Kitabo chu Kubhoka 2

Kubhelukwa kwa Mucha

1 Peniya pakibha na munalome jwa likabila lya Lawe na jwenio ngantole mwikeghe jhumo jwa likabila lya Lawe, 2 na mwikeghe jwenio ngapatita ndumbo na kupapa mwana munalome. Palola kubhehe king’enya jhuna kuhalala, yene ngakiita nkate kwa miyehe mitato. 3 Nambo pamanyita anhoto ng’o kunhiya kabhele, bhahe, ngatenganicha kitandabhala kamatete, ngakilima lange jha lame. Mwenio ngakibheka king’enya chela na kukinhiya na mu matete muupele jha lukemba Naile. 4 Nnombo jwa mwana jhonio ngajhobha pahina na lukemba lweno kupala kulola chikipa kumpitii mwana jhono.

5 Yene, kamwale jwa Falao ngahelela ku lukemba kujhogha na akatumiche bhake, ngabhatyanga tyanga muupele mu lukemba. Kamwale jwa Falao ngakibhona kitandabhala chela panakate jha matete, ajhakuntuma ntumiche gwake akakitole. 6 Payekwila, ngamwena mwana king’enya chela kilela, ngammonila kiya, ngalongila, "Chenje ndi king’enya pakate jha Akaebulaniya."

7 Papa ngapitila nnombo jwa mwana jhola, ngannobholela kamwale jhola, "Bho, nyende nikampalaye yaya jwakunnela mwana jhonjo pakate jha akakeghe bha Akaebulaniya?"

8 Kamwale jwa Falao nganyangwila, "Hena kanetela." Peniya nchikana jhola ngajhawila nganetita majhe jwa mwana. 9 Yene, kamwale gwa Falao ngannobholela majhe jhola, "Munnele mwana jhone, nenga nanipela malepo ghino." Yene, majhe jhola ngantoila mwana na kunnela. 10 Mwana pakolita, majhe mundo ajhakumpeleka kwa kamwale gwa Falao, na jwene ngantoila na kuntenda mwana mundo. Ankemita liina lya Mucha, ngalongila "Ninhohwi umache."