1 Nnya ɔlaa wɔ di SAATE nwu kobuɛ ni alɛ:

"Nyu lo, kamadieko asaawɔɔsatɛ ninwuna nwu nkpee

di Babel ku Kaldea batii suoto.

2 Kamakpee bafɔɔ manaafɛɛlɛ Babel,

manwɔɔsa kafɔɔ kasɔ nɔɔ;

babadieko nwɔ di ɔfankyi biala

di ɔlaa kpile otũ nɔɔ dii suoto.

3 Bitanta kɔtaa taatɛ nwu lataa kɔtaa nɔɔ,

ee biatɔɔ aanĩi akpakyaa nɔɔ.

Bitandiɛ bakosopo nɔɔ;

biwɔɔsa bakpɛtɛ nɔɔ nwu klekle.

4 Babanɔɔ kakpɛ mante di Babel,

babafũ nkɔ osie kanya di akpaka nɔɔ.

5 Diekye Yaa lɛma, SAATE wɔ Ninlenke ni

diesĩ Israel ku Yuda,

nu di kasɔ lɛma leyii ku lɛpɔɔ okpi

di Israel Klekletɛ nwu anu.

6 "Bitoso bidie di Babel!

Bitoso biefũ nkpa lee!

Bitanta baawɔɔsa ye ta sikpile nɔɔ oso.

SAATE nwu ɔbla okyisa obe ntoowo;

abatɔɔ letota di lɛsaa le niesiɛko nwɔ nii.

7 Babel lale koto sɛɛle opũ di SAATE nwu kɔnɛɛ;

aata kasɔ nwu kamuu lanyi baasiɛ.

Nnle lanyi nta nɔɔ nwu;

nkpo oso batoobuo afĩi nɛ.

8 Babel kamanɔɔ ambibiɛ di obe kakui kamɛ.

Biwi kaku osie kanya di suoto nɔɔ!

Bimiɛ kɔfa fifiale bififia nwɔ;

loobia dibayɔɔ nwɔ.

9 " ‘Nse butabayɔɔsa Babel ofiɛ fiɛ,

kafɔɔ ofiɛ dilɔbafuo nwɔ ɔyɔɔ;

bita budiɛ nwɔ di obiala asifi nnwɔɔ omu nɔɔ kasɔ suoto,

diekye lɛkanko nɔɔ ntoodu kolo,

diɛtaka katoo fɛ alokonkyɛ.’

10 " ‘SAATE nwu ntɔɔta wo lɛbɛ;

biwa, biɛta bubuɛ di Sion

lɛsaa le di SAATE Yaa loo ntɔɔbla ni.’

11 "Bilɔɔfɔ akplɔ nwu,

biyɔ kubiafunsaa nwu!

SAATE nwu ntootũkunsa Media batii baka,

diekye disitikasaa nɔɔ ninle alɛ aawɔɔsa Babel.

SAATE nwu kamabla ankyisa,

ɔbla okyisa diɛta ni olekatakɔ nɔɔ.

12 Bitakatɛ flankaa katoo di Babel seyoyiɛ suoto!

Bikpee banyuntɛ nwu osie bikyakaa,

biɛyɔ banyuntɛ nwu bisesee di nyilakɔ lɛma,

bielolaa suoto bita kalà ɔte!

SAATE nwu kamabla di disitikasaa nɔɔ suoto,

ɔsaabla nɔɔ di Babel batii suoto.

13 Aye ba ninsi ni di sekle kpinwu kotoko

dilɛ ye ni di lɛsaawɛ kamɛ,

kalookɔ lee ntoowo,

obe wɔ bababudi ye man-yu nii.

14 SAATE wɔ Ninlenke ni ntɔɔka di nnwɔɔ omu nɔɔ suoto alɛ:

Nwaako kamayɔ batii kpinwu mmayiisa ye kamɛ fɛ atroe ɔlambu,

mamayiisa lelenkee kudú di suoto lee.

15 "Osie nɔɔ aayɔ aabla kasɔ;

ninumbe nɔɔ aayɔ aabla kayi

ni aayɔ lɛsɔnu nɔɔ aablɛfɛsa osi nɛ.

16 Nse eekpududuu, ntu be di osi nkumii;

anta alokonkyɛ ntaka ankye kasɔ nwu nyɛntɛlekɔ.

Anta ɔplalaa mmunaa ku kanto

andieko afɛɛfɔ kafɔɔ ankyeko asaantɛkɔ nɔɔ.

