1 Yenze ndi ibeleku yaka Esau liina lengi Edomu. 2 Esau jajukwi akambomba buku Kanan, anzukwii Ada kamwali waka Eloni Nhiti na Oholibama kamwali waka Hana nsoko waka Sibeoni ju likabila la Ahivi, 3 na Basemati kamwali waka Ishimaili nndombu waka Nebayoti. 4 Ada ammbelakiya Esau mwana ankema Elipazi najombi Basemati ammbelakiya Leueli. 5 Oholibama ammbelakiya Yeushi na Yalami na Kola. Haba ndi bana akanalomi baka Esau babube akahanu baki bummbelakiya mu nndema uku Kanani.

6 Ndienu, Esau jajukua akahanu baki, bana baki akanalomi na akammbomba na bandu boti bu nnyumba jaki na ng`ombi yaki ni inyama yaki yengi yoti na mali gaki goti gaguge jabiya jupatiki mu nndema uku Kanani, jahamila pandu pangi, kutali nu nndongu waki Yakobu. 7 Jahenga hela ndaba mali gabu gakabii gingi nukusindwa kutamani pamu. Musi gobatami ngati ageni we hogu ngasewawesa kwaatosa ndaba ji mipugu jabu kuba jingi. 8 Henu Esau jajenda kutama ku nndema gwiitombi yuku Seili. Liina lengi laka Esau labiya ndi Edomu.

9 Yenze ndi ibeleku yaka Esau, atati ba Aedomu babatama mu nndema ji itombi ya Seili. 10 Bana baka Esau akanalomi babii Elipazi jojabelakika na Ada nhwanamundu, Leueli jabelakika na Besemati nhwanamundu jongi. 11 Bana akanalomi baka Eliapazi babii Temani na Omali na Sepo na Gatamu na Keazi. 12 Eliapazi mwana waka Esau jabii na awala liina laki Timuna. Hoju ammbelakiya mwana liina laki Amaleki. Haba ndi asoko baka Esau. 13 Basemati nhwanu waka Esau, ammbelika Leueli. Bana akanalomi baka Leueli babiya Nahati na Zela na Shama na Miza.

14 Oholibama na kamwali Ana nsokoo wa Sibeoni ammbelakiya Esau bana akanalomi atatu, Yeushi na Yalamu na Kola. 15 Bamba ndi akolongu ba makabila gagahumi kwaka Esau. Eliapazi jojabii kibeleku su kutumbuli saka Esau jwabia Temani na Omali na Sepo na Kenazi, 16 Kola na Gatamu na Amaleki, kila jumu wabu jwakabii nkolongu ulikabila laki. Haba boti ndi bana akanalomi baka Elipazi mu nndema uku Edomu, haba bibiya asokoo baka Ada nhwanu waka Esau.

17 Leueli mwana waka Esau, jaabelika Nahati na Zela na Shama na Miza, kila jumu wabu jabiya nkolongu ji likabila laki. Haba boti ndi bana akanalomi baka Leueli mu musi uku Edomu haba ndi babiya ansokoo waka Basemati nhwanu waka Esau. 18 Bana akanalomi baka Oholibama nhwanu waka Esau babii Yeushi na Yalamu na Kola, kila jumu wabu jwakabii nkolongu ju likabila laki. Haba ndi bana akanalomi baka Oholibama, kamwali waka Ana, nhwanu waka Esau. 19 Ndienu haba ndi ibeleku yaka Esau yani Edomu, kila jumu wabu jabii nkolongu ulikabila laki.

20 Yenze ndi ibeleku yaka Seili juku kabila la Aholi na ndi benei ba musi we hogu Lotani na Shobali na Sibeoni na Ana, 21 Dishoni na Eseli na Dishana, kila jumu wabu jabii nkolongu ulikabila laki kati ja Aholi bi kibeleku saka Seili mu nndema uku Edomu.

22 Bana akanalomi baka Lotani bakabii Holi na Hemani nu nndombu waki Lotani ankemika Timina.

23 Bana akanalomi baka Shobali bakabii Aluvani na Manahati na Ebali na shepo na Onamu.

24 Bana akanalomi buku Sibeoni bakabii Aya na Ana ndi jojabona kutimbilikana kwa masi ga mwotu ku lukoba, pajabiya julima maponda ga atati baki Sibeoni. 25 Bana baka Ana babii Dishoni na nndombu waki jumu jobunkema Oholibama. 26 Bana akanalomi baka Dishoni babii Hemudani na Eshibani na Italani na Kelani.

27 Bana akanalomi baka Eseli babii Bilihani Zaawani na Akani.

28 Bana akanalomi baka Dishani babii Usi na Alani.

29 Haba ndi akolongu ba Aholi, Lotani na Shobali na Sibeoni na Ana, 30 Dishoni na Eseli na Dishani, kila jumu wabu jabii nkolongu ulikabila laki mu musi uku Seili.

31 Bamba ndi akabambu akolongu baalongosa musi uku Edomu, kabula nkolongu jokapi kwaalongosa Aizilaeli. 32 Bela mwana waka Beoli jalongusa musi uku Edomu pajabii jutama mu musi uku Dinihaba. 33 Bela ejajomuka, Yobabu mwana waka Zela kuhuma ku Bosila jakuba bambu nkolongu. 34 Yobabu pajakuwa, Hushamu jwa musi uku Atemani, jabiya bambu nkolongu badala jaki. 35 Hushamu pajakuwa Hadadi mwana waka Bedadi jabiya bambu nkolongu na musiwaki wabiya ku Aviti. Hoju ndi jojalapula na kwaawesa Amidiani mu nndema uku Moabu. 36 Hadadi pajakuwa, Samula jojuhumi ku Masileka, jabia bambu nkolongu. 37 Samula pajakuwa, Shauli kuhuma musi uku Leoboti, gogubii pambipi na losi luku Eupulati, jabiya bambu nkolongu. 38 Shauli pajakuwa, Baali hanani, mwana waka Akiboli jabiya bambu nkolongu. 39 Baali hanani mwana waka Akiboli pajakuwa Hadadi jabiya bambu nkolongu, liina la musi waki labiya Pau. Nhwanamundu Akiboli jabiya Mehetabeli na kamwali waka Matiledi nu nsokoo waka Mezahabu.

40 Akolongu ba makabila gagahumiki kwaka Esau, kulengana na pandu pabu pukutama bakabii Timuna na Aluva na Yeteti, 41 Oholibama na Ela na Pinoni, 42 Kenazi na Temani na Mibisali, 43 Magidieli na Ilamu. Haba ndi akolongu ba makabila gagahumi ku Edomu yani Esau na Atati ba Aedomu, baalogwi kulengana na mahengu gabu mu pandu pi milema jealongusa.