Gênesis 6

Mahakau ga bandu

1 Bandu ebajonzukika nu kuenee punndema nu kubeleka aka kamwali, 2 bana akakombu baka Sapanga bangi baabona aka kamwali ba bandu atei kunyamba, baajukua ba baapai na kuba aka ahanu babu. 3 Hapa ndi Bambu Sapanga japwaaga, "Mbomu jangu ngajiitami nkati jaka mundu masoba goa ganga na mwisu, ndaba jombi ndi wa kuwa pena. Kutumbuli sajenu nu kuendalee ngabiitami kupeta yaka mia jimu ni ishilini." 4 Mumasoba ge haga hata ga monikatai, kwabii ni mimundu gagabiya gatama pani punndema. Mamundu gehaga bagakemika Anepili babii kibeleku sa bana akanalomi baka Sapanga na akakamwali babelikwi na bandu. Haba ndi bandu bababii baawesa ngondu na baabii nu ulumbi kipindi se hesi.

5 Bambu Sapanga pajabona bandu ahenga mahakau gingi ngani pani punndema, na kila sejuholale mundu mmwoju jaki ndi mahakau masoba goti, 6 Bambu Sapanga jasikatiki ngamaa, ndaba jukummbomba mundu. Bambu Sapanga jugubona usungu mmwoju jaki, 7 henu, japwaaga, "Namputa nzwe punndema mundu jo nu mmbombiki, nambengila kutali kabee naaputa nzwe inyama ya mwikioli ni iumbi yeikwaba ni ijuni yu kunani. Nhyomiki ndaba naabomba punndema." 8 Lakini Noa, japatiki upali nkolongu palongi jaka Bambu Sapanga.

Noa

9 Ganga majambu gaguhusu Noa jojabii jojujetakeka kajika jaki palongi jaka Sapanga na jojuwe ngasejabii na lawama ipindi yake. Jabii jutama sukunndengane Sapanga.