18 Ndienu, Bambu Sapanga japwaaga, "Nga sapi mwanalomi hoju kuba kajika jaki. Nandenganakiya mundu jukunzangatii jojilengana naku." 19 Henu, kuhuma mu luhombi Bambu Sapanga jabiya jwiilenganaki inyama imwikioli na kila ijuni yu kunani, andetila Adamu julinga juipekiya mahina na mahina gajwaipekiya iumbi ye heyi gabiya ndi mahina gabu. 20 Ndienu, Adamu jiipekiya mahina inyama yoti yeipugwa, ni inyama yoti imwikioli ni ijuni yoti yu kunani. Lakini kati ji inyama hei ni ijuni yoti ngasejabona sukunzangati.
21 Ndienu, Bambu Sapanga anhenga mwanalomi we hoju jubiya nu lugonu lwingi, na pajabiya mu lugonu, jajukua luteta lwaki lumu nukuyekale pandu pala kwi inyama. 22 Bambu Sapanga anndenganakiya mmbomba sukutumii luteta gojahuma naku kwaka mwanaloni jola, ndienu ampelika kwaka mwanalomi we hoju. 23 Ndienu, Adamu japwaaga,
"Ooho! Jonzo ndi lihupa kuhuma mu mahupa gango,
ni inyama kuhuma mwiinyama jango.
Jonioju ngiti nunkema ‘Mbomba,’
ndaba juhumiki mu yega jaka mwanalomi." 24 Kwa ndaba heji, mwanalomi jaaleka ahengo na anyongo baki, najombi jwiijongana nu mmbomba, nabombi bibiya yega jimu.
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)