1 Lisoba limu, Dina kamwali waka Yakobu na Lea, jajenda kwaatembale akammbomba baakola. 2 Ndienu, Shekemu mwana waka Amoli kuhuma likabila la Ahivi, jojabii nkolongu wa nndema hogu, paambona Dina ankamula nukugone naku kwa makili.

3 Lakini Shekemu jwalenganiwi ngamaa na Dina kamwali waka Yakobu, ampai mbaka jatumbuliya kulonge naku malobi ga sapi. 4 Henu, Shekemu jalongila na Amoli atati baki, ampwagila, "Mpepa koku nobila mmbomba hoju nanuntole." 5 Yakobu jajoana kubanga, kamwali waki Dina jusapuliwi na Shekemu, lakini kwa ndaba bana baki babii mu kulima, jatumbala mbaka ebakelubuka. 6 Amoli atati baka Shekemu, bajenda kwaka Yakobu ili kulongee naku, 7 na kipindi sesesi bana akanalomi baka Yakobu ebajoana lijambu leheli baamua kubuja kunyumba kuhuma kukulima. Akakombu behaba bayomiki ngamaa nukugubona usungu nkolongu, kwa ndaba Shekemu jabiya jwaahengi bandu buku Izilaeli sindu si iyoni sukunndimba kamwali waka Yakobu, ndaba lijambu leheli labiya ngaselipalika, 8 Lakini Amoli jaapwagila, "Mwanangu Shekemu ampai ngamaa kamwali winu. Ndienu, mpepa koku munzetakaliya anntolaje. 9 Ajukuanaje, mwanganya ngiti mutujukuliya akakamwali binu, na twepani ngiti tumpekiya akakamwali bitu. 10 Henu ngiti ntama pamu na twepani, mwiibiya hulu mu nndema gongo. Mwiitama mombo, nhenga biashala nukupata mali." 11 Ahelahe, Shekemu jaapwagila atati na akalongu baka Dina, "Mpepa koku, nannyetakia palongi jino, nanepani ngiti numpekiya sokapi semwiipwaga. 12 Mbwagila kiasi sokapi sela sa mali na nhupi, hata anakibii kikolongu namuna boo, nanepani ngiti ndenda kupia, ili pe nunzukua mmbomba hoju."

13 Ndienu bana akanalomi baka Yakobu bunzibua Shekemu na Amoli atati babu kwi isoli, ndaba Shekemu jabiya asapwi dada wabu Dina. 14 Baapwagila, "Ngatuwesi kuntolake dada witu kwaka mundu jwanga kusekuliwa jandu. Kukuhenga hela twe kwitu Iyoni. 15 Twiijetanganinya ku mihilu jenze, mwiibiya ngati twepani ku kukuseku jandu kila mwanalomi kati jinu. 16 Hapa ndi patwaajetakalia kwaajuku aka kamwali bitu na twepani twaajukua aka kamwali binu, twiitama pamu na kuba aka kilongu. 17 Lakini ana ngasennzetanganii na twepani nukusekuliwa jandu, henu twepani twanzukua kamwali witu nukujenda naku."

18 Lijambu heli laalengani Amoli na Shekemu mwanawaki. 19 Nkombu we hoju ngasejaseliwi kuhenga haga ndaba ampai kamwali waka Yakobu. Kabee Shekemu ndi jojwabii ni isima kuliku bangi boti panyumba jabu.

20 Ndienu, Amoli na Shekemu mwana waki, bajenda kulitanga la musi, pandu pukuketangane, kulonge na bandu babu kupwaaga, 21 "Bandu haba ndi akakosi bitu. Twaajopa atama munndema witu nukuhenga biashala, ndaba tubii na nndema ukututosa twepani na bombi kabee, ndienu twaajukua akakamwali babu na twepani twaapekiya akakamwali bitu. 22 Lakini bombi biijetakiya kutama na twepani na twibiya twaakilongu ku nhilu gongo, twansekula jandu kila mwanalomi kati jitu ngati bombi easekuliwi jandu. 23 Boo, ngasemmbona mipugu na mali gabu ibiya mali gito? Henu tujetanganinya naku ili atama pamu na twepani." 24 Akanalomi boti baabilibongini pu nndyangu wa musi we hogu bajetanganinya na Amoli na Shekemu mwana waki. Ndipala akanalomi boti batenda kusekuliwa jandu.

25 Lisoba la tatu mwenikatai, akanalomi baasekuliwi jandu koni babiya bakona nu ubini nkali, bana abeli baka Yakobu, Simoni na Lawi, alombu baka Dina, bajukua mipamba jabu, bugutukaliya musi sanga bandu ba musi hogu kuhobale na kwaakoma akanaloni boti. 26 Baakoma ku mipamba Amoli na Shekemu mwana waki, bumpia Dina mu nyumba jaka Shekemu, nukubokane. 27 Bana bangi baka Yakobu, baakelubukia bandu babaakomiki haba nukujuku hindu yoti yupu musi hogu, ndaba dada wabu jabiya jusapuliwi. 28 Bajukua makondoo ni imbui na ng'ombi ni maponda na sokapi sesabii kumusi au mu litui. 29 Bakamula mali goa, bana na akammbomba boti na sokapi sesabii mwamanyumba.

30 Ndienu Yakobu ampwagila Simoni na Lawi, "Mwanganya nnetii tabu sukunhenga anzukila bandu bu nndema gongo guku Kaanani na Apelizi. Nepani ngasemii na bandu bingi ana bilibongini nukunapu biingoma nepani pamu alongu bangu." 31 Aka kilongu abeli haba bajibua, "Boo, sapi lee kunndeka dada witu bunhenga ngati nselate?"