1 Kipindi Abulamu pajabii na yaka tisini na tisa, Bambu Sapanga ampitila nukumpwagila, "Nepani na Sapanga jwana makili. Pwata ulongosi wangu na masoba goti guhenga gaganengane. 2 Nihenga lilaganu nawehapa na kukijonzuke kibeleku saku." 3 Papuje Abulamu jatenda kunngungamali na Sapanga ampwagila, 4 Nhenga lilaganu heli nawepa, wiibiya atati ba bandu bandema jingi. 5 "Tumbuka sajenu, ngabagukemi kabe Abulamu, ila bagukema Ibulaimu, ndaba nuguhengiki kuba wa atati ba bandu ba ndema jingi. 6 Naguhenga gubiya ni ibeleku hingi ngani niibeleku yaku yiibia makabi gingi na aka bambu akolongu biipitila kuhumi mu kibeleku saku. 7 Niitunza lilaganu langu libiya la yaka yanga na mwisu kwaku wehapa ni ibeleku yaku. Na nepani niibia Sapanga waku na Sapanga jwiibeleku yaku yoti. 8 Nagupekia wehapa ni ibeleku yaku nndema gongo jejuje sajenu wehapa unngeni, nndema goti guku Kaanani gwiibia gwiibeleku yaku nanepani niibia na Sapanga wabu."

9 Ndipala Sapanga ampwagila Ibulaimu, "Ku upandi waku wehapa gupalika kuhenga ngati lilobi langu elipwaaga, wehapa na bana baku ni ibeleku yaku yoti. 10 Heli ndi lilaganu lewalikamula wehapa pamu ni ibeleku yaku. Kila mwanalomi kati jinu kupalika jusekuliwa jandu. 11 Kusekuliwa jandu kwinu ndi kwibia alama ji lilaganu kati jangu na mwanganya. 12 Kutumbuli sajenu kila mwana mwanalomi jojwiisaliwa kwinu elihika lisoba la nani jupalika kusekuliwa jandu. Kila mwanalomi mu ibeleku inu, jukubi ntumwa jojusaliwi mu nyumba jinu au ntumwa jobundombiki ku lupija lwinu kuhuma kwa ageni banga ibeleku yaku, 13 kila jojusaliwi mu nyumba jaku na hata joandombiki ku lupija lwaku jupalika kusekuliwa jandu. Heji ndi nginyuli ji lilaganu langu mu nhyega inu, lilaganu la yaka yoti yanga na mwisu. 14 Mwanalomi jokapi jwanga kusekuliwa jandu bandu biitenda kummbagu ndaba jibiya jutunwi lilaganu langu."

15 Ndipala Sapanga ampwagila Ibulaimu, "Nhwanu waku nga bankemi kabe Salai ila liina laki libiya Sala. 16 Nampengila, najombi jwagubelakia mwana mwanalomi. Nampengaliya Sala najombi jibiya nyongo jwa bandu ba ndema jingi na akabambu akolongu ba misi bihuma kwaki." 17 Hapa Ibulaimu japega magoti mbaka kibongi sagusa pai, jaheka mmwoju jaki koni jakaholaliya, "Eti kuwesikana sakaka le mwana kusaliwa kukunseja jwa yaka mia moja? Boo Sala jojubii na yaka tisini juwesa le kupata mwana?" 18 Ndienu Ibulaimu anndoba Sapanga, "Boo, ndaba ja kii gwandeka Isimaili kuba jukulisi lilaganu le hele?"

19 Sapanga anzibua, "Ngahela, ila nhwanu waku Sala jagubelakiya mwana mwanalomi, nanagu wankema Isaka. Naligangamalisa lilaganu langu kwaki ni ibeleku yaki kuba lilaganu la yaka petapeta. 20 Nukupete Isimaili nyoini kuloba kwaku. Naampengaliya, nukumpeke bana bingi na kuba bingi. Isimaili jibiya atati bu ulongosi komi na abeli nanepani nanhenga jubiya atati ba nndema nkolongu. 21 Lakini lilaganu langu lela liibonikana kwaka Isaka mweni, jojuwe Sala jagubelakiya pa mwaka kipindi ngati senze." 22 Sapanga ejajomula kulonge, anndeka Ibulaimu.

23 Lisoba leleli Ibulaimu ansekula jandu mwanamundu Isimaili na boti babasaliwi mu nyumba jaki na atumwa bajaalombiki ku lupija, ngati Sapanga eandagalakiya. 24 Ibulaimu jabiya jubii na yaka tisini na tisa pajasekuliwa jandu. 25 Isimaili mwanamundu jabii na yaka komi ni itatu pajasekuliwa jandu. 26 Boti basekula jandu lisoba limu. 27 Kila mwanalomi jojubii mu nyumba jaki Ibulaimu, atumwa boti baasaliwi nyumba jaki na babaalombiki ku lupija lwaki basekuliwa jandu lisoba lelele.