1 Ninfɛ di SAATE nwu ɔlaa lawa kuatɛɛ alɛ: 2 "Tandiki ɔsanko faayɔ di lɛba le mmle, faalofo babisuɔtɔbi ku babisankobi." 3 Diekye nnya ɔlaa wɔ di SAATE nwu kobuɛ ankyeko ni babisuɔtɔbi ku babisankobi ba beelofo ni di kasɔ ka mmle nwu suoto ku basanko ba ninle ni baya lɛma ku basuɔtɔ ba ninle ni bate lɛma suoto alɛ: 4 "Okpi-fiɛ nimalo ma. Blɔbawi ma ee bakookaa ma, kafɔɔ babate fɛle aku ya ninte ni kaasɔ. Babawɔɔ di kapamii ku kɔka-ɔkpɛ kanya, bakpi lɛma kafɔɔ kamale alesaa anta bakansiɛ di kɔfɛɛfɔ ku lepoo kamɛ babɔkɛɛ di kasɔ suoto."

5 Diekye nnya ɔlaa wɔ di SAATE nwu kobuɛ ni alɛ: "Tambuo leyo le di nkufanyo n-yɛ nii; tankyɛ faalaawi ee faata yɔɔsa, diekye ntootekete lɛtɔtrɔ nii, lɛbɔmbɔ nii ku nyaami nii ɔnya di batii ba mmle suoto," SAATE nwu niebuɛ. 6 "Batii kplɛ ku batii biibii, akyuu nwu anyɔ kamakpi di kasɔ ka mmle suoto. Blɔbakookaa ma ee bawi ma, kuonwii kafɔɔ dilɔbakyakya suoto nɔɔ ee akpaasu disi nɔɔ ata ma. 7 Kuonwii dilɔbawako alesaa alɛ ɔbakpee kakufa batii kɔnɛɛ kaafutu- blɔbawako bia ote ee ɔya- ee otii kuonwii nta alɛ bɔɔta ma yɔɔsa.

8 "Tambuo leyo le kafɔɔ di ole ku owee ku nta onyi nkpe ni falaasiɛ, faale, faanyi. 9 Diekye nnya ɔlaa wɔ di SAATE nwu, Israel Yaa wɔ Ninlenke ni, kobuɛ ni alɛ: Kamata ɔkafɔɔ ku ɔkafɔɔsa suoto lɛyɔɔ ku lɛpɔ̀ kudu kanya n-wa kaloo di anu lɛfɔ ku obe lɛfɔ kamɛ di lɛba le mmle.

10 "Nse fɛɛtɔkɔ batii ba mmle sɛlaa se mmle simuu, bɛɛkaalɛ fɔ alɛ, ‘Obe oso di SAATE nwu lebuɛ ɔlaa kpile wɔ mmle kplɛ di suoto loo? Lɛmɛnsaa kpile buɔbla? Obe okpile buɔbla di SAATE Yaa loo nwu suoto?’ 11 Ni tɔkɔ ma falɛ, SAATE nwu alɛ, ‘Ta bate lee lasĩ mi, baalaatikanko ni bayaa bamba, baabla ma sɛkpɛ, baatɔ ma ni kafɔɔ oso. Baasĩ mi, ni batale kafɔɔ kufiofa nii nɛ. 12 Kafɔɔ aye bitɔɔbla asiensiesaa bilenke bate lee. Binyu mmle di obiala lee ntikanko ni otu kpile nɔɔ otokopĩ di obe wɔ dikaatɛ alɛ biɛkyɔɔ mi ni atoko. 13 Nioso kamatososa ye ndiki di kasɔ ka mmle suoto nkpee di kasɔ ka di aye ee bate lee dieye ni suoto. Nfa bibasumu bayaa bamba kakũ ku kakyɛ, diekye nɔmale ye sibualɛ kusinwii.’

14 SAATE nwu niebuɛ alɛ, "Kafɔɔ, obe kɔwa di batii dilɔbasimbuɛ ni alɛ, ‘Nwaako di SAATE nwu lɛnya akpe ni nkpa, nnwɔ niakpaa Israel batii aadieko ni di Egipte,’ 15 kafɔɔ bababuɛ alɛ, ‘Nwaