1 "Benyamin batii, bitoso biefũ suoto lee nkpa!

Bitoso bidie di Yerusalem!

Bifɛ dikyukyoo di Tekoa!

Bise flankaa di Bet Hakerem!

Diekye ɔlaa kpile kodie di katookasɔ kunwa,

kubale bia kawɔɔ siene.

2 Kamawɔɔsa Sion obisankobi nwu

niatɛ aalɛ ni sekpeele baakpee ni sibi.

3 Bafosobakpatɛ ku bafoso lɛma kamataka nwɔ di suoto;

babase akpanta lɛma mankyisa nwɔ,

obiala lɛma kamawee sɛfa di lɛba nɔɔ nimu."

4 "Bilolaa suoto biɛtaka kakpɛ di suoto nɔɔ!

Bitaka, biɛta budieko nwɔ ku kakũ!

Kafɔɔ, buyɔɔsa, kayi nfɛ kɔwakasɔ,

kale kamaloo nunua.

5 Nioso bitaka, biɛta budieko nwɔ ku kakyɛ,

buobibiɛ lɛkayo nɔɔ!"

6 Nnya ɔlaa wɔ di SAATE wɔ Ninlenke ni kobuɛ ni alɛ:

"Bibudi awoso nwu bɛtɛ kaasɔ

biete kala di Yerusalem suoto.

Dikpeni bɛɛnanfi okpoo kplɛ wɔ mmle kootoko;

batii onyinka leyii nwu kamɛ pɔ.

7 Fɛ mmle di ditubiɔ ntɔɔta ni ntu yi,

nkpo di nnwɔɔ kafɔɔ antɔɔbla amumu nɛ.

Kudú okpee ku kasaalalaasa nkpe di Yerusalem;

sifiɛ nɔɔ ku nkɔ nɔɔ nte di anu nii obe lele.

8 Oo Yerusalem, lolaa fanyu nwaa,

nse diele nkpo kamakyɛ ndiɛ fɔ

ninta kasɔ lɛfɔ kafɔɔ nte kafukuti

di otii kuonwii dilaafuo ni osie ninka suoto."

9 Nnya Ɔlaa wɔ di SAATE wɔ Ninlenke ni kobuɛ ni alɛ:

"Ta ma basiisa batii ba niebu ni

fɛ nta lewosobi nwaa;

kple fanyinka kɔnɛɛ lɛfɔ di sɛla nɔɔ suoto,

fɛle mmle di otii nsiisa ni awosobi."

10 Owe kafuo ɔkakatɛ ɔta, nsĩ ɔlaa nta?

Owe nimakyɔɔ mi atoko?

Atoko lɛma letĩi

nioso blɔbafuo onu.

SAATE nwu ɔlaa nle dikpilesaa kuɔta ma;

suoto ninn-yɔɔ ma ninwu suoto.

11 Nioso SAATE nwu ɔblɔ leyii mi kamɛ,

namasinfuo otu okpee.

"Soosa ɔblɔ nwu di babisɔ ba di lɛkpaka suoto

ku bakosopo ba niesi ni dikudi suoto;

kubadieko ɔsa ku ɔsɔfɔ, akyuu nwu anyɔ ninwu kamɛ,

ku banɔɔfo ba nintoobe bɛɛkyɛ ni sitũ di alɛɛ kamɛ.

12 Babayɔ ayo lɛma manta batii bamba,

di afe lɛma ku basɔfɔ lɛma nkyakaa nii,

nse lɛnanfi kɔnɛɛ nii

di mba ninsi ni di kasɔ nwu suoto,"

SAATE nwu niebuɛ.

13 "Diɛyɔ ni di obisɔ diɛlaadu ni ɔnɔɔfo,

bamuu lɛsɛɛsa anu di lɛsaawɛ suoto;

ɔlaababuɛtɛtɛ ku olebatatɛ nkyakaa,

bamuu nlaa sɛlaa ku afunu.

14 Mankaasa batii nii nkɔ

fɛ ninu diɛsɛɛ ma.

Mambuɛ alɛ, ‘Atoko ɔkyɛ ole, atoko ɔkyɛ ole,’

di obe wɔ di atoko ɔkyɛ ole nnaa nii.

15 Sinunsɔ kɔkpɛ ma di ayududusa ya bɛɛbla ni oso?

Oowo, sinunsɔ dilɔkpɛ ma saa;

baaye bia mmle manunsɔ nii.

