1 Kipindi sehesi, Yuda jatama kutali na alongu baki, jajenda kutama na mundu jumu Mwadulami liina laki Hila. 2 Pajabii hoku, Yuda ammbona kamwali joankema Shua Mkanani jatenda kunzukuu kuba nhwanuwaki. 3 Kamwali Shua japata kitumbu jabelika mwana mwanalomi, Yuda ankema Eli. 4 Japata kabee kitumbu sengi, jabelika mwana mwanalomi, ankema Onani. 5 Ndipala japata kitumbu sengi japata mwana mwanalomi, ankema Shela. Kipindi Shela pajabelikika, Yuda jabiya ku Kezibu.

6 Mwenikatai Yuda anzukua mwana waki ju utumbulii oti Eili, ku mmbomba jobunkema Tamali. 7 Lakini Eili jojutumbuli kubelakeka kwaka Yuda, jabiya mbaja palongi ja Bambu Sapanga henu Bambu Sapanga jatenda kunkoma. 8 Ndienu, Yuda ampwagila Onani, "Nnzukua nhwanu ukunndongu waku jojuwii, ndi ekupalika kuhenga ili kuwesa kumbelake nndongu waku bana." 9 Lakini Onani jamanyiki ana bana be haba ngabakabii bake. Henu, pajagonila nu nhwanu ukunndongu waki, japikia pai imbeju yu kubeleka jihika kumpeke nndongu waki mwana. 10 Lihengu leheli lunhumisa Bambu Sapanga, ankoma Onani kabeti. 11 Ndienu Yuda ampwagila Tamali, nhwanu waka mwana waki, "Kelubuka kunyumba kwa atati baku, wakahigali gummbomba joawii alomi mbaka mwanawa Shela ejikola." Yuda jahola najombi Shela jiikakuuwa ngati alongu baki. Ndienu, Tamali jabuja kunyumba ja atati baki.

12 Ndienu kamwali Shua nhwanu waka Yuda, jatenda kuwa. Yuda pajajomula kujanu matanga jaboka nu nkosi waki Hila Mwadulami, bajenda ku Timuna kwa baaseku mangoma ga makondoo. 13 Tamali pajajoa kubanga atati baki na akowanu baki abii mwiindela kujenda ku Timuna kuseku mangoma ga makondoo gaki, 14 jahula ingobu yaki yu kuwelee alomi nu kuliyeka shela ndipala nukutama pu nndyangu ukujingalii ku Enaimu, kijiji sesabii mwiindela kujenda ku Timuna. Jahenga hela ndaba jabona Shela jubii mwanahota, lakini jombi Tamali ngasebunzetakiya kunzukuu Tamali.

15 Ndienu, Yuda eankolila Tamali papuje, anholaliya ndi mmbomba nselati, ndaba jabiya jiliyekali pamihu. 16 Papuje bila kumanya ana kumbi jwabii nhwanu uka mwanamundu, anzendila puunkegi ji indela, ampwagila, "Mbai kugone nawehapa."

Tamali anndalukiya, "Wiimbekiya kyane ananugujetakali?"

17 Yuda jajibua, "Nagupekiya katoli ki imbui kuhuma mu likundi lango." Tamali ampwagila, "Beka poni kuhingamaki wiinetila imbui heji."

18 Yuda anndalukiya, "Gupala nugupekiya kii ngati pone?" Najombi jajibua, "Mbekiya peti jejibii na nembu heji nu lugoji lwaki pamu na ndonga jegukamwi." Ndienu, Yuda ampekiya hindu yoti yejipala, nukugone naku. Tamali japata kitumbu saki. 19 Ndienu Tamali jabuja kunyumba jahula shela jela jejiyekiki nukuwata kabee ingobu yaki yukundelele nndomi.

20 Kipindi paantuma nkosimundu jola, Mwadulami ampelakiya mmbomba jola katoli ili ankelabukiya hindu ya poni yeandeki, Hila ngaseampataje. 21 Hila jaalalukiya benei buku Enaimu, "Jubii kwaa mmbomba nselati jola jojabii pambipi ni indela jenzeno?"

"Pani ngasejuwaiki kuba mmbomba nselati."

22 Ndienu nkosi waki hoju jakelabuka kabee kwaka Yuda, "Ngasenumpatiki, kabee akambomba ba konioku ambwagi ngaseawaiki kummbona mmbomba nselati jokapi hoku."

23 Yuda jaapwaaga, "Nndeka jujukua hindu heye, ananga hela jatuhenga atulonga. Wehapa wamweti gubweni numpelakiya litoli. Lakini wehapa ngaseumpatiki."

24 Ejapeta miei mitatu, Yuda bumpwagila, "Tamali nhwanu waka mwanamundu jubii nselati kabee jupatiki kitumbu kukuhenga uselati."

Ndienu, Yuda andagalakiya, "Mumpia kunza bunzosa mwotu."

25 Pababia bumpia kunza, Tamali antuma ntenga kwa akoanu baki kwaapwagi, "Jojubii na hindu yenze ndi jojumbeki kitumbu. Henu nuguloba gumanya jwana peti jenze nu lugoji lwaki londo na ndonga jenze."

26 Yuda jiimanyiki hindu ye heyi, japwaaga, "Tamali ndi jwaamboni kuliku nepani. Sakaka ndaba ngasenuntoi kwaka mwana wangu Shela." Tumbuka lisoba leheli Yuda ngasejagonila kabee na Tamali.

27 Kipindi sukubeleka Tamali pawahikila kwamanyikana jabii ni kitumbuu sa mapaa. 28 Ndienu pajapata ubini ukubeleka mwana jumu japiiki kuboku kunza, najombi nkunga ankonga kwa usi nkeli, nukupwaaga, "Hajo ndi jojusaliwi ju kutumbuli." 29 Lakini mwana hoju pajakelubua kuboku kwaki nkati nndongu waki jasaliwa ju utumbuli. Jojulamisa jola jaapwaaga, "Mbona wehapa gupetiki kwa makile?" Henu ankema Pelesi. 30 Mwenikatai jasaliwa nndongu waki jola na usi nkeli mu kuboku najombi ankema Zela.