1 Lisoba limu, Sapanga ampwagila Yakobu, "Tumbuliya sapwali gujenda ku Beseli, nukunzenge mesa ja malibu jukupiiki litambiku, nepani nenugupitila kipindi pauntila mmbeli waku Esau."

2 Ndienu, Yakobu jaapwagila akalongu baki na boti pajabii naku, "Nndekala kutali isapanga ikigeni yemmbi naku, mwilisapisa nukung`anambu ingobu hinu. 3 Ndipala, twiijenda ku Beseli ili nukunsengila Sapanga mesa jukupiki litambiku, jojanyangatiya lisoba la mang`aliku, Sapanga jojubii nanepani pokapi panyenda." 4 Ndienu bumpekiya Yakobu imong`u`mong`u yoti ni isapanga ikigeni yebabii naku pamu na ndolosa yebabii aweti mu makutu, najombi jiiyelaliya pai ju mwaloni gowabii pamu na Shekemu.

5 Yakobu na bana baki pababiya nsapwali, Sapanga jaapekiya kiholu benei ba misi yoti ya pambipi hata ngasebalengiki kwaapwatalila. 6 Ndienu Yakobu jajenda jahika ku Luzu yani Beseli mu musi uku Kanani, pamu na bandu boa bajabii naku. 7 Jasenga hapa mesa jukupiiki litambiku na kupakema Elibeseli ndaba hapa ndi pandu paka Sapanga paampitila kipindi pajabii antila mmbeli waki. 8 Debola jojabii anntunza Lebeka pajabii mwana jatenda kujomuka na antaga pai ji lilibu upandi ukumosu uku Beseli. Henu Yakobu jugukema musi wehogu Aloni Bakuti, mana jaki, "Nkongu gukulela."

9 Baada jaka Yakobu kukelabuka ku Padani alami, Sapanga ampitila kabee nu kumpenge. 10 Sapanga ampwagila, "Liina laku wa Yakobu, lakini ngabagukemi hela kabeti, ila henu liina laku libiya Izilaeli." Henu Yakobu ankema Izilaeli. 11 Kabee Sapanga ampwagila, "Nepani ndi na Sapanga jwana makili. Gukapata ibeleku ingi kwaku wehapa kwipitila bandu bingi na gwibiya atati bilikundi la bandu bingi banndema hingi na akabambu akolongu. 12 Musi gonumpeki Ibulaimu ni Isaka, nagupekiya wehapa ni ibeleku yaku." 13 Ndienu, ejajomula kulonge na Yakobu, Sapanga andeka nukukwela kunani. 14 Yakobu jajemika mpengu wililibu pandu je pala pajalongila na Sapanga, jilibeka palongi jaka Sapanga sukulijakani litambiku la mahuta na divai. 15 Ndienu Yakobu japakema pandu je hapa pajalongila na Sapanga Beseli.

16 Yakobu nu nndongu waki baendaliya na sapwali jabu kuhuma ku Beseli. Pababiya utali kidogu kabula jukuhika ku Epulati, Laeli lunkamula lipyanda lukubeleka. 17 Najombi pajabii mu lipyanda leheli, sing`anga ampwagila, "Wijogopa gupatiki mwana jongi mwanalomi." 18 Laeli koni jutenda kuwa ampekiya mwana we hoju liina Benoni. Lakini atati baki ampekiya liina laki Benjamini.

19 Ndipala Laeli jakuwa nukuntaga mulutengu ji indela jejijenda ku Epulati sajenu kumanyikana kwi liina la Beteleemu. 20 Yakobu jajemika mpengu gukukomboka panani ji litenge laka Laeli goguwe gubii mbaka lelenu. 21 Izilaeli jaendaliya na sapwali jaki nu kugone baada jukupeta mu nnala uku Edeli.

22 Izilaeli pajabii jutama mmusi homu, mwana waki Lubeni jagonila na Biliha, awala wa atati baki, najombi Izilaeli jajoini lijambu le heli.

Yakobu jabii na bana komi na abeli akanalomi. 23 Bana baka Lea babii Lubeni, ndi mmbeleka ju utumbuli jwaka Yakobu na Simoni na Lawi na Yuda na Isakali na Zebuloni. 24 Bana akanalomi baka Laeli babii Josepu na Benjamini. 25 Bana akanalomi bababelakiki na Biliha ntumisi waka Laeli babii Dani na Naputali. 26 Na bana akanalomi bababelakiki na Zilipa ntumisi waka Lea babii Gadi na Asheli. Haba ndi bana baka Yakobu akanalomi, bajabelika pajabii ku Padani alami.

27 Yakobu jaboka jajenda ku nndema uku Mamule kwa atati baka Isaka, ku Kiliati aluba yani Hebuloni pandu papuje Ibulahimu ni Isaka atamika ngati ageni. 28 Isaka jabii na yaka mia jimu na semanini, 29 henu, Isaka japomula mala ja mwisu na kuwa nu kujongana na aseja ajaki koni jubii na yaka hingi. Nabombi bana baki, Esau na Yakobu batenda kuntaga.