1 Nnya SAATE nwu ɔlaa wɔ niawa kuata ni ɔlaabuɛtɛtɛ Yeremia kuakyeko ni nnle nwu suoto:

2 Ɔlaa wɔ niekye ni Egipte suoto:

Nnya ɔlaa di Egipte ɔka Farao Neko suoto, nnwɔ di Babel ɔka Nebukadnesar lalenkee ni di Karkemis di Eufrate Okle kotoko, di Yuda ɔka Yosia obisuɔtɔbi Yehoiakim sɛka ole lɛlɛɛ naafa kamɛ:

3 "Bilolaa kubiafunsaa lee, akplɛ ku abiibii akyuu nwu anyɔ,

biedie bikyɛ kakpɛ!

4 Binii bapɔnkɔ,

bieyie bisiɛ ma di suoto!

Bitukũ abɔɔsaa akoto

bieyila di nyilakɔ lee!

Bilɔɔfɔ akplɔ lee,

biɛyɔ akpɛsaa lee bikpakũ!

5 Obe kɔnya nkpo?

Lɛyɛkɛ ntɔɔpɛ ma,

nfɛ bookple sɛmaa,

batoolenkee bakpɛtɛ lɛma.

Bootoso ku nkye

mɔnɔɔnyu ni sɛmaa

difu kafɔɔ nkpe di ɔfankyi biala,"

SAATE nwu niebuɛ.

6 "Otii wɔ ninkpe ni sɛwa dilɔbafuo otoso

ee sientɛ atoso asifi.

Baatuula baanɔɔ

di katookasɔ di Eufrate Okle kotoko.

7 "Owe ninle nnwɔ mmle nintaka ni fɛle Nil,

fɛle sekle se ntu nieyii ni?

8 Egipte ntaka fɛle Nil,

fɛle sekle se nieyii siɛwaalɛ nii.

Ambuɛ alɛ, ‘Kamataka ntĩi kasɔ;

kamawɔɔsa sekpoo kplɛ ku batii ninwu bamuu.’

9 Aye bapɔnkɔ, bikpee osie!

Aye bakeke bakatɛ, bika ninunsɛɛ kanya!

Aye bakpɛtɛ, bikyɛ sitũ-

Etiopia ku Put batii ba ninkle ni kubiafunsaa,

Ludi batii ba nintaa ni kɔtaa.

10 Kafɔɔ dii nwu nkpo ninle SAATE nwu lele, SAATE wɔ Ninlenke nii-

ɔbla-okyisa dii, diɛta ni ɔbla-okyisa di balo nɔɔ suoto.

Kapamii nwu kamabɛbɛɛ asaa ninaase di obe wɔ kabamiɛ nii,

ninaase di obe wɔ dibanɔɔ ka ni ɔkɔnsɔ ku ntɔ.

Diekye SAATE nwu, SAATE wɔ Ninlenke ni kamata oleɔta

di katookasɔ kasɔ suoto di Eufrate Okle kotoko.

11 "Afɔ Kakpeelebitɛ Egipte Obisankobi,

kata fakyɛ Gilead falaafũ kɔfa fifiale.

Kafɔɔ kasakasa fɔɔkpɔɔtɔɔsa afatasi;

flɔbawɛ difiɛyɔɔ.

12 Nnle nwu kamanu sinunsɔ lɛfɔ;

kaku lɛfɔ owi kamayii kasɔ kamuu.

Kpɛtɛ onwii kamatuula di ɔbamba suoto;

akyuu lɛma nwu anyɔ kamannɔɔ."

13 Nnya ɔlaa wɔ di SAATE nwu latɔkɔ ni ɔlaabuɛtɛtɛ Yeremia aakyeko ni Babel ɔka Nebukadnesar di lɛwa le ɔɔwa ni Egipte ɔbadieko ni suoto alɛ:

14 "Buɛ ɔlaa wɔ mmle di Egipte, faayie nwu lɛkya di Migdol;

yie nwu lɛkya kafɔɔ di Memfis ku Tahpanhes falɛ:

‘Bilolaa suoto biyila di n-yilakɔ lee,

diekye kapamii kɔmabɛbɛɛ batii ba niɛmana ye beekyi nii.’

15 Lɛ oso babawakosa bakpɛtɛ lee kasɔ?

Blɔbafuo oyila, diekye SAATE nwu kamatukusa ma antɛ kaasɔ.

16 Babatuula mankple mantuula;

man-nɔɔ mantika di bawo suoto.

Bababuɛ alɛ, ‘Bitaka biɛta bupɛbukple busifi

awo bamu batii nfũ ku awo bamu katefa nsɔ suoto,

buotoso banyinkatɛ loo kapamii nwu.’

17 Nfa babafafaa alɛ,

‘Kudu yiisatɛ lete di Egipte ɔka Farao nle;

atooyu osuku onyu nɔɔ.’

18 "Nwaako lɛnya nkpe ni nkpa," Ɔka nwu niebuɛ,

nnwɔ leyooto ninle ni SAATE wɔ Ninlenke nii,

"Otii onwii kamawa ate ni fɛle Tabor di abokote kamɛ,

fɛle Karmel wɔ di lekpo kotoko.

19 Aye ba ninsi ni di Egipte,

bisiisa asaa lee bita sɛlanle kamɛ osifi,

diekye Memfis kamabiɛ kuntɛ

kunwɔɔ kunte kafɔɔ di batii dilɔbasiɛ ni ninwu kamɛ.

20 "Egipte nle lɛnankyuebi sanko le ninlɛ ni sekpeele,

kafɔɔ kabɔkɔbi ka nintaa ni lekye

katookasɔ kɔɔwa di suoto nɔɔ.

21 Bakpɛtɛ ba eefũ bɔɔbla nwɔ ni ɔkpɛ

nte fɛle anankyuebi ya ninsi ni lɛla.

Mma kafɔɔ babamunikĩi mantoso mansifi,

blɔbayila kpinkpĩ,

diekye ɔlaa kpile otũ dii nfɛ kɔwa di suoto lɛma,

obe wɔ babananfi ma ni kootoko.

22 Egipte kamablɛlɛɛ fɛle kɔsanwu ko nikotoso nii,

fɛ mmle di lo ntaka ni osie kanya;

babataka nwɔ di suoto ku nfɛ̀,

fɛle awoso babuditɛ.

23 Babakpɛ lepoo nɔɔ nwu mantɛ,

nu dikpe opĩ."

SAATE nwu niebuɛ,

"Bapɔ balenke atroee,

blɔbafuo ma ɔka.

24 Babakpee Egipte Obisankobi nwu sinunsɔ,

man-yɔ nwɔ mankpee di katookasɔ batii nnɛɛ."

25 SAATE, Israel Yaa wɔ Ninlenke ni kobuɛ alɛ: "Nfɛ kɔbayɔ letokonanfi n-wako di Tebes yaa Amon suoto, Farao suoto, Egipte ku bayaa nɔɔ ku baka nɔɔ suoto, ku batii ba nietika ni disi di Farao suoto. 26 Kamayɔ ma nkpee di batii ba nikomiɛ ma ni olo nnɛɛ, nta Babel ɔka Nebukadnesar ku banɔɔfotii nɔɔ. Sɛmaa, akpakpa dite yi, batii kamawɛ di Egipte fɛ mmle diate ni saa," SAATE nwu niebuɛ.

27 "Oo kpɛmblatɛ nii Yakob, tanyɛkɛ;

Oo Israel, tanta nnɛɛ lafee fɔ.

Nwaako kamadiki fɔ nkyeko kakyonkɔ,

banantii lɛfɔ nkyeko sɛlanle lɛma kasɔ suoto.

Yakob kamakple anwɛ atoko ɔkyɛ ole ku kɔba lekpee,

kuonwii kafɔɔ dilɔbayɛkɛsɔɔ.

28 Oo kpɛmblatɛ nii Yakob, tanyɛkɛ,

diekye nsiko fɔ," SAATE nwu niebuɛ.

"Kuntɛ lawɔɔsa nnle nwu mmuu fɛɛ,

di mbe kamɛ lasamiisa ye lakpete ni yi,

nɔmawɔɔsa fɔ fɛɛ.

Kamananfi fɔ kootoko, kafɔɔ di mmle diesiɛko ni kanya;

nɔmata fɔ fasifi nkpo alɛ ninanfi fɔ kootoko."