1 SAATE nwu ɔlaa lawa kuata Yeremia di obe wɔ di Ɔka Sedekia lakpee ni Malkiya obisuɔtɔbi Pasur ku Maaseia obisuɔtɔbi oletatɛ Sefania di ɔkyɛ nɔɔ. Baabuɛ alɛ: 2 "Wolaa asaa kamɛ fakyeko SAATE nwu nfũ fata wo, diekye Babel ɔka Nebukadnesar kodieko wo. Loobia SAATE nwu kamabla asaa ya niɛbla ni ɔkpɛ anta wo fɛ mmle aabla ni di obe owo nitɔbafe ni kamɛ, alɛ aadiɛ wo odieko."

3 Kafɔɔ Yeremia ladiki kanya, ni aatɔkɔ ma alɛ, "Tɔkɔ Sedekia falɛ, 4 ‘Nnya ɔlaa wɔ di SAATE, Israel Yaa nwu kobuɛ ni alɛ: Nfɛ kɔmamunikĩisa kakpɛ akpɛsaa ya ninsi ye ni ninnɛɛ di suoto lee, n-ya bikle biɔkpɛko ni Babel ɔka ku Babel batii ba ninkpe ni di oyoyiɛ sɛmaa bɛɛmana ye beekyi nii. Kamasiisa ma kafɔɔ nkpee di okpoo kplɛ wɔ mmle kamɛ. 5 Ami omu nii kamakpɛko ye ku kɔnɛɛ lɛnanfi ku kɔnɛɛ siene nii, di ɔblɔ ku lɛblɔfiɛ ku ɔblɔ kplɛ yakayaka kamɛ. 6 Kamalo batii ba ninsi ni di okpoo kplɛ wɔ mmle kamɛ- batii ku babɔkɛɛ akyuu lɛma nwu anyɔ- mankpi kafɔɔ di ofiɛ kpile kanya. 7 SAATE nwu niebuɛ alɛ, nni kamaa, kamayɔ Yuda ɔka Sedekia, banɔɔfotii nɔɔ ku batii ba ninsi ni di okpoo kplɛ wɔ mmle kamɛ ninankpi ni di ofiɛ kpile nwu, kapamii ku kɔka ɔkpɛ kanya nkpee di Babel ɔka Nebukadnesar ku balo lɛma ba nikomiɛ ni nkpa lɛma dikpile nnɛɛ. Abalo ma ku kapamii; ɔlɔbale ma sibualɛ ee anya ma nyaami ee ɔlaa lɛma kunu nwɔ kafutu.’

8 "Diɛkyakaa ni yi, tɔkɔ batii nwu falɛ, ‘Nnya ɔlaa wɔ di SAATE nwu kobuɛ ni alɛ: Nyu lo, kɔyɔ nkpa osuku ku kukpi osuku ntɛ ye di anu. 9 Otii lele niesiɛ di okpoo kplɛ wɔ mmle kamɛ kamakpi di kapamii, kɔka ee ofiɛ kpile kanya. Kafɔɔ otii lele niedie ɛɛkyɛ ɛɛlaayɔ suoto nɔɔ ɛɛta Babel batii ba niɛmana beekyi ye ni kamasiɛ nkpa; abatosoko nkpa nɔɔ. 10 Ntɔɔtɛ nlɛ kamabla okpoo kplɛ wɔ mmle dikpile, ninanle ni dibiene, SAATE nwu niebuɛ. Babayɔ nwu mankpee di Babel ɔka nnɛɛ, anwɔɔsa nwu ku ɔtɔ.’

11 "Diɛkyakaa ni yi, tɔkɔ Yuda lɛkayo falɛ, ‘Binu SAATE nwu ɔlaa; 12 Oo Dawid leyo kamɛ batii, nnya ɔlaa wɔ di SAATE nwu kobuɛ ni alɛ:

" ‘Bika lɛka tinini olesɛ biala;

bifũ otii nkpa di banyinkatɛ nɔɔ nnɛɛ

otii wɔ beeyu nii,

nse diele nkpo ni ɔblɔ yakayaka nii kamakɛsɛɛ kunfiɛ fɛle ɔtɔ

ta akpilesaa ya bitɔɔbla ni oso-

kubafiɛ di otii kuonwii dilɔbafuo nwu ni oniisa.

13 Yerusalem, lɛtaka n-yɛ di suoto lɛfɔ,

afɔ wɔ ninsi ni di ɔtaata wɔ mmle nsintɛɛ

di difuɔnkpaa nwu kobokote nsintɛɛ,

SAATE nwu niebuɛ.

Afɔ wɔ nimbuɛ ni falɛ, "Owe nimafuo ɔtaka wo di suoto?

Owe nimafuo katanikokɔ loo obuo?"

14 Kamananfi ye kootoko fɛ mmle diesiɛko ni ablasaa lee,

SAATE nwu niebuɛ.

Kamakɛsɛɛsa ɔtɔ di apoo lɛfɔ kamɛ

kunfiɛ lɛsaa biala le niɛmana fɔ diekyi nii.’ "