1 Ndipala Sapanga ankombuka Noa ni inyama yoti imwikioli nu yukupugwa yeyabii pamu naku nkati ja sapina. Ndienu, Sapanga japogisa nhwai panani ju nndema, masi gatumbuliya kupunguu. 2 Iliba ya masi nu kunani kwaka Sapanga kwatenda kupugwa. Iyula jatenda kukotoka, 3 masi gaendaliya kupongoka mbolimboli. Egapeta masoba mia moja hamsini, masi gabiya gapungasiki ngani. 4 Elahika lisoba la komi na saba ja mwei wa saba, sapina jatola panani ji itombi yuku Alalati. 5 Masi gaendaliya kupunguu mbolimboli ni lisoba lelatumbuliya mwei wa komi, itombi yatenda kubonikana.

6 Egapeta masoba alubaini, Noa, japungula lindilisa lejwabii julenganaki mu sapina je heji, 7 jilipia likongoo kunza nalombi ngaselakelubuka kabete jatama koku mbaka masi egajomaliya. 8 Ndipala Noa jijipia inzeba ili jakalinga ngati masi gapungasiki panani ju nndema. 9 Lakini, ndaba masi gabiya gakona gayekalii nndema gwoti, inzeba je heji ngasejapatiki pandu pukutola, jakelubuka kwaka noa mu sapina. Noa jatondabiya kuboku jijikamula nukujikelabuu mu sapina. 10 Noa jalendaliya kabee kwa masoba saba, ndipala jijipia kabee inzeba jela. 11 Inzeba je heji jakelubuka pakamii koni jitotwi limbandi libei li mizeituni mu ndomu jaki. Ndienu Noa jamanya ndi masi gabiya gapungasiki mu nndema. 12 Ndienu jalendaliya kabee kwa masoba saba, jijipia kabee inzeba jela, sapwali heji inzeba ngase jakelabwiki kabete.

13 Noa, pajabii na yaka mia sita na jimu, lisoba lu kutumbuli la mwei gu kutumbuli, masi gabia gajomiki mu nndema. Noa jayekula kipuniku sa sapina na pajalinga jabona nndema wabiya kujomiki. 14 Lisoba li ishilini na saba la mwei wa pili, nndema wabiya kujomiki ngani.

15 Hapa Sapanga ampwagila Noa, 16 "Pita kunza jasapina, wehapa pamu nu nhwanu waku na bana baku na akaahanu babu. 17 Wiipia ijuni yoti ni inyama yoti ni iumbi yomi yengi yoti yeyabii pamu na wehapa ili yapapana nukujonzukeka pundema." 18 Ndienu, Noa japita mu sapina pamu nu nhwanamundu na bana baki na akahanu babu. 19 Bapita nsapina kulengana na aina jabu, inyama yoti yu mwikioli ni iumbi yoti yeikwaba ni ijuni yoti ni inyama yoti yomi mu nndema.

20 Noa ansengila Bambu Sapanga mesa jukupiki litambiku, jajukua mu kila aina ji inyama yeibii sapi ni ijuni yeibii sapi, ampikia Sapanga litambiku lukutinii pamotu panani ja mesa ja malibu jukupiiki matambiku. 21 Ulumba wa sapi wi litambiku le heli gunyambisa Sapanga, najombi japwaga mmoju jaki, "Nganagulapi mbamba nndema ndaba ja bandu, manyiki mawasu gabu ndi giliya tumbuka pu umwana waki. Wala nganikomi iumbi yoti ngati enatei. 22 Ngati nndema eguendale kuba masoba goti kwibiya ni ipindi yu kupanda nu kuhusa ipindi ikipepu na lyotu, ipindi ipikihuku ni ipindi ipi kilangasi ni ipindi iikilu na muhi."