1 Ni di SAATE nwu ɔlaa lawa kuata Yeremia di obe wɔ di ɔka banyuntɛ kanyayilatɛ Nebusaradan ladiɛ nwɔ ni sɛɛmaa di Rama nɛ. Aanya Yeremia wɔ baakpee ni sɛkpɛnkyɛ di balanle ba bamuu baamufũ baakyeko ni Yerusalem ku Yuda kamɛ, mba baakpaa baasifiko ni sɛlanle kamɛ di Babel. 2 Di banyuntɛ nwu kanyayilatɛ lanya ni Yeremia yi, ni aatɔkɔ nwɔ alɛ, "SAATE Yaa lɛfɔ nwu niabuɛ ɔlaa kpile otũ wɔ mmle aatɛ di lɛba le mmle suoto nɛ. 3 Ninfɛ di kanunua SAATE nwu ntɔɔta diɛwa kaanya nɛ; atɔɔbla fɛ mmle aatɛ aabuɛ alɛ ababla nii. Asaa ya mmle amuu lɛwa ta aye biabla ni okpile di SAATE nwu suoto ku ɔlaa nɔɔ ɔtanu ni oso. 4 Kafɔɔ miɛ kodiki sɛkpɛnkyɛ se mmle di nnɛɛtũ lɛfɔ. Nse dilɛ fɔ yi, tikankoe buosifi Babel, ni kamanyu fɔ disi; kafɔɔ nse flomiɛ yi, ni tan-wa. Nyu lo, kasɔ nwu kamuu nte di anu lɛfɔ; tɔɔkyɛ kakɔ lele ninlɛ fɔ." 5 Kafɔɔ, fiɛ di Yeremia lamunikĩi alɛ oosifi nii, Nebusaradan labuɛ aakyakaa alɛ, "Pɛfakple fasifi Ahikam obisuɔtɔbi Gedalia wɔ ninle ni Safan ɔwa nfũ, nnwɔ di Babel ɔka ladiki alɛ ayila ni di Yuda sekpoo kanya, faalaasiɛ nwɔ di ɔkyɛ di batii nwu kamɛ, ee tɔɔkyɛ kakɔ lele ninlɛ fɔ."

Ninfɛ di kanyayilatɛ nwu latɔɔ alesaa asaa ku atasaa, ni aatɔɔ aasifi nɛ. 6 Nioso Yeremia lasifi Ahikam obisuɔtɔbi Gedalia nfũ di Mispa, ni aasiɛ nwɔ di ɔkyɛ di batii ba baabu baatɛ ni sɛɛmaa kamɛ di kasɔ nwu suoto nɛ.

7 Obe wɔ di bakpɛtɛ banɔɔfotii ku bakpɛtɛ lɛma bamuu ba niawɛ ni di kakpɛkɔ lanu alɛ Babel ɔka ntoodiki Ahikam obisuɔtɔbi Gedalia eese ni fɛ abaa kanyayilatɛ di kasɔ nwu suoto, ni atɔɔyɔ nwɔ eese ni di basuɔtɔ, basanko ku babisɔ ba niale ni bapiitɛ di kasɔ nwu suoto batakpaa baasifiko ni sɛlanle kamɛ di Babel kanya yi, 8 ni baawa Gedalia nfũ di Mispa nɛ- Netania obisuɔtɔbi Ismael, Karea babisuɔtɔbi Yohanan ku Yonatan, Tanhumet obisuɔtɔbi Seraia, Efai Netofat otii nwu babisuɔtɔbi, ku Maakat otii nwu obisuɔtɔbi Yaasania, ku bakpɛtɛ lɛma. 9 Ahikam obisuɔtɔbi Gedalia wɔ niale ni Safan ɔwa, laka ntam aakple aatika difuɔ aata ma ku bakpɛtɛ lɛma. Ni aabuɛ alɛ, "Bitanyɛkɛ Babel batii osumu. Bisiɛ di kasɔ nwu suoto biesumu Babel ɔka nwu, ni dibalɛ ɔkyɛ ninta ye. 10 Ami omu nii kamasiɛ di Mispa alɛ kayila ye kaanya di Babel batii ba nimawa wo ni ɔkyɛ anu. Kafɔɔ bisiisa nta, kabiene awosobi ku nnɔnyi, biɛyɔ nya bikpee di ataase lee kamɛ, biesiɛ di sekpoo se biafũ ni kamɛ."

11 Obe wɔ di Yuda batii ba bamuu niawɛ ni di Moab, Amon, Edom ku nsɔ bamba mmuu lanu alɛ Babel ɔka ladiɛ batii bawo aatɛ ni di Yuda, aadiki ni kafɔɔ Ahikam obisuɔtɔbi Gedalia wɔ ninle ni Safan ɔwa, aase ni fɛ abaa kanyayilatɛ di suoto lɛma yi, 12 bamuu lɛma baapɛbaakple baawa Yuda, baawa Gedalia nfũ di Mispa, baakye nsɔ be mmuu kamɛ baasamiisa ma baakpee ni baawa. Ni baasiisa nta ku kabiene awosobi kpinwu nɛ.

13 Ninfɛ di Karea obisuɔtɔbi Yohanan ku bakpɛtɛ banɔɔfotii bamuu ba niawɛ ni ɔwɛ di kakpɛkɔ kamɛ lawa Gedalia nfũ di Mispa 14 baabakaalɛ nwɔ alɛ: "Faaye falɛ Amon batii ɔka Baalis ntookpee Netania obisuɔtɔbi Ismael alɛ abalo fɔ?" Kafɔɔ Ahikam obisuɔtɔbi Gedalia ditafũ ma anu.

15 Ninfɛ di Karea obisuɔtɔbi Yohanan layu aakpee di Gedalia kotoko di Mispa alɛ, "Tɛɛ nkyɛ ninalo Netania obisuɔtɔbi nwu, kuonwii dilɔbatofo nwu ole. Obe oso di nnwɔɔ aawa aamalo fɔ ninta alɛ Yuda batii ba bamuu niɛmana fɔ beekyi ni nsamii ninta kafɔɔ Yuda batii ba niebu ni n-wɔɔ?"

16 Kafɔɔ Ahikam obisuɔtɔbi Gedalia latɔkɔ Karea obisuɔtɔbi Yohanan alɛ, "Tambla lɛsaa le mmle okle! Ɔlaa wɔ foobuɛ ni di Ismael suoto diele onukwale."