1 Ndipala Josepu anndagalakiya jojujemale nyumba jaki kupwaaga, "Ntwelakiya mipuku ja banganya aba ilebi ye awesa kutoto. Kabee, mmbeka kabee lupija lwabu mundomu ji mipuku jabu. 2 Mumpuku guku nsoku hoju, mmbekila kikombi sa madini gu feza pamu nu lupija lwaki." Jojujemale jola jahenga ngati eandagalakiya Josepu. 3 Ekwakusa baajetakaliya alongu baka Josepu kuboka pamu na maponda gabu. 4 Babiya ajendiki mwendu nsokopi pena kuhuma ku musi, Josepu ampwagila jojujemale nyumba jaki jola, "Kanyata, waakagula bandu bala na pawakakolila waalalukiya, ‘Ndaba jaki kulepa ubaja na twepani tunhengi gaamboni? Ndaba jakii kujiba kikombi saka bambu wango, 5 sesuse jombi junywele nu kulote majambu gagihika? Nkosii ngamaa kuhenga hela!’ "

6 Jojujemale jola pajaaketaninya jaapwagila malobi ganga. 7 Lakini bombi bunndalukiya, "Bambu gubii na mana boo kutupwagi malobi haga? Twepani twaatumisi baku nga twekuwesa kuhenga lijambu ngati alele. 8 Kombuka bambu, lupija lotulukolila mumilomu ji mipuku jitu twakelabwii kuhuma ku musi uku Kanani. Kwiwesikana bole kabee tujiba lupija au zahabu ju nyumba jaka bambu wako? 9 Ndienu, ana jupatakini jumu witu jubii ni kikombi sehesi jukomika na twepani twabangi twiibiya twaatumwa baku."

10 Jojujemale jola japwaaga, "Hena kubiya ngati empwagiki. Jokapi jiibia ni kikombi se hesi, jwiibiya ntumwa jwango, lakini mbangi mwaboti ngamwiikubi na lawama." 11 Ndienu, kila mundu jatola mpuku waki pai nyata nukupobo. 12 Jojujemalee jola jalingalakia mipuku joti, kutumbulii luku nkolongu wabu nukujomule luku nsoku ngani. Kikombi se sapatikana mu mpuku waka Benjamini. 13 Hapa bajendula ingobu yabu ku usungu. Kila jumu wabu jakwea nsigu waki piliponda laki nukukelabuka ku musi.

14 Yuda na alongu baki bahika kunyumba jaka Josepu najombi Josepu jabiya jakona kunyumba. Ndienu pajajingala bunzinamiya kwi isima, 15 Josepu jwaalalukiya, "Ndaba jakii nhengiki hela? Boo, ngasemmanyiki ana ngati nepani mii nu uwesu ukulotela?" 16 Yuda ampwagila, "Tugupwagila kii bambu? Tupwaaga kike kulangi ngasetubii ni kihakao? Sapanga juyekwi kihakau situ, twepani twaatumwa baku. Henu twaboa twaatumwa baku na jojupatakini ni kikombi saku." 17 Lakini Josepu japwaagila, "Ngahela! Nepani nganhwesi kuhenga hela! Jojupatakini pe ni kikombi sangu ndi jojwiibiya ntumwa jwango. Mwanganya mwaboti mmbujaninya kwa atati bino."

18 "Ndienu Yuda anhegaliya Josepu nukumpwagi, Bambu, ndenda kuguloba gunyetakaliya nepani nu ntumisi waku, nilikengaliya palongi jaku kwa malobi masokopi, nuguloba winhyomela, ndaba wehapa ndi ngati Falau mweni. 19 Bambu, wehapa utulalukiya ana, ‘Boo, mmbii na atati au kilongo?’ 20 Natwepani tugulandila tubii na atati kabee hokomundu, na tubii ni kilongu witu jongi nsoku jojasaliwa kipindi su useja wa atati bitu. Mmbeli waka nkombu we hoju jajomwike, nu nsoku ajo ndi jojuhigali kajika jaki kwa anyongo baki, na ahokomundu bitu ampai ngamaa nkombu we hoju. 21 Bambu utulagalakiya twepani twaatumisi baku kunndeta nnuna witu ili gummbona. 22 Tugulandila ana, ‘Nkombu we hoju ngakuwesa kulekana na atati baki haba, kwa ndaba anajuhengiki hela atati baki biitenda kuwa.’ 23 Lakini wehapa bambu utupwagila anangasetuhikiki nu nndongu witu ngawatujopi kabee.

24 "Etwakelubuka kunyumba juku ntumisi waku, atati bitu tundandila ngati eutulagalakiya bambu. 25 Najombi jutupwagila twepani tuhika kongo kulomba posu jengi kasokopi, 26 tumpwagila, ‘Ngatuwesi kujenda sanga nndongu witu nsoku, kujenda naku ngajukutujope mundu we hojo.’ 27 Ndienu, atati bitu ntumisi waku, jutupwagila, ‘Mmanyiki nhwanu wa Laeli jamelaki bana abeli akanalomi pena. 28 Jumu we jahobiki, nanepani napwaga sakaka yunkuliki inyama imwikioli yunsekulini ipandiipandi, ndaba ngasenumbweni kabete. 29 Ana munzukwi kabee ajo kuhuma kwangu, henu mwiindaga mu litenge nunseja jojubii nu usungu koni mii nu usungu.’

30 "Henu bambu ana ngelabwiki kwa atati bangu sanga nkombu hajo, koni womi wa atati bangu guhobale womi waka nkombu ajo, 31 ana jubweni nkombu ngasejubii pamu na twepani jakatenda kuwa. Henu twaatumisi baku twaakoma atati bitu ku usungu. 32 Pamu na goa ge haga nilipia kuba jukunzemale nkombu we hoju kwa atati bangu sukupwaga, ana ngasenunkelabwii Benjamini kwaku, lawama jibiya panani jangu yaka yanga na mwisu. 33 Henu, bambu nuguloba, nepani nuntumisi waku nhigaliya mia nu ntumwa waku badala juku nkombu ajo. Gundeka jombi jubuja kunyumba pamu na akalongu baki. 34 Niiwesaboo kwa kelabuki atati bango sanga nkombu ajojo? Nganakawesi kunhinakali kukibona sindu sesakakolila atati bango."