1 Jenze ndi namba ji ibeleku yaka Adamu kipindi Sapanga pa ammbomba mundu, ammbomba ku kulengana na jombi. 2 Jaabomba mwanalomi nu mmbomba, ndipala jaapengaliya na kaapeke liina, "Bandu." 3 Adamu pajabiya na yaka mia jimu na selasini jwapata mwana jo jwalengini ngamaa najombi, ankema liina Seti. 4 Baada jukumpapa Seti, Adamu jatemi yaka yengi mia nane, nu kupata bana bangi akanalomi na akammbomba. 5 Adamu jatemi yaka mia tisa selasini ndi jatenda kuwa.

6 Seti pajabii na yaka mia jimu nu nhwanu, ammbelika Enoshi. 7 Eammbelika Enoshi, Seti jatemi yaka yengi mia nani na saba, nu kupata bana bangi akanalomi na akammbomba. 8 Seti jakuwa pajwabia na yaka mia tisa na komi ni ibeli.

9 Enoshi pajabiya na yaka tisini ammbelika Kenani. 10 Eammbelika Kenani, Enoshi jatemi yaka yengi mia nani komi nu nhwanu nu kupata bana bangi akanalomi na akabomba. 11 Enoshi jakuwa koni jubii na yaka mia tisa nu nhwanu.

12 Kenani pajabii na yaka sabini, ammbelika Mahalaleli. 13 Eammbelika Mahalaleli, Kenani jatemi yaka mia nane na alubaini nu kupata bana bangi akanalomi na akambomba. 14 Kenani jakuwa koni jubii na yaka mia tisa na komi.

15 Mahalaleli pajabiya na yaka sitini nu nhwanu, ammbelika Yaledi. 16 Eammbelika Yaledi, Mahalaleli jatama yaka mia nani selasini nu kupata bana bangi akanalomi na akambomba. 17 Mahalaleli jakuwa koni jubii na yaka mia nani na tisini nu nhwanu.

18 Yaledi pajabii na yaka mia jimu na sitini ni ibeli, ammbelika Enoki. 19 Eammbelika Enoki, Yaledi jatemi yaka mia nani nu kupata bana bangi akanalomi na akambomba. 20 Yaledi jakuwa koni jubii na yaka mia tisa sitini ni ibeli.

21 Enoki pajabiya na yaka sitini nu nhwanu, ammbelika Metusela. 22 Eammbelika Metusela Enoki jatama suku nndengane Sapanga kwa yaka mia tatu na jabelika bana bangi akanalomi na akambomba. 23 Enoki jatemi yaka yengi mia tatu na sitini nu nhwanu. 24 Enoki jatama sukundengane Sapanga na ndienu bandu ngasebummbona kabete ndaba Sapanga jatei kunzuku.

25 Metusela pajabii na yaka yengi mia jimu na semanini na saba ammbelika Lameki. 26 Eammbelika Lameki, Metusela jatemi yaka yengi mia saba na semanini ni ibeli, nu kupata bana bangi akanalomi na akambomba. 27 Metusela jakuwa jubii na yaka yengi mia tisa na sitini na tisa.

28 Lameki pajabii na yaka mia jimu na semanini ni ibeli, ammbelika mwana mwanalomi. 29 Ankema mwana we hoju Noa, japwaaga, "Mwana we hoju ndi jo jwatutogulisa mwoju kulengana ni lihengu litu le linonipi letuhenga kwa maboku gitu mu luombi lojululapila mbamba Bambu Sapanga." 30 Eammbelika Noa, Lameki jatemi yaka yengi mia nhwanu na tisini na nhwanu nu kupata bana bangi akanalomi na akambomba. 31 Lameki jakuwa koni jubii na yaka mia saba na sabini na saba.

32 Noa jabii na yaka miaka mia nhwanu, ammbelika Shemu na Hamu na Yafeti.