolujaganii litui laku, na nuguloba gujopa malepu ganga, ili nhwesa kuntaga homu nhwanu wangu."

14 Epuloni anzibua Ibulaimu, 15 "Bambu gunyoaninya, litui lilombeswa kwi ipandi ya Shekeli mia nnsesi ju lupija, lupija nga sindo kati jaku wehapa na nepani? Ntaga nhwanu waku." 16 Ibulaimu jajetangana na Epuloni, ampekiya ipandi mia nsesi ya malibu ga feza, ngati yejapala palongi ja Ahiti, kulengana ni kipemu sa baalomba nu kulombesa ku kipindi sehesi. 17 Ndienu, litui laka Epuloni lelibii ku Makapela upandi golipiti lyoba uku Mamule, likolo ni mikongu joti jejabii momuje pamu na lieneu loti. 18 Hindu yeheyi ampekiya Ibulaimu ibiya yaki palongi ja Ahiti boti bababii pala pu nndyangu wa musi.

19 Ibulaimu antaga nhwanamundu Sala pi likolo lelibii mu litui luku Makapela, upandi golipiti lyoba guku Mamule yani Ebuloni mu musi uku Kanani. 20 Litui ni likolo lelibii homu bajetakiya Ahiti libiya mali gaka Ibulaimu ili jaataga bandu baki baakuwa.