1 "Nse osuɔtɔ lesĩ ɔsɔfɔ nɔɔ

di ɔsanko nwu lediɛ nwɔ ɛɛlaayɔ osuɔtɔ bamba,

ni osuɔtɔ nwu kakple ansifi ɔsanko nwu ɔkyɛ?

Diele kasɔ nwu bɔɔtɛ bɛɛlalaasa nɛ?

Kafɔɔ fatoosiɛ nkpa fɛ sɔnɔkpeetɛ ku basɔnɔ kpinwu-

nunua fabapɛfankple fanwa ɔkyɛ nii?"

SAATE nwu niebuɛ.

2 "Takatɛsa anu faanyu abokote ya niekpi ni.

Lɛba lewo nkpe manaditenko fɔ ni?

Fansiɛ di osuku kotoko fansoko basɔnɔ lɛfɔ,

fansiɛ fɛle otii wɔ nikokyikyii ni di ɔfaafuu kamɛ.

Fatɔɔlalaasa kasɔ nwu

ku lɛsɔnɔkpee ku sikpile ole lɛfɔ.

3 Nioso kanto dilosin-wiwii,

kabiene kanto kafɔɔ diinɔɔ.

Kafɔɔ anu lɛfɔ nte fɛle sɔnɔkpeetɛ ale;

sinunsɔ dilosinkpɛ fɔ.

4 Diele kanunua nwu fɛɛlɛɛ mi falɛ:

‘Teete nii, siɛwo nii diayɔ ni di sibisɔ nii obe kamɛ,

5 fabanya ɔblɔ obe lele?

Fabaklee oklee ɔblɔ yakayaka lɛfɔ nwu dinaa ni kaloo?’

Nkpo kanya fankakatɛ nɛ,

kafɔɔ fambla okpile biala faafuo nii."

6 Di Ɔka Yosia sɛka olebee kamɛ yi, SAATE nwu latɔkɔ mi alɛ, "Fatɔɔnya lɛsaa le di Israel onukwale ɔtanle lɛbla ni? Atɔɔkata ɛɛkyɛ kobokote takale biala osi ku kowoso biala niefukuti ni kalɔ ɛɛlaakpee asɔnɔ ninfa. 7 Lanyu nlɛ n-se atɔɔbla n-ya mmle amuu eeloo sɛmaa yi, abapɛankple an-wa ɔnkyɛ nii, kafɔɔ atakple aawa. Onukwale ɔtanle obilɛma-sankobi Yuda kafɔɔ lanya ni. 8 Lata Israel wɔ ninaa ni onukwale kusinkũ nɔɔ, latososa nwɔ aasifi, ta lɛsɔnɔkpee nɔɔ nimuu oso. Lanya kafɔɔ nlɛ lɛyɛkɛ kuninwii diesi di onukwale ɔtanle obilɛma-sankobi Yuda kamɛ; nnwɔɔ kafɔɔ aadie aakyɛ aalaakpee asɔnɔ. 9 Ta lɛsaa biibii di Israel lɛsɔnɔkpee lale diatɔɔ ni oso yi, aakpɔnɔfɔsa kasɔ nwu, aalaasumu afuɔ ku awoso. 10 Di n-ya mmle amuu sɛmaa yi, onwukwale ɔtanle obilɛma-sankobi Yuda ditapɛaakple aawa ɔkyɛ nii ku otu nɔɔ omuu, kafɔɔ okũ ko aakũ aabla nkpo," SAATE nwu niebuɛ.

11 Ni di SAATE nwu latɔkɔ mi alɛ, "Israel wɔ ninaa ni onukwale lɛbla tinini alenke Yuda onukwale ɔtanle. 12 Tɔɔkyɛ faalaayie ɔlaa wɔ mmle lɛkya di katookasɔ lɛkyɛ falɛ:

"‘Israel wɔ ninaa ni onukwale, pɛfakple fawa,’ SAATE nwu niebuɛ,

‘Namasinnya ɔblɔ di suoto lɛfɔ,

diekye nyaami-nyatɛ nle,’ SAATE nwu niebuɛ,

‘Namanya ɔblɔ dinaa ni kaloo.

