1 Ibulaimu jaboka ku Mamule nukujenda ku nndema uku Negebu gogubi pikilanda ja musi uku Kadeshi na musi uku Shuli. Monikatai jwajenda kutama masoba masokopi pena mu musi uku Gelali. 2 Pajabii hoku, Ibulaimu japwaaga nhwanamundu Sala ndi nndombu waki. Ndienu Abimeleki Bambu nkolongu juku Gelali annzukua Sala kuba nhwanu waki. 3 Lakini Sapanga anhikila Abimeleki mu ndotu ikilu, ampwagila, "Wehapa witenda kuwa ndaba juku mmbomba jounzukwii, jubii nu nndomi waki."

4 Abimeleki jojwabi jwakona ngasejugoni na Sala jajibua, "Bambu waakoma bandu bunndema wangu banga na makosa. 5 Mweni Ibulaimu ndi jojwambwagi jonioju ndi nndombu waki. Kabee hata Sala weni japwaaga Ibulaimu ndi nndongu waki. Nepani nhengiki kwa mwoju waamboni na ngasemii na makosa."

6 Ndienu, Sapanga ampwagila Abimeleki mu ndotu je homu, "Hena manyiki guhengiki hela kwa mwoju waamboni, nanepani ndi nenugukaniki kuhenga mahakau palongi jangu, ndaba ngasenugulekiki kugone nu mmbomba hojo. 7 Henu gunkelubua mmbomba hoju kukunndomi waki. Ibulaimu ndi mlota wangu, najombi jagulobila gubiya wa mwomi. Lakini ananga kunkelabuu gumanya sakaka wiitenda kuwa pamu na bandu baku boti."

8 Ndienu, Abimeleki jajumuka pulukela ngani jaakema atumisi baki boti na kwaalandi majambu gajagabona mu nndotu, nabombi batenda kujogopa ngamaa. 9 Ndienu Abimeleki ankema Ibulaimu nu kunndaluki, "Gutuhengi kike? Boo, nugukosii kike mbaka kunete mihilu haje nepani nu ubambu ukolongu wango? Guhengi majambu ganga kupalika kuhengwa." 10 Kabee Abimeleki jaendaliya kunndaluki Ibulaimu, "Ndaba jakii guamwii kuhenga hela?"

11 Ibulaimu jajibua, "Naholaliya ana, pamba ngasejubii mundu joanzogopa Sapanga, henu mwakatenda kungoma nukunzukuu nhwanu wangu. 12 Sakaka Sala ndombu wango, atati bitu bamu ila amabu bitu nga bamu, kwa ndaba heji naamua kunzuku jubiya nhwanu wango. 13 Sapanga pajamoa mu nyumba ja atati bangu nukumbeleka ku ugeni, numpwagila nhwanu wangu Sala, ‘Hela ndi ewilangiya upali waku kwangu kila patwijenda wiipwaaga nepani nu nhasa waku.’ "

14 Abimeleki ankelubukiya Ibulaimu nhwana mundu Sala, ampekiya ni likondoo na ng`ombi na atumwa akanalomi na akammbomba. 15 Kabee Abimeleki ampwagila Ibulaimu, "Linga nndema gwoti gongo ndi wangu, henu guhagula pokapi pala pagupala kutama." 16 Ndienu, ampwagila Sala, "Linga nepani numpeki nndongu waku ipandi elpu jimu yu lupija ili kwaalangi bandu boti baabi pamu na wehapa kuba ngasegubii na makosa na amanya ngasegubii na lawama."

17 Ndienu Ibulaimu anndoba Sapanga andamisa Abimeleki nu nhwana mundu na atumwa baki aka mmbomba, najombi Sapanga jaalamisi nabombi babiya nu uwesu ukubeleka bana. 18 Kwa ndaba jagabiya gagapiti kwaka Sala nhwanu waka Ibulaimu Bambu Sapanga jaahenga akammbomba boti bu nyumba jaka Abimeleki biiwesa kubeleka bana.