1 "Lɛbɔɔsaa-wɛɛfɛɛ lɛkpɛnsaa bɛɛyɔ bɛɛkpana Yuda sikpile,

lɛklɛklɛfuɔ le kanya niepiɔmpiɔ ni bɛɛyɔ bɛɛkpana,

beetika di afuɔ nkyɛ di situ lɛma suoto

ku seleɔta akyikye akya lɛma suoto.

2 Bia babi lɛma nnyuma

seleɔta akyikye ku Asera sewoso lɛma nwu

di awoso ya niefukuti ni sɛlɔɔkɔ

ku akpenkpe takale suoto.

3 Kobokote nii di kasɔ nwu suoto

ku lɛsaawɛ lɛfɔ ku asaa lɛfɔ ya amuu niefũ fɔ ni kɔya

kamayɔ nta fɛ kakpɛ kamɛ asaa,

diɛkyakaa ni di ntakalekɔ lɛfɔ aba nwu,

ta sikpile simuu di kasɔ nwu suoto oso.

4 Diefe ni di afɔ omu ɔtanlolaa ɔbla oso yi,

atesaa ya lata fɔ ni kamayu.

Kamayɔ fɔ mbla ɔlanle nta balo lɛfɔ

di kasɔ ka fanan-ye ni suoto,

diekye fatookpee mi ɔblɔ osie kanya,

kubafiɛ kafɔɔ dinaa ni kaloo."

5 Nnya ɔlaa wɔ di SAATE nwu kobuɛ ni alɛ:

"Bɛɛkpaani otii wɔ nintika ni otii disi,

nnwɔ nintika ni disi di suoto sina suoto anta ni osie nɔɔ

ku otii wɔ otu nimunikĩi kunkyɛ ni di SAATE nwu suoto.

6 Abate fɛle kowoso di kasɔ ka niɛkoso ni suoto;

ɔlɔbanya lɛlɛ̀ nse diɛwa.

Abasiɛ di ɔfaafuu aba ya niekoso ate nii,

di mmba kasɔ suoto di nfũ di otii kuonwii diesi nii.

7 "Kafɔɔ lɛtɔtrɔ bɛɛta otii wɔ nintika ni SAATE nwu disi,

nnwɔ nintika ni anu di suoto nɔɔ.

8 Abate fɛle kowoso ko bɛɛsɔ ni di okle kotoko

nintaa ni sidu nikũ di kaklenyii kotoko.

Kunnyɛkɛ nse difila lɛwa;

afata nikũ nte bokoboko obe lele.

Kunnkpee suoto kubuɛ di lɛlɛɛ le di koleele lɛkpɛ ni ku osie

di diidii kafɔɔ kunnsĩ ni abi otika."

9 Otu nkpe kakyɔnkyɔ kulenke asaa amuu

anaa ni kafɔɔ difiɛyɔɔ.

Owe nimafuo ni kasɔ onu?

10 "Ami SAATE nwu ninwolaa otu kamɛ

nsɔ kafɔɔ otii disibu nnyu,

alɛ kata otii letota di nkpa nɔɔ disiɛbi kanya,

di mmle di sɛsaabla nɔɔ lesiɛko ni kanya."

11 Otii wɔ ninfe ni di osuku kpile suoto an-wɛ ni lɛlɛ̀

nte fɛle kakyinkyikpakala ka nimbiɛ ni afuɔ ya ananfa nii.

Nse nkpa nɔɔ osiɛ ntɔɔsɛ di nintɛɛ yi, asaa nwu kamasĩ nwɔ,

abadiki antuo di kayɛntɛkɔ nɔɔ alɛ ditakpa nwɔ.

12 Kakleklekɔ loo lɛba nwu

ninle dibu lɛkakpomii le bɛɛtakatɛ ni katoo diɛyɔ ni di kasɔkakyekɔ nɛ.

13 Oo SAATE, Israel disitikasaa,

babakpee batii ba bamuu niasĩ fɔ ni sinunsɔ.

Babakpana batii ba niakple fɔ ni di nkpaamaa ayooto di kɔtɛ kamɛ

ta batoosĩ ni SAATE nwu oso,

nkpa ntu nwu kataakɔ.

14 Oo SAATE, yɔɔsa mi ofiɛ, ni dibayɔɔ mi kafɔɔ;

diki mi, ni kamawɛ didiki,

diekye afɔ ninle nnwɔ nintansa nii.

15 Nyu lo, boobuɛ mantɔkɔ mi alɛ,

"Ɔfɛ di SAATE nwu ɔlaa nkpe?

Ta nwu kuwa kaanya nfɛ!"

16 Ninsĩ nlɛ nosinle bafosokpatɛ lɛfɔ;

faye falɛ diele mi dibiesaa alɛ nnɛɛ lefeeyi nwu kawa.

Sɛlaa se nindie ni di anyasibi nii nte temple di anu lɛfɔ.

17 Tanle difu faatɛɛ;

afɔ ninle mi katanikokɔ di ayi kpile kamɛ.

18 Ta sinunsɔ sikpɛ mba nikomiɛ mi ni dikpile,

kafɔɔ tanta sinunsɔ lakpɛ mi;

ta difu dipɛ ma,

kafɔɔ tanta difu lapɛ mi.

Yɔ sɛlaa kpile ayi fawako di suoto lɛma;

wɔɔsa ma faakple fawɔɔsa ma.

19 Nnya ɔlaa wɔ di SAATE nwu labuɛ aatɔkɔ mi ni alɛ: "Tɔɔkyɛ faalayila di batii nwu kayoko, nka di Yuda baka nfe mambuo, mandie ni; faayila kafɔɔ di Yerusalem n-yoko bamba mmuu kanya. 20 Tɔkɔ ma falɛ, ‘Oo Yuda baka ku Yuda batii bamuu ku otii biala ninsi ni di Yerusalem manfe ni di n-yoko be mmle, binu SAATE nwu ɔlaa. 21 Nnya ɔlaa wɔ di SAATE nwu kobuɛ ni alɛ: Bilolaa binyu bilɛ bietuka letoo kuninwii di Lɛnyɛɛtɛyi suoto ee bafenko ni di Yerusalem n-yoko nwu. 22 Bitandieko letoo kuninwii di ayo lee ee biabla ɔkpɛ di Lɛnyɛɛtɛyi suoto, kafɔɔ bibla Lɛnyɛɛtɛyi nwu klekle, fɛ mmle lakpee ni bawa lee kufiofa. 23 Kafɔɔ batanu ee bakyɔɔ atoko; baawɛ otokopĩ ni batanu ee bafũ lɛnanfi nɛ. 24 SAATE nwu niebuɛ alɛ, ‘Nse bielolaa bienyu, biɛkyɔɔ mi atoko, minan-yɔ letoo kuninwii bifenko di okpoo kplɛ wɔ mmle n-yoko di Lɛnyɛɛtɛyi suoto, kafɔɔ biɛbla Lɛnyɛɛtɛyi nwu klekle minambla ɔkpɛ kuonwii niini suoto yi, 25 ni baka ba ninsi ni di Dawid lɛkakpomii suoto ku banɔɔfotii nɔɔ kamafe di okpoo kplɛ wɔ mmle n-yoko mambuo. Mma ku banɔɔfotii lɛma kamasiɛ di bakeke ku bapɔnkɔ suoto man-wa, Yuda basuɔtɔ ku batii ba ninsi ni di Yerusalem kamakyakaa ma di suoto man-wa, ni batii kamasiɛ di okpoo kplɛ wɔ mmle kamɛ dinaa ni kaloo. 26 Batii kamakye Yuda sekpoo ku sekpoenyii se niɛmana ni Yerusalem siekyi ni man-wa, babakye Benyamin amɛ suoto ku kufĩkamɛɛkɔ akpenkpe nkpaa, akpenkpe kasɔ ku kalakasɔ man-wa. Babawako ofiɛ asaaɔta, seleɔta, alesaa asaaɔta, olufui ku sɛfa ɔpɛ asaaɔta di SAATE nwu leyo. 27 Kafɔɔ nse biesĩ mi atoko ɔkyɔɔ, alɛ biabla Lɛnyɛɛtɛyi nwu klekle, bietuka letoo lele di obe wɔ biɔwa ni ɔbafe di Yerusalem n-yoko nwu kamɛ di Lɛnyɛɛtɛyi nwu suoto yi, ni kamayiensa ɔtɔ wɔ mɔnamafuo ni oniisa di Yerusalem n-yoko kunfiɛ ntanikokɔ nɔɔ.’ "