1 Di obe onwii kamɛ Yetro, Midian batii oletatɛ wɔ niale ni Mose ɔlɔ lanu lɛsaa biala le di Yaa labla aata ni Mose ku Israel batii nɔɔ, ku mmle okle di SAATE nwu lakpaa ma aadieko ni di Egipte.

2 Mose lakplesa ɔsɔfɔ nɔɔ Sipora aakyesee ɔlɔ nɔɔ, Yetro lafũ nwɔ 3 ku babisuɔtɔbi nɔɔ banyɔ. Ɔkasale leyooto niale Gersom. Diekye Mose labuɛ alɛ, "Ntookple ɔfɔɔ di bafɔɔ kasɔ"; 4 ɔnyɔɔfa kafɔɔ leyooto niale Eliesa. Diekye aabuɛ alɛ, "Teemi Yaa niale mi kyakaakotɛ; diekye aadiki mi aakyeko Farao kapamii kanya."

5 Ninfɛ di Yetro, Mose ɔlɔ nɔɔ ku Mose ɔsɔfɔ ku babisuɔtɔbi nɔɔ lakyɛ Mose nfũ di ɔfaafuu di nfũ baasi ni di Yaa kobokote nwu ɔlɔɔkɔ nɛ. 6 Ninfɛ di Yetro lakyesee nwɔ kanya alɛ, "Ami Yetro ɔlɔ lɛfɔ, kɔwa ɔkyɛ lɛfɔ ku ɔsɔfɔ lɛfɔ ku babisuɔtɔbi lɛfɔ nwu banyɔ."

7 Nioso Mose ladie aakyɛ aalakyakako ɔlɔ nɔɔ, ni aawakasɔ aatɔɔ, ni aafĩfiɔ nwɔ akpoo nɛ, ni baasɛɛsa bawo, baasifi lɛkpaayo nɔɔ kamɛ nɛ. 8 Ninfɛ di Mose laka ɔlɔ nɔɔ lɛsaa biala le di SAATE nwu labla ni Farao ku Egipte batii ta Israel oso, ku dibuo le baanya ni di osuku ku mmle di SAATE nwu ladiki ma nii.

9 Suoto layɔɔ Yetro di asaa biene ya di SAATE nwu labla aata ni Israel batii aadiki ma aakyeko ni Egipte batii nnɛɛ kamɛ. 10 Yetro labuɛ alɛ, "Baatansa SAATE wɔ niadiki ye aakyeko ni Egipte batii ku Farao kɔnɛɛ kamɛ. Nwaako, eediki Israel eekyeko Egipte kɔnɛɛ siene kamɛ. 11 Mia nfɛ ntootofo nlɛ SAATE nwu lemuɔ alenke afiɔ ya amuu ninkpe ni nɛ. Diekye ɛɛbla nle mmle di batii ba niatakatɛsa ni suoto katoo di Israel batii suoto." 12 Ninfɛ di Yetro, Mose ɔlɔ nɔɔ layɔ ofiɛ asaaɔta ku oleɔta bamba aata Yaa nɛ. Ni di Aron ku Israel banɔɔfotii bamuu lawa baabale alesaa ku Mose ɔlɔ nɔɔ di Yaa anu nɛ.

13 Kaleesɛ Mose lasiɛ di lekpomii nɔɔ suoto alɛ ololaa sɛlaa se niasiɛ ni baatii nwu ntɛɛ. Ni di batii nwu layila di Mose anu diayɔ di olesɛ dialaase di kɔtɔɔfɔ nɛ. 14 Obe wɔ di ɔlɔ nɔɔ lanya lɛsaa biala le di Mose labla aata ni batii nwu nkpo, ni akaalɛ alɛ, "Belɛsaa fɔɔbla batii ba mmle nwu nkpo nɛ? Be lɛsaa oso di lete lɛfɔ fasi kaasɔ foololaa batii ba mmle ntɛɛ, di bamuu lɛma bayɛ fɔ di anu diɛyɔ ni di olesɛ diɛbase bia kɔtɔɔfɔ?"

15 Ninfɛ di Mose ladiki kanya alɛ, "Diekye batii nwu ninwa ɔkyɛ nii alɛ boowolaa Yaa dibiesaa. 16 Nse bɛɛwɛ ɔlaa, man-yɔ manwakoe, mbuo nwu kaamɛ nta batii nwu banyɔ, ntɔkɔ ma Yaa dibiesaa ku kufiofa."

17 Ninfɛ di Mose ɔlɔ nɔɔ latɔkɔ nwɔ alɛ, "Lɛsaale fɔɔbla ni diɛlɛ. 18 Minko batii ba mmle dibuo ko biɔta suoto. Diekye ɔkpɛ nwu nkpo lesii fɔ; lete lɛfɔ flabafuo nwu ɔbla. 19 Kyɔɔ mi atoko ninkyakaako fɔ ku disibu lewo, di Yaa asiɛko fɔ. Afɔ yi, faayila di Yaa anu di batii nwu kanya faayɔ sɛlaa lɛma fatɔɔtɛ di anu nɔɔ. 20 Tuo ma Yaa dibiesaa ku kufiofa, faatuo ma mmle okle baasiɛ ni nkpa ku sɛkpɛ se dikpeni bɛɛbla ni. 21 Kafɔɔ faadiki basuɔtɔ ba niesiɛko ni di batii nwu bamuu kamɛ, manyɛkɛ ni Yaa, bale ni banukwaletɛ, banaa ni koto onumbɛbɛɛ. Faayɔ ma fase banyayilatɛ. Bawo di batii kakpe kanya, bawo di kɔlafa kanya, bawo di afosi-anɔɔ kanya, bawo kafɔɔ di lefosi kanya. 22 Faata ma basiɛ obe lele batoololaa sɛlaa pitipiti se nikobuo ni di batii nwu ntɛɛ. Kafɔɔ faata ma bayɔ sɛlaa siene nsĩ bawakofɔ; nse ninnaa ni osie baablako sĩ ɔkpɛ mma bamu. Nni nkpo mata atoo nteketefɔ di suoto, diekye babakyakaako fɔ fantuka nya. 23 Nse fɛɛbla nkpo, fɛ mmle di Yaa kokpee fɔ ni kufiofa yi, ni fabanya falɛ dibuo dilɔbasintika fɔ di suoto. Ni batii nwu bamuu kafɔɔ kamasifi ayo ku suoto lɛyɔɔ."

24 Mose kafɔɔ lanu ɔlɔ nɔɔ sele, aabla lɛsaa biala fɛ mmle okle aatɔkɔ nwɔ nii. 25 Aadiki basuɔtɔ ba niasiɛko nii di Israel batii bamuu kamɛ, ni aabla ma banyayilatɛ di batii nwu suoto nɛ. Aayɔ ma aase di batii kakpe, kɔlafa, afosi anɔɔ ku lefosi kanya nɛ. 26 Baabla ɔkpɛ fɛ batii ntɛɛ balolaatɛ obe lele. Sɛlaa siene lete baayɔ baatɔɔkyɛnko Mose, kafɔɔ nse ninnaa ni osie nsĩ, baatɔɔblakosĩ ɔkpɛ mma bamu.

27 Di nni nkpo sɛmaa, ninfɛ di Mose ladiki ɔlɔ nɔɔ osuku, ni di Yetro lakple aasifi okpoo nɔɔ nɛ.