1 Nnya ɔlaa wɔ niakye SAATE nwu nfũ kuawa kuata ni Yeremia di Yuda ɔka Sedekia sɛka ole lɛlɛɛ fosile kamɛ, diale ni kafɔɔ Nebukadnesar sɛka ole lefosi lɛlɛɛ nɛnle kamɛ. 2 Di obe nwu kamɛ yi, Babel ɔka bakpɛtɛ latoodieko Yerusalem kakpɛ, baasɛɛ kafɔɔ ɔlaabuɛtɛtɛ Yeremia baakpee di banyuntɛ leyo di Yuda lɛkayo kamɛ.

3 Diekye Yuda ɔka Sedekia latɛ nwɔ di leyo katenkɔ ninfa aabuɛ alɛ, "Obe oso foobuɛ ɔlaa fantɛ fɛ mmle fɔɔbla ni? Faabuɛ falɛ, ‘Nnya ɔlaa wɔ di SAATE nwu kobuɛ ni alɛ: Nfɛ kɔmayɔ okpoo kplɛ wɔ mmle nkpee di Babel ɔka nnɛɛ, ni abafũ nwu. 4 Yuda ɔka Sedekia dilɔbatoso adie di Babel batii nnɛɛ, kafɔɔ nwaako babayɔ nwɔ mankpee di Babel ɔka nnɛɛ, ankakatɛko nwɔ anu ku anu an-nyɔɔ kafɔɔ ku nnwɔɔ omu nɔɔ anu. 5 Abakpaa Sedekia ansifiko Babel, di lɛba le abasiɛ ni ninaase ni di obe wɔ kamablako nwɔ suoto ɔkpɛ, SAATE nwu niebuɛ. Nse fɛɛkpɛko Babel batii, flɔba lelenkee.’ "

6 Ni di Yeremia labuɛ alɛ, "SAATE nwu ɔlaa lawa kuatɛɛ alɛ: 7 Nyu lo, teefɔ bisɔnle Salum obisuɔtɔbi Hanamel kamawa ɔkyɛ lɛfɔ amabuɛ alɛ, ‘Ya kofe nii ko ninte ni di Anatot, diekye afɔ ninkpe osuku, ɔkpɛ lɛfɔ kafɔɔ kule fɛ ɔnantii tintĩ alɛ faaya kũ nɛ.’

8 "Nioso, fɛ mmle okle di SAATE nwu ntoobuɛ ni yi, teemi bisɔnle obisuɔtɔbi Hanamel lawa ɔkyɛ nii di banyuntɛ nwu kaflɔnkɔ ni aababuɛ alɛ, ‘Fũ kofe nii nwu di Anatot di Benyami kasɔ suoto faya. Diekye afɔ ninkpe osuku fanfũ kũ kunle fɔ kafɔɔ kole, ya kũ fata suoto lɛfɔ.’

"Latofo nlɛ SAATE nwu ɔlaa kuale; 9 nioso laya kafe nwu di Anatot di teemi bisɔnle obisuɔtɔbi Hanamel ɔkyɛ, ni lakadi koto fututu lefosi-akuɛnsĩ latɔɔ nɛ. 10 Ni lakpana lakpee di kukũ kamɛ, lakpee kɔnɛɛ kaalɔ, ni latĩi kũ kanya nɛ. Lamiɛ otii layila kũ kamaa, ni lakadi koto fututu nwu di akadiisaa suoto nɛ. 11 Layɔ kofe ɔya kukũ nwu- nko baase ni lɛkpana baatĩi ni kanya di sɛlaa ku ablasaa ninwu nsi nii, diakyakaa ni di nko batatĩi ni kanya- 12 ni layɔ kukũ ko mmle lata Baruk wɔ niale ni Maaseia ɔwa, di ote niale ni Neria, di teemi bisɔnle obisuɔtɔbi Hanamel ku kamaabayilatɛ ba niakpee ni kɔnɛɛ di kukũ nwu ku Yuda batii ba bamuu niasiɛ ni di banyuntɛ nwu kaflɔnkɔ anu nɛ.

13 "Ni latɔkɔ Baruk sɛlaa se mmle di anu lɛma nlɛ: 14 ‘Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Yɔ akũ nwu, kofe ɔya akũ nwu beetĩi ni kanya ku n-ya manantĩi ni kanya akyuu nwu anyɔ, fakpee di kɔtɛ dibukii kamɛ di mmle aate anklɛ ni. 15 Diekye nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Babakple man-ya ayo, afe ku nta awosobi afe di kasɔ ka mmle suoto.’