Nioso babanɔɔ di banɔɔtɛ kamɛ;

babawakosa ma kasɔ nse lɛnanfi ma kootoko,"

SAATE nwu niebuɛ.

16 Nnya ɔlaa wɔ di SAATE nwu kobuɛ ni alɛ:

"Biyila di esuku nkyakakɔ bienyu;

bikaalɛ saa bakofo nkpaa sisuku nwu,

bikaalɛ nfũ di osuku biene nkpe ni, biɛkyɛ ninwu suoto,

ni bibawɛ ɔnyɛɛ katɛkɔ minta sɛkla lee.

Kafɔɔ biabuɛ bilɛ, ‘Bulɔbakyɛ ninwu suoto.’

17 Ladiki banyuntɛ di suoto lee labuɛ nlɛ,

‘Bikyɔɔ dikyukyoo nwu sɛlɔ atoko!’

kafɔɔ biabuɛ bilɛ, ‘Bulɔbakyɔɔ atoko.’

18 Oo nnle, nkpo oso binu;

Oo kamaabayilatɛ, bitofo

lɛsaa le nimawa ni di suoto lɛma.

19 Oo kasɔ, kyɔɔ atoko faanu:

kɔwako ɔlaa kpile di batii ba mmle suoto,

di abi kamatika ni di ɔsaabla lɛma nwu suoto,

diekye batakyɔɔ sɛlaa nii atoko

baasĩ kafɔɔ kufiofa nii.

20 Obe kamɛ dikpe mi di olufui wɔ niekye ni Saba

ee akɔnɔkɔnɔsaa ya niekye ni kasɔ kyonle suoto?

Ninnfũ ofiɛ asaaɔta lee;

seleɔta lee kafɔɔ nimbuo mi anu."

21 Nkpo oso nnya ɔlaa wɔ di SAATE nwu kobuɛ ni alɛ:

"Kamatɛ osuku atĩisaa di batii ba mmle anu.

Babibate ku babi bamuu kamatuula ninya suoto;

basiɛwo ku mba ninsi bakaako ma ni kamakpi."

22 Nkpo oso nnya ɔlaa wɔ di SAATE nwu kobuɛ ni alɛ:

"Nyu lo, bakpɛtɛ lekye

katookasɔ kale bɔɔwa;

kale kplɛ kanwii kɔtaka kankye

kasɔ nyɛntɛlekɔ.

23 Bakle kɔtaa ku akplɔ;

bakpe amumu manannya ni otii nyaami.

Kudú lɛma kodie fɛle lekpo le nikɔkpɛ nii,

nse basi di bapɔnkɔ lɛma suoto;

man-wa fɛle batii ba nielolaa suoto bɛɛta ni kakpɛ

alɛ bɔɔbadieko fɔ ni, afɔ Sion Obisankobi."

24 Butoonu ma suoto sɛlaa,

nnɛɛ lefee wo.

Lɛyɛkɛ lɛpɛ wo,

buonu dibuo fɛle ɔsanko wɔ nikɔkpɛ ni kolofo.

25 Bitandie biakyɛ afe

ee biakyɛ di sisuku suoto,

diekye lo nwu nkle kapamii,

difu kafɔɔ nkpe di ɔfankyi biala.

26 Ao batii nii, biklee aboko

biɛpɛ bimunu di ntɔ̀ kamɛ;

biewi kaku osie kanya

fɛ otii wɔ di obisuɔtɔbi nɔɔ onwii nwu lete niekpi ni,

diekye asaa-wɔɔsatɛ nwu

kamawa amafua wo.

27 "Yeremia, ntɔɔyɔ fɔ lɛbla otii wɔ ninsɔ abɔɔsaa an-nyu nii,

batii nii kafɔɔ ninle lekpetefuɔ,

alɛ faanyu,

fansɔ kafɔɔ sisuku lɛma fan-nyu.

28 Kudú bakpeetɛ banunsientɛ di bamuu lɛma nle,

bookyi manlalaasa ni batii.

Abɔɔsaa sɛɛle ku abɔɔsaa wɛɛfɛɛ bale;

bamuu lɛma ndiki kalalaa kɔkpaa.

29 Man-fɛ ɔtɔ osie kanya

alɛ oofiɛ lɛbɔɔsaa nutũle ku ɔtɔ,

kafɔɔ ɔnyanakĩisa nwu mbla kasakasa;

bakplitɛ nin-ndie di kamɛ lɛma.

30 Man-lɛɛ ma alɛ koto fututu ko beesĩ nii,

diekye SAATE nwu lesĩ ma."