13 Fũ lɛpɔɔ lɛfɔ okpi fakpee-

fɛɛbla otokopĩ di SAATE Yaa lɛfɔ suoto,

feediɛ suoto lɛfɔ fɛɛta bafɔɔ bayaa

di kowoso biala niefukuti ni kalɔ,

ni feesĩ mi kotoko ɔkyɔɔ nɛ,’"

SAATE nwu niebuɛ.

14 SAATE nwu lebuɛ alɛ, "Batii ba ninaa ni onukwale bipɛbikple biwa, diekye ɔsa lee nle. Kamadiki ye- onwii nkyeko okpoo, banyɔ kafɔɔ nkyeko kafaabi- ninkpaa ye n-wako Sion. 15 N-se ntɔɔta ye batunletɛ ba niekye ni otu nii omu kamɛ, mba nimaleko ye ni katũ ku lɛsaatofo ku lɛsɔnu. 16 Di obe nwu nkpo kamɛ, nse bitɔɔpɔ biɛkpɛ di lɛpɔ kamɛ nwaa di kasɔ nwu suoto," SAATE nwu niebuɛ alɛ, "batii dilɔbasimbuɛ alɛ, ‘SAATE nwu kanya ninii lɛlakaa nwu.’ Dilɔbawa di asibu lɛma kamɛ ee banyuma ni diidii; dilɔbayu ee babla lɛbamba. 17 Di obe nwu kamɛ babalɛɛ Yerusalem alɛ SAATE nwu Lɛkakpomii, nnle nwu mmuu kafɔɔ kamasi di Yerusalem manta SAATE nwu leyooto dibu. Blɔbasintikanko situ lɛma onunsie akpilesaa nwu. 18 Di ayi nwu nkpo kamɛ yi, Yuda leyo kamakyakaa di Israel leyo suoto, mansi mandie di kasɔ nwu di katookasɔ suoto mansifi kasɔ ka lata ni bawa lee fɛ atesaa suoto.

19 "Ami omu niabuɛ nlɛ,

"‘Kamaklee fɔ suoto lɛyɔɔ kanya fɛle babisuɔtɔbi nii,

nta ye kafɔɔ kasɔ ka ninlɛ ni nwaa,

atesaa ya niɛtɛ alɛ alenke ni di kale lele ale suoto.’

Lanyu nlɛ fabalɛɛ mi falɛ, ‘Teete’

alɛ flaamunikĩi fasifi fadiɛ mi otikanko.

20 Kafɔɔ fɛle ɔsanko wɔ ninanle ni onukwale ata ni ɔsa nɔɔ,

Oo Israel leyo, nkpo fananle onukwale fatɛɛ nɛ,"

SAATE nwu niebuɛ.

21 Boonu kaku di abokote ya niekpi ni osi,

Israel batii kaku owi ku lekoto otikiti,

diekye batɔɔkyɛlɛnsa ni sisuku lɛma

beeyee ni kafɔɔ SAATE Yaa lɛma.

22 "Batii ba ninaa ni onukwale, bipɛbikple biwa;

kamabla ye onukwale ɔtanle nwu kɔfa."

"Nwaako, bubawa fɔ ɔkyɛ,

diekye afɔ ninle SAATE Yaa loo.

23 Nwaako, afiɔ kasumu nwu di akpenkpe

ku abokote nwu suoto nle kakyɔnkyɔ;

nwaako, di SAATE Yaa loo kamɛ

di Israel didiki nsi.

24 Diayɔ ni di sibisɔ loo obe kamɛ di sinunsɔ afiɔ lalalaasa

bawa loo ɔkpɛ ɔbla lɛsaawɛ-

babɔkɛɛ sele ku banankyue lɛma,

babisuɔtɔbi ku babisankobi lɛma.

25 Bita buklɛbute di sinunsɔ loo kamɛ,

biɛta anunsɔsaa loo atĩi wo suoto.

Buɔbla okpile di SAATE Yaa loo suoto,

akyuu loo anyɔ, awo ku bawa loo;

diayɔ ni di sibisɔ loo diɛbadu ni miɛ dii le mmle,

butakyɔɔ SAATE Yaa loo ɔlaa kotoko."