1 Yakobu pajajowana ku Misili kibii kilebi, jaapwagila bana baki, "Boo, mbona ntamani koni nndingalanii pena?" 2 Jaendaliya kupwaaga, "Nyoini ku Misili ibii ilebi. Nnzendaninya mwakalomba ilebi ili twiikuwa ni inzala." 3 Henu akaabeli baki komi baka Josepu bajendaninya ku Misili kulomba ilebi. 4 Lakini Yakobu ngaseandekakiya Benjamini, nndongu waka Josepu jujenda pamu nabombi ndaba jajogupa juwesa kupata ling`ai.

5 Ndienu bana baka Yakobu bahika ku Misili babiya kati ja bandu babahika kulomba, ndaba hata nndema uku Kanani wabii ni inzala. 6 Kipindi se hesi Josepu jabii nkolongu juku Misili. Jombi ndi jojuhusika kwaalombase bandu ilebi. Ndienu akaabeli baki bahika nukunzinamii Josepu kwi isima. 7 Josepu ejaabona akaabeli baki jaamanyiki, lakini jilihenga ngati ngasejaamanyiki, jalongila naku ku ukali. Jaalalukiya, "Nhumi kwako?" Bunzibua, "Tuhumii ku nndema uku Kanani tuhikiki kulomba posu."

8 Lakini Josepu jaamanyiki abeli baki ila bombi ngaseamanyiki. 9 Jakombuka ndotu yaki ya mwandi kupete akaabeli baki, jaapwaagila, "Mwanganya mwaapelelesi. Nhikiki kutupelelesa ili mmanya ana ngasetubii na makili."

10 Bombi bunzibua, "Ngahela, bambu witu. Twepani twaatumisi baku twiihikiki kulomba posu. 11 Twepani twakakilongo, bana ba atati bamu. Twepani twabandu totuhobaleka nga twaapelelese."

12 Lakini Josepu jahingamakiya, "Ngahela! Nhikiki pamba kutupelelesa ili mmanya ana ngasetubii na makili."

13 Bumpwagila, "Twepani twaatumisi bako, tubii twaakilongu komi na abeli, bana baka mundu jumu twabenei buku nndema uku Kanani. Nnuna witu juhigali na atati kunyumba na nndongu witu jongi we jawiile."

14 Lakini Josepu jaapwagila, "Ngati ebwagiki mwanganya mwa apelelesi pena." 15 Hela ndi emwilengika. Napa kwi liina laka Falau, ngammboki pamba mbaka nnuna winu pajiihika. 16 Muntuma jumu winu akunndeta nndongu wii nsoku hoju, kipindi bangi binu bundendale mwiligelesa. Hapa ndi malobi ginu pagimanyikana usakaka waki. Ana ngahela napa kuliina laka Falau ana mwanganya ndi mwaapelelesi. 17 Ndipala jaajegala mu ligelesa kwa masoba matatu.

18 Lisoba la tatu Josepu jaapwagila, "Kwa ndaba nepani nundumbali Sapanga, nhenga ana ili nhwesa kulama. 19 Ana mwanganya ndi mwabandu monhobaleka, jumu winu juhigaliya mu kipungu, bangi baapelakiya posu akalongu bii bini inzala. 20 Ndienu mwandeta pamba nndongu wii nsoku. Hoku ndi kwiihingamakiya usakaka wa malobi ginu, nanamu ngamwiikomeki." Ndienu bajetanganinya kuhenga hela. 21 Ndipala bapwaganinya beni na beni, "Sakaka twepani tung`alika ndaba ja mahakau gatunhengi nnuna witu. Hata ngati jabii nu usungu, twepani ngasetwalingaliya hata pajutulobalakiya."

Ndimana gutupata goti gani.

22 Lubeni jaapwaaga, "Boo, ngasenumpwagi twaankoma nkombo? Lakini mwanganya ngasemwanyoanile! Henu tung`alika ndaba ja mahakau gitu." 23 Bombi ngasebamanyiki ana Josepu ngati juelewa gaalongela, ndaba pajalongila nabu kwabiya kwi indela juku nkalimani. 24 Josepu jajenda pulutengu jatenda kulela. Pajatulia jakelubuka kulongee nabu. Ndipala ankamula Simoni nukunzege pingu palongi ja miu gabu.

25 Josepu japia amuli mipuku jabu atwelakiya ilebi, na kila jumu wabu ankelubukiya lupija lwaki mu mpuku waki, na jaapekiya posu ji mwiindela. Baahengila majambu goti haga. 26 Bijitweka maponda gabu misigu jabu ji ilebi, nukubokane. 27 Pabahika pandu pukugone mwiindela, jumu wabu jahogula ligunii laki ili juwesa kulilea liponda laki, jasangia kwiiketane lupija lwaki mu ndomu gu mpuku waki. 28 Jaapwagila ajaki, "Lupija lwangu atei kukelabua. Lola pamba mundomu ju mpuku wango!" Pabajoa haga bahangajika su lujogopu. Balingalaninya koni abagaja nukulaluana, "Boo, lenieli lijambu boo lejutuhengi Sapanga?"

29 Pabahika ku Kanani kwa atati babu Yakobu, bunsimulia goa gagapatiki, bumpwagila, 30 "Nkolongu jwa nndema jola jalongila na twepani su ukali, nukutupwagi twepani twaapelelesi mu nndema waki. 31 Lakini twepani tundandila ndi twabandu totuhobaleka, na nga twaapelelese. 32 Tunndandila ana, twepani twaatumisi bako, tubii twaakilongu komi na abeli, bana baka mundu jumu twabenei buku nndema uku Kanani. Nnuna witu juhigali na atati kunyumba na nndongu witu jongi we jawiile. 33 Ndipala nkolongu jwa musi we hoju jutupwaagila, ‘Hela ndi panummanya mwanganya mwabandu bahobaleka. Mundeka nndongu wii jumu, namwabangi mpelika posu kunyumba kwa alongu bii bangi baabii ni inzala. 34 Ndipala mukundeta kwangu nnuna wi nsoku Benjamini hoju, na hapa ndi paniimanya mwanganya nga mwaapelelesi, ila ndi bandu baahobaleka. Ananhengiki hela nandekakiya nndongu winu Simoni, nanamu nanzetakaliya mwiibiya ntenda kulombesa nu kulomba mu nndema gongo.’ "

35 Pababiya ajakana ilebi mu mipuku jabu, basangia kubona kila jumu wabu ankelubuki kipuku su lupija lwaki nkati ji ligunii laki. Pababona haga, boa pamu na atati babu lwaakamula lujogopu. 36 Atati babu Yakobu, jaapwagila, "Boo, mpala le kunyaga bana bango! Josepu ngasejubii, Simoni ngasejubii, henu mpala kunzukuu na Benjamini. Goti haga gambata nepani."

37 Lubeni jaapwagila atati baki, "Ana ngasengelabwiki na Benjamini, waakoma bana ba abeli. Nndeka Benjamini mu maboku gangu, nanepani nukuntunza nukunkelabuu kwaku."

38 Lakini atati baki bunzibua, "Mwana wane ngajujendi na mwanganya, nndongu waki jukuwiki, najombi juhigali kajika jaki. Nepani nunseja jojubii na uliya ana kubii nkombu hoju jupatiki mang`aliku gokapi mu sapwali jenzenda eji, henu mwiingomaa ku usungu."