1 Egapeta kipindi kisokopi, Sapanga anndenga Ibulaimu. Sapanga ankema, "Ibulaimu!" Najombi jatenda kujeteka, "Hena nepani!"

2 Sapanga ampwagila, "Nnzukua mwana waku Isaka jwa kajika jogumpai ngani, gujenda musi uku Molia, ukapia litambiku luku josa panani ji kitombi simu senukulangia."

3 Henu kilabu jaki, Ibulaimu jajumuka pulukela namangani, jajukua liponda laki jajukua atumisi baki abeli pamu ni Isaka mwana waki. Jaandia nhanzu kwa ndaba ji litambiku lukujosa, ndipala jatumbuliya sapwali kujenda pandu Sapanga paampwagila. 4 Palahika lisoba la tatu, Ibulaimu jalinga palongi japabona pandu pala su kutali. 5 Jaapwagila atumisi baki, "Nnenda pamba ni liponda ale. Nepani na mwana wangu tujenda mbaka kolako, tukunndumbaliya Sapanga, mwisi tukelubuka kabeti."

6 Ndienu Ibulaimu jajukua nhanzu yela, antweka Isaka mwana waki, jombi mweni jatotula mwotu na kisu mu kuboku, babokannya pamu. 7 Isaka jaalalukiya atati baki, "Atati!"

Ibulaimu jajetika, gupwaga boo mwanaa?

"Mwotu na nhanzu tubii naku lakini likondoo lilitambiku lukutini libii kwako?"

8 Ibulaimu jajibua, "Mwanangu, Sapanga mweni jukutupekiya likondoo li litambiku lukutini." Ndienu, baendaliya na sapwali jabu.

9 Ebahika pandu papuje Sapanga paanndagalakiya, Ibulaimu jasenga mesa jamalibu jukupiki litambiku nu kupanga nhanzu panani jaki. Ndienu ankonga magolu na maboku Isaka nu kungoneka panani ja nhanzu yeyabii pamesa jukupiki litambiku. 10 Ibulaimu jajukua kisu ili ansinza mwanamundu. 11 Lakini ntumi ju kunani ankema kuhuma kunani kumaundi, "Ibulaimu! Ibulaimu!"

Najombi jwajetika, "Hena mi pamba!"

12 Ntumi jukunani kwaka Sapanga jola ampwagila, "Wanhumisa mwanawaku wala kutenda sokapi! Henu manyiki ana unndumbalii Sapanga, ndaba ngase unzimiki hata mwana wa kajika."

13 Ndienu, Ibulaimu jalinga pulutengu, jilibona likondoo likambaku manyelu gaki gapati pikitutu. Ndienu, jajenda jilijukua likondoo lela nukulipia litambiku lukutini badala jaka mwanamundu. 14 Henu, Ibulaimu japakema pandu je pala, "Bambu Sapanga ndi jojupia." Ngati bandu eapwaga mbaka lelenu, "Mukitombi saka Bambu Sapanga, Sapanga jwaapekee bandu baki."

15 Ntumi ju kunani ankema kabee Ibulaimu kuhuma kunani kwa Sapanga, 16 ampwagila, "Bambu Sapanga jwapwaaga, nililapi namwete ndaba guhengiki hela na ngasewakaniki kumpia mwana waku wakajika, 17 sakaka ngiti jugupengila ngamaa nukugupeke ibeleku hingi ngati ndondu yu kunani kwaka Sapanga, na ngati nsangi guku mbwani. Nabombi bibia nuuwesu panani ja bandu babaasuki. 18 Kulengana ni ibeleku yaku bandu ba nndema joti biitenda kupengewa ndaba wehapa gujeteki nhilu wangu." 19 Ndienu, Ibulaimu jabuja ni Isaka babujaninya kwa atumisi baki bala, naboti pamu batenda kubokane nu kubuja ku Belisheba, Ibulaimu jatama ku Beli Sheba hoku.

20 Egapeta majambu haga Ibulaimu bumpwagila, nndongu waku Naoli jupatiki bana kuhuma kwaka Milika nhwanu waki. 21 Mwana ju utumbuli ndi Usi na mwana ja pili Buzi na mwana ja tatu ndi Kemueli atati baka Alamu, 22 Kesedi na Hazo na Pilidashi na Yidilapu na Betueli. 23 Betueli ammbelika Lebeka. Henu Milika ammbelakiya bana nane Naoli nndongu waka Ibulaimu. 24 Leumani mmbomba jojabii awala waka Naoli, najombi ammbelakiya bana babaakema Teba na Gaamu na Taashi na Maaka.