16 "Layɔ kofe ɔya kukũ nwu lata ni Neria obisuɔtɔbi Baruk sɛmaa yi, lapɛ ɔlaa lata SAATE nwu nlɛ:

17 "Ao, SAATE Kplɛ, afɔ niabla osi ku kasɔ di osie kplɛ ku kɔnɛɛ siene lɛfɔ ko faananfi nii. Lɛsalɛsaa kuninwii ɔbla nnaa osie diɛta fɔ. 18 Faandiki lɛbɔmbɔ fantuo batii nkpe, kafɔɔ fan-yɔ babibate sikpile letoko-nanfi fanwako di babi lɛma ba di sɛmaa lɛma suoto. Oo Yaa kplɛ ku sientɛ, nnwɔ leyooto ninle ni SAATE wɔ Nilenke ni. 19 Disibu lɛfɔ lewo, sɛsaabla lɛfɔ kafɔɔ lemuɔ. Anumbi lɛfɔ letikiti ate ɔɔnya batii bamuu sisuku; fanta otii biala letota di nkpa nɔɔ disiɛbi kanya ku mmle di sɛsaabla nɔɔ lesiɛko nii. 20 Faabla atuosaa ya niɛbla ni ɔkpɛ ku anyasaa di Egipte, ni fakle nya fɔɔbla ɔbla diɛbase di miɛ dii le mmle, di Israel ku batii bamuu kamɛ, ni fatoofũ leyooto le niekple dile fɔ ni lele nɛ. 21 Faakpaa batii lɛfɔ Israel faadieko di Egipte ku atuosaa ku asaa ya niabla ni ɔkpɛ, di kɔnɛɛ siene ku kɔnɛɛ lɛnanfi ku difu kplɛ kamɛ. 22 Ni faayɔ kasɔ ka mmle faaka ntam falɛ fabayɔ fanta ni bawa lɛma faata ma nɛ, kasɔ ka di nnyɛɛntu ku bablɔ kobiɛ ninfe nii. 23 Baawa baabayɔ kasɔ nwu kaakple ma kale, kafɔɔ batanu fɔ ɔlaa ee batikanko kufiofa lɛfɔ; batabla lɛsaa le faata ma kufiofa falɛ babla nii. Nioso faayɔ sɛlaa kpile otũ se mmle simuu faawako ma di suoto.

24 "Nyu mmle bɛɛpɛ atii bɛɛtɛ alɛ boofũ ni okpoo kplɛ nwu. Ta kapamii, kɔka-ɔkpɛ ku ofiɛ kpile nwu oso yi, babayɔ okpoo kplɛ nwu mankpee di Babel batii ba nikodieko nwu ni nnɛɛ. Ɔlaa wɔ faabuɛ ni ntɔɔwa kaanya, fɛ mmle fɔɔnya ni nunua. 25 Kuntɛ babayɔ okpoo kplɛ nwu mankpee di Babel batii nnɛɛ yi, afɔ, Oo SAATE Kplɛ, fɛɛtɔkɔ mi falɛ, ‘Ya kofe nwu ku koto fututu, faata kafɔɔ kamaabayilatɛ bawɛ di ɔsaabla nwu kamɛ.’ "

26 Ninfɛ di SAATE nwu ɔlaa lawa kuata Yeremia alɛ: 27 "Ami ninle SAATE nwu, batii bamuu Yaa nɛ. Lɛsaa lewo nkpe mi osie ku ɔbla? 28 Nkpo oso, nnya ɔlaa wɔ di SAATE nwu kobuɛ ni alɛ: Nfɛ kamayɔ okpoo kplɛ wɔ mmle ɔbayɔ okpee di Babel batii ku ɔka Nebukadnesar ba nimafũ nwu ni nnɛɛ. 29 Babel batii ba nikodieko ni okpoo wɔ mmle kamawa mamakpee nwu ɔtɔ; babafiɛ nwu mantɛ kaasɔ. Diɛkyakaa ni di ayo ya di batii nwu lakpee mi ɔblɔ yakayaka, baafiɛ ni olufuii di akyá osi baata ni Baal ku nta kasɔ okpete ɔta bayaa bamba.

30 "Israel batii ku Yuda batii labla okpile di anu nii diɛyɔ ni di sekosopo lɛma obe; nwaako, Israel batii ditabla lɛsaa biene kafɔɔ beekpee mi ɔblɔ ku asaa ya di nnɛɛ lɛma labla nii, SAATE nwu niebuɛ. 31 Diayɔ ni di dii le baabudi nwu ni diɛbadu ni nua, okpoo kplɛ wɔ mmle ntɔɔta ɔblɔ ku lɛblɔfiɛ yakayaka nii lɛtaka dikpeni alɛ lediki nwu ni di anu nii. 32 Israel ku Yuda batii ntookpee mi ɔblɔ di akpilesaa ya amuu batɔɔbla nii- mma, baka ku banɔɔfotii lɛma, olebatatɛ ku ɔlaababuɛtɛtɛ lɛma, Yuda batii ku Yerusalem batii. 33 Sɛmaa lɛma baamunikĩisa baatɛɛ diele anu lɛma; nu latuo ma asaa lakple latuo ma yi, batakyɔɔ atoko ee bafũ lɛnanfi. 34 Baayɔ afiɔ lɛma ya nikɔkpɛ ni oyududu baatɛ di leyo le manlɛɛ ni Leyooto nii baakpɔnɔfɔsa ni. 35 Baatofo ntakalekɔ baata Baal di Ben-Hinom Ɔtaata alɛ bɔɔyɔ babisuɔtɔbi lɛma ku babisankobi lɛma manta ole manta Molek, nu di diidii ntabuɛ, ee diwa di disibu nii, alɛ baabla diyududusaa le mmle ninta Yuda mbla okpile.

36 "Biobuɛ di okpoo kplɛ wɔ mmle suoto bilɛ, ‘Babayɔ nwu mankpee di Babel ɔka nnɛɛ di kapamii, kɔka-ɔkpɛ ku ofiɛ kpile kanya’; kafɔɔ nnya ɔlaa wɔ di SAATE nwu, Israel Yaa kobuɛ ni alɛ: 37 Nwaako kamasiisa ma nkyeko nsɔ nwu mmuu suoto, di lɛba le latososa ma lakpee ni di lɛblɔfiɛ ku ɔblɔ yakayaka kplɛ nii kamɛ; kamakplesa ma n-wako lɛba le mmle, ninta ma mansiɛ di atoko ɔkyɛ ole kamɛ. 38 Babale batii nii, ami kafɔɔ kamale Yaa lɛma. 39 Kamata ma otu ku disibu ninwii, di mmle babayɛkɛ mi ni obe lele, ninta ni mma bamu ku babi lɛma di sɛmaa lɛma dibiene. 40 Kamabla kanya ninii ka ninaa ni kaloo ku mma: Namadiɛ dibiene ɔbla ɔta ma diidii, kamakpee ma kafɔɔ ɔnyɛɛ alɛ baayɛkɛ mi, alɛ balaakple nkpaamaa di suoto nii diidii. 41 Kamanya suoto lɛyɔɔ di dibiene ɔbla ɔta ma kamɛ, nwaako kamatɛ ma di kasɔ ka mmle suoto ku otu ku ɔkla nii omuu.

42 "Nnya ɔlaa wɔ di SAATE nwu kobuɛ ni alɛ: Fɛ mmle ntɔɔyɔ sɛlaa kpile otũ se mmle lɛwako ni di batii ba mmle suoto yi, nkpo kamata ma lɛlɛ le nimuu labuɛ latɛ lata ma ni nɛ. 43 Babakple man-ya afe di kasɔ ka mmle mimbuɛ ni bilɛ, ‘Kɛɛlalaa kate ni, di batii ee babɔkɛɛ diesi ka ni di suoto, diekye batɔɔyɔ ka beekpee di Babel batii nnɛɛ.’ 44 Babaya afe ku koto fututu, mankpee kɔnɛɛ di ablasaa nwu, mantĩi kanya, man-wɛ kafɔɔ kamaabayilatɛ manta di Benyami kasɔ, di sekpoenyii se niɛmana ni Yerusalem siekyi ni, di Yuda sekpoo ku akpenkpe sekpoo nwu kamɛ, di kufĩkamɛɛkɔ akpenkpe nkpaa ku kalakasɔ, diekye kamakplesa lɛlɛ lɛma nta ma, SAATE nwu niebuɛ."