17 "Otii biala dieye lɛsaa, banaa ni kafɔɔ lɛsaatofo;

kotosɛɛle asaatukatɛ biala afiɔ nkpee nwɔ sinunsɔ.

Kakyɔnkyɔ lete ninle atembi nɔɔ;

ninwuna kuninwii diesi nya.

18 Anaa ɔnyɛɛ, amansaa ale;

babawɔɔ, nse lɛkanko lɛma lewo.

19 Nnwɔ ninle ni Yakob Ole diete fɛle mba mmle,

diekye nnwɔɔ ninle asaa amuu Blatɛ,

di atesaa kɔna nɔɔ nwu nkyakaa nii-

SAATE wɔ Ninlenke ni ninle nwɔ leyooto.

20 "Afɔ ninle mi kakpɛ kawosokuu,

lɛkpɛsaa nii diɛta ni kakpɛ-

afɔ nin-yɔ mbibiɛ nnle,

afɔ nin-yɔ nwɔɔsa sɛkanlekɔ,

21 afɔ nin-yɔ mbibiɛ pɔnkɔ ku siɛtɛ,

afɔ nin-yɔ mbibiɛ keke ku katɛ,

22 afɔ nin-yɔ mbibiɛ osuɔtɔ ku osanko,

afɔ nin-yɔ mbibiɛ ɔnɔɔfo ku obisɔ,

afɔ nin-yɔ mbibiɛ okosopo ku okpeele,

23 afɔ nin-yɔ mbibiɛ fosokpatɛ ku bafoso,

afɔ nin-yɔ mbibiɛ fekpɛntɛ ku banankyue-suɔtɔ,

afɔ nin-yɔ mbibiɛ abaa ku banɔɔfotii.

24 "Kamata Babel letota di anu lee ku mba bamuu ninsi ni di Babel kamɛ di ɔtanlolaa ɔbla wɔ omuu baabla ni di Sion," SAATE nwu niebuɛ.

25 "N-yɛ fɔ di suoto, Oo afɔ asaawɔɔsatɛ kobokote,

afɔ wɔ niɛwɔɔsa ni kasɔ kamuu,"

SAATE nwu niebuɛ.

"Kamananfi kɔnɛɛ nii di suoto lɛfɔ,

nimmunusa fɔ nkpakatɛ di lɛkyɛlɛlɛɛ suoto fampɛ kaasɔ

mbla fɔ kobokote ko niefiɛ nii.

26 Blɔbayɔ difuɔ lɛfɔ kuninwii babla leyokɔdifuɔ,

ee bayɔ difuɔ kuninwii babla lɛsɔse,

diekye fabate ofukuti dinaa ni kaloo,"

SAATE nwu niebuɛ.

27 "Bitakatɛsa flankaa katoo di kasɔ nwu suoto!

Bifɛ dikyikyoo di nnle nwu kamɛ!

Bilolaa nnle nwu bita kakpɛ di suoto nɔɔ;

bilɛɛ Ararat, Mini ku Askenas:

sɛkanlekɔ be mmle baataka di suoto nɔɔ.

Bidiki kakpɛ kanyayilatɛ di suoto nɔɔ;

bidiki bapɔnkɔ fɛle atroe ɔlambu bikpee nwɔ.

28 Bilolaa nnle nwu bita kakpɛ di suoto nɔɔ-

Medes baka,

abaa kanyabayilatɛ lɛma ku banɔɔfotii lɛma bamuu,

ku nnle be mmuu suoto boole ni sɛka.

29 Kasɔ nwu kotũkũ kannu kafɔɔ dibuo,

diekye SAATE nwu disibu le ɛɛbla ni di Babel batii suoto lɛbla kpinkpĩ-

alɛ aalalaasa Babel kasɔ

alɛ otii kuonwii dilaasiɛ ni ninfa.

30 Babel bakpɛtɛ ntoodiɛ ɔkpɛ;

bɛɛka basi di nwofakɔ lɛma nwu.

Osie lɛma ntooloo;

nfɛ bate fɛle basanko.

Batookpee nsiɛkɔ lɛma nwu ɔtɔ;

n-yoko nɔɔ abɔɔsaa sewoso ntoofefee.

31 Tosotɛ onwii ntoso anaakyakako ɔbamba,

tɔkyɛntɛ onwii kafɔɔ ntikanko tɔkyɛntɛ bamba

manaatɔkɔ Babel ɔka

alɛ batoofũ okpoo kplɛ nɔɔ omuu.

32 Batoofũ sekle ntaalɛkɔ nwu,

bekpee kafɔɔ afɔ-nsɔ mmuu ɔtɔ,

difu kafɔɔ ntɔɔpɛ bakpɛtɛ nwu."

33 Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ:

Babel Obisankobi nwu nte fɛle kakpaa

di obe wɔ baananafu ka nii;

dilɔbaklɛ di obe wɔ babafiɛlɛ nwɔ ni kamawo.

34 "Babel ɔka Nebukadnesar ntɔɔbɛbɛɛ wo,

atookpee wo di kakpɔkpɔtɔ kamɛ,

atɔɔbla wo lebo fukuti.

Atɔɔmɛ wo fɛ kɔsanwu,

ninfɛ atɔɔlɛ alesaa mɛnɛmɛnɛ loo eeyiisa kafutu nɔɔ,

ni atootufa wo eeyu nɛ.

35 Amumu ya bɛɛbla ni suoto loo sina ditika di Babel suoto,"

batii ba ninsi ni di Sion niebuɛ.

"Ntɔ loo ditika di batii ba ninsi ni di Babel suoto,"

Yerusalem niebuɛ.

36 Nkpo oso, nnya ɔlaa wɔ di SAATE nwu kobuɛ ni alɛ:

"Nyu lo, kamafũ ɔlaa lee nta ye

nimbla ɔbla nkyisa nta ye;

kamata lekpo nɔɔ nsɔɔ

ninta kafɔɔ ntu ntaakɔ nɔɔ nsɔɔ.

37 Babel kamakple kawɔɔ lefleku ante,

lepoo kamɛ baweewee kasiɛkɔ,

lɛyɛkɛsaa ku lɛmansaa,

lɛba le di otii kuonwii diesi nii.

38 Batii nɔɔ bamuu kokumii fɛle bakyata bisɔ,

bɔɔfafaa fɛle bakyata abi.

39 Kafɔɔ nse alesaa nkle ma ɔkɔnsɔ yi,

kamatũ opunu nta ma,

ninta mannyi man-siɛ,

alɛ baayiisa kudu ku sɛma-

n-se batoote bɛɛkyɔsĩi dinaa ni kaloo, manamasintaka ni kafɔɔ,"

SAATE nwu niebuɛ.

40 "Kamasooko ma nwako

fɛle afosobi ya boofe ni olo,

fɛle akunumuu ku batie.

41 "Binyu mmle babamufũ ni Sesak,

kasɔ nwu kamuu lɛkanta nwu kamanii!

Binyu mmle di Babel kamakple ni lɛyɛksaa

di nnle nwu kamɛ!

42 Lekpo kamataka di Babel suoto;

afuuta nini kamatĩi nwɔ.

43 Sekpoo nɔɔ kamate sifukuti,

ɔfaafuu ku kasɔ kosole,

kasɔ ka di otii kuonwii diesi nii,

kasɔ ka suoto di otii kuonwii ninfe akyɛ ni osuku.

44 Kamananfi Bel kootoko di Babel

kamatɔɔ kafɔɔ antufa lɛsaa le aamɛ ni andiki.

nnle nwu kafɔɔ dilɔbasintu bakyɛ ɔkyɛ nɔɔ.

Babel seyoyiɛ nwu kafɔɔ kamabiɛ.

45 "Batii nii, bidie di kamɛ nɔɔ!

Bitoso biefũ nkpa lee!

Bitoso di SAATE nwu ɔblɔ yakayaka nfũ.

46 Bitanta otu lakpa ye ee biayɛkɛ

nse bienu sɛlaa se ninante ni nkpo di kasɔ nwu suoto;

ɔlaa wɔ ninante ni nkpo n-wa lɛlɛɛ le mmle, ɔbamba lɛlɛɛ bamba,

amumu sɛlaa se ninante ni nkpo di kasɔ nwu suoto

ɔka kafɔɔ ntaka di ɔka suoto.

47 Diekye nwaako obe nwu kamawa

kamananfi ni Babel afiɔ kootoko;

babakpee kasɔ nɔɔ kamuu sinunsɔ

batii nɔɔ ba beelo ni kafɔɔ kamate di kamɛ nɔɔ.

48 Ni osi ku kasɔ ku asaa ya amuu ninsi nya ni kaamɛ

kamayiisa kudu man-nya suoto lɛyɔɔ di Babel suoto,

diekye asaa bawɔɔsatɛ kamakye katookasɔ

man-wa mamadieko nwɔ,"

SAATE nwu niebuɛ.

49 "Dikpeni Babel lebiɛ ta Israel batii ba baalo ni oso,

fɛ mmle okle baalo ni batii di kasɔ nwu kamuu suoto

baanɔɔ ni kakpɛ ta Babel oso.

50 Aye ba niatoso ni kapamii nwu,

bidie bisifi, batanyila kafɔɔ!

Binyuma SAATE nwu di kasɔ fanfa suoto,

biebu disi di Yerusalem suoto."

51 "Beekpee wo sinunsɔ,

diekye batootufa wo,

sinunsɔ kafɔɔ letĩi wo anu,

diekye bafɔɔ ntoobuo

SAATE nwu leyo kakleklekɔ nwu."

52 "Kafɔɔ obe kɔwa," SAATE nwu niebuɛ,

"kamananfi ni afiɔ nɔɔ nwu kootoko,

di kasɔ nɔɔ kamuu suoto,

mba niefũ ni nkɔ kafɔɔ kamatuni.

53 Nse Babel lekple katoo eedu bia kolo

eeta nwofakɔ takale nɔɔ nwu lɛwɛ osie yi,

kamakpee asaabawɔɔsatɛ di suoto nɔɔ,"

SAATE nwu niebuɛ.

54 "Kaku owi kudú kodie kunkye Babel kun-wa,

kawɔɔ kplɛ kudú

niekye ni Babel batii kasɔ.

55 SAATE nwu kamawɔɔsa Babel;

abalosa kudú oyiisa nɔɔ nwu.

Balo afɛɛfɔ ɔkpɛ kamataka fɛle okle kplɛ;

sɛlɔ lɛma dikumii kamadie osie kanya.

56 Asaawɔɔsatɛ kamawa di Babel suoto;

babamufũ bakpɛtɛ nɔɔ,

manfefee kafɔɔ kɔtaa lɛma.

Diekye SAATE nwu ninle Yaa wɔ nimbla ankyisa nii;

abata letota di nimu kamɛ.

57 Kamata banɔɔfotii nɔɔ ku banumbentɛ nɔɔ nnyi mansiɛ,

diɛkyakaa ni di abaa kanyabayilatɛ, banɔɔfotii ku bakpɛtɛ nɔɔ;

babakyɔsĩi dinaa ni kaloo manamasinsɛnkɛ ni kafɔɔ,"

Ɔka nwu niebuɛ, nnwɔ leyooto ninle ni SAATE wɔ Ninlenke ni.

58 Nnya ɔlaa wɔ di SAATE wɔ Ninlenke ni kobuɛ ni alɛ:

"Bababiɛ Babel oyoyiɛ nwu ninkpe ni opĩ mantɛ kaasɔ

mankpee kafɔɔ n-yoko takale nɔɔ nwu ɔtɔ;

batii nwu kokpee suoto lɛma dibuo kasakasa,

kale nwu ɔkpɛ ɔbla nle ntɔɔni diɛta ɔtɔ ofiɛ."

59 Nnya ɔlaa wɔ di Yeremia lata ni kpɛmblatɛ Maaseia obisuɔtɔbi Neria wɔ niale ni Seria obisuɔtɔbi, di obe wɔ aakyɛ ni Babel ku Yuda ɔka Sedekia di sɛka olebee nɔɔ lɛlɛɛ naafa kamɛ. 60 Yeremia lakpana sɛlaa kpile otũ se simuu nimawa ni di Babel suoto aakpee di kukũ kamɛ- asaa ya amuu baatɛ ni nsũ di Babel suoto. 61 Ni aatɔkɔ Seraia alɛ, "Nse feebuo Babel yi, nyu falɛ fɛɛka sɛlaa se mmle simuu osie kanya. 62 Ni faabuɛ falɛ, ‘Oo SAATE, faabuɛ falɛ fabawɔɔsa lɛba le mmle, alɛ otii ee bɔkɛɛ kuonwii dilɔbasiɛ nini kamɛ; dibate difukuti dinaa ni kaloo.’ 63 Nse fɛɛka kukũ ko mmle feeloo yi, faanĩi difuɔ fakaasa ninkũ suoto faafuki kũ fakpee di Eufrate okle kamɛ. 64 Faabuɛ falɛ, ‘Nkpo di Babel kamamɛɛ alɛ alaasintaka diidii ta sɛlaa kpile otũ se kamayɔ nwako nwɔ ni di suoto oso. Batii nɔɔ kafɔɔ kamanɔɔ.’ "

Yeremia sɛlaa lese ninfũ.