1 Yakobu jaendaliya na sapwali jaki, jahika ku musi wa bandu bu upandi golipiti lyoba. 2 Lisoba limu jikibona kiliba pu ubambaa, nu pulutengu jaki gabii makundi matatu ga makondoo gapomuli. Makondoo gabiya galendale kukegwa masi kuhuma mwi kiliba sehesi sesabii kiyekaliwi ni lilibu likolongu. 3 Kipindi makondoo pagakuba gaketangana hapa, alimi alihingalita lilibu heli kuhuma mu munndyangu ukiliba nu kugakenga makondoo. Ndienu kulikelabu lilibu pandu paki panani ju nndyangu ukiliba.

4 Yakobu jaajendila alimi na kwaalaluki alimi, "Boo, alongu bango, nhuhumiki kwako?"

Bunzibua nukupwaaga, "Tuhumiki ku musi uku Halani."

5 Najombi jaalalukiya, "Boo, mumanyiki Labani nsokoo waka Naoli?"

Bunzibua, "Tummanyiki." 6 Jaendaliya kwaaaluki, "Boo, jujumwike?"

Nabombi bunzibua, "Hena, jujumwike, na kamwali waki Laeli jolaa jutenda kuhika na makondoo ga atati baki!"

7 Yakobu jaalalukiya, "Ndaba jakii mugabongana makondoo pamo? Sajenu kwakona muhe mwagapekiya masi, ndienu mwagapelika gakaendaliya kulele manyoi."

8 Lakini bombi bunzibua, "Ngatuwesi kulihingalita lilibu lende kajika jitu. Kupalika twaalenda alimi boti ahikaninya na makundi gabu ndi twaliboa lilibu nu kugakenga makundi haga masi." 9 Yakobu pajabiya jakoni jakalongila na alimi haba, Laeli jahika na makondoo ga atati baki, ndi jojabiya jakalima. 10 Yakobu paammbona Laeli, kamwali waka Labani anijaja baki, pajagabona makondoo gaka Labani jajenda nukilihingalita lilibu lela kuhuma munndyangu ukiliba ndienu jilikenga masi likundi laka Labani. 11 Ndipala Yakobu andamukiya Laeli sukumbusu nukulela sukutogule. 12 Kabee Yakobu ammanyisa Laeli kuba, "Nepani ndi namwana waka Lebeka jojuwe nndombu wa atati baku." Laeli jabutuka imbelu kwaapwagi atati baki. 13 Labani pajajoa majambu gaka Yakobu anijaja baki, jabutuka imbelu kujenda kukunzopa. Ndienu anzobatya nu kumbusu nu kunkalibisa kunyumba jaki. Ndi Yakobu andandila Labani goti gagahengiki. 14 Najombi Labani japwaaga, "Sakaka, wehapa ndi gunndongu wangu, wa mwai gumu nanepani." Yakobu jatama naku ku kipindi sa mwei gumu.

15 Lisoba limu Labani ampwaagila Yakobu, "Wehapa gunndongu wangu boo, ngiti gundumakiya bwaka? Mbwagila gupala nugulepa senti ilenga!" 16 Henu Labani jabii naka kamwali abeli, nkolongu ankema Lea nu nsoku ankema Laeli. 17 Lea ngasejabii na mihu ganga kulinga sapi, lakini Laeli jabii ni liumbu la sapi na jojunyambiki ngani.

18 Yakobu ampai Laeli, ndienu ampwagila Labani, "Ngiti nugutumakiya yaka saba ili gumbekiya Laeli kamwali waku nsoku hoju jubiya nhwanu wangu."

19 Labani ampwagila, "Mbanga nugupekiya Laeli wehapa kuliku kuntoo mundu jongi jokapi. Endaliya kutama nanepani kwa yaka saba heji." 20 Ndienu, Yakobu antumakiya Labani yaka saba ndaba jaka Laeli, lakini yaka yeheyi ngasejuibweni hingi kwa ndaba ampai ngani Laeli.

21 Ndipala Yakobu ampwagila Labani, "Yaka saba yegumbeki jijomwiki, henu mbekiya nhwanu wango." 22 Ndienu Labani jaandia tipati na kwaakoka bandu boti ba hoku. 23 Lakini pakamii, Labani anzukua Lea, kamwali waki nkolongu, nukumpeleka kwaka Yakobu, Yakobu jatenda kugone naku. 24 Labani ampia Zilipa ntumisi waki jubia ntumisi waka Lea. 25 Pulukela, Yakobu pajajumuka jasangia kummbona Lea! Yakobu jajenda kwaka Labani nukumpwagi, "Gunhengi majambu bole? Mbona gutei kungonga? Nugutumaki yaka saba ndaba jaka Laeli, mbona gumbeki Lea?"

26 Labani anzibua, "Ngasetuyobali kuhenga hela munndema witu, nga miilu jitu kuntogulesa kamwali nsoku kabula jaka kamwali nkolongo. 27 Nzomulakiya Lea masoba gaki saba, natwe twagupekiya Laeli ku utumisi waku wa yaka saba jengi."

28 Yakobu jajetaki, na Yakobu pajwajomula masoba saba baada jukunzuku Lea, Labani anzetakiya Laeli kamwali waki nsoku jubiya nhwanu waki. 29 Labani amboa Biliha ntumisi waki jubiya ntumisi waka Laeli. 30 Ndienu Yakobu jagonila na Laeli kabee. Lakini Yakobu ampai Laeli kuliku Lea antumakiya Labani yaka saba yengi.

31 Bambu Sapanga pajabona Lea atenda kunsuki, ampekiya bana na Laeli jabiya ngasejubeleka. 32 Lea japata kitumbu, jabeleka mwana mwanalomi, ankema Leubeni japwaaga, "Bambu Sapanga jagabweni mang`aliku gangu, henu manyiki nndomi wangu mbaka jumbali." 33 Lea japata kitumbu kabeti, jabelika mwana mwanalomi kabee, ankema Simoni, japwaaga, "Bambu Sapanga jumbeki mwana jongi mwanalomi ndaba jujoini." 34 Japata kitumbu kabee, jabelika mwana mwanalomi, ankema Lawi, japwaaga, "Kipindi senze nndomi wangu ngiti jujongana nanepani, ndaba nummbelaki bana atatu akanalomi." 35 Lea japata kitumbu kabee, jabelika mwana mwanalomi ankema Yuda, japwaaga, "Sapwali jenu nundumbalii Sapanga." Ndipala Lea jakotuka kubeleka kabee.