1 Ndienu, Bambu Sapanga ampwagila Abulamu, "Boka mu nndema jaku, waleka akalongu baku ba nyumba ja atati baku gujenda ku musi gonukulangiya. 2 Naguhenga wehapa kuba na bandu bingi, nagupengila nu kulihenga liina laku limanyikana ngani, nanagu wibiya waapenge bandu. 3 Jojugupenge, niitenda kumpenge,

jojugulapi yambamba nanepani nitenda kunndapi yambamba.

Nukupete wehapa bandu boti punndema biitenda kupengalewa."

4 Henu, Abulamu jaboka ngati Bambu Sapanga eandagalakiya, Lutu jajenda naku pamu. Abulamu jabiya na yaka sabini nu nhwanu pajaboka ku Halani. 5 Anzukua Salai nhwanamundu, Lutu mwana uku nndongu waki, pamu na mali gabu goti na bandu boti bababii baapatiki ku Halani, baboka bajendaninya kunndema uku Kanani.

Na bahika ku Kanani. 6 Abulamu japeta pikilanda ju nndema mbaka ku Shekemu, pandu pa sapi, pagubii nkongu gwa mwaloni gwaka Mole. Kipindi se hesi Akanani babiya ndi benei ba nndema we hogu. 7 Ndi Bambu Sapanga ampitila Abulamu, ampwagila, "Nndema gongo naipekiya ibeleku yaku." Ndienu, Abulamu ansengila mesa ja malibu jukupiki litambiku ndaba jaka Bambu Sapanga joampitila. 8 Mwenikatai Abulamu jaboka nukujenda ku nndema wi itombi yu upandi golipiti lyoba guku Beseli jabeka lihema laki, jatama pikilanda ja musi uku Beseli na musi uku Ai. Papuje kabee ansengila Bambu Sapanga mesa ja malibu jukupiki litambiku nu kunndoba Sapanga. 9 Ndipala Abulamu jaendaliya kujenda upandi uku Negebu.

10 Kipindi sehesi, inzala japitila ku nndema uku Kanani. Inzala jeheji jabiya ingali, henu Abulamu japalika kujenda ku Misili kutama hoku ku kipindi pena. 11 Abulamu pajahegaliya kuhika ku Misili ampwagila nhwanamundu Salai, "Manyiki wehapa gummbomba wogunyambiki ngani. 12 Amisili ebukugubona bakapwaaga, ‘Jonzo ndi nhwanamundu.’ Ndienu biitenda kungoma ila weapa baaguleka wa mwomi. 13 Henu wehapa, gupepakoku wakapwagila kubanga wehapa gunndombu wango ili bakandendila gaamboni na bakaneka bila kungoma kwa ndaba jaku." 14 Abulamu pajwahika ku Misili, benei ba hoku ambona Salai kuba ndi mmbomba jojunyambiki ngamaa. 15 Atumisi baka Falau eammbona Salai, bumpwagila Falau namuna Sala ejunyambiki. Ndienu anzukua Salai ampelika ku nyumba jaka Bambu nkolongu Falau. 16 Ndienu ndaba jaka Salai, Falau ampekiya Abulamu nhupi ya, makondoo na ng`ombi na maponda likambaku na atumisi akanalomi na aka kambomba ni liponda lu nkolu ni kinyama sebikikema ngamia.

17 Lakini Bambu Sapanga andapula Falau ku ugonzu nkolongu jombi na bandu bababii mu nyumba jaki ndaba ju kunzukuu Salai nhwanu waka Abulamu. 18 Falau ankema Abulamu anndalukiya, "Boo, ndaba jakii guhengi hela? Ndaba ja kii ngasewambwagi Salai ndi nhwanu wako? 19 Boo, ndaba jaki wapwaaga nndombu waku mbaka nunzukua na kuba nhwanu wango? Ndienu, nhwanu waku ajoo nzukua nzendaninyaje!" 20 Ndienu Falau jaalagalakiya bandu baki, nabombi bunhindakiya Abulamu ili juboka ku Misili koni jubii nu nhwanamundu na mali gaki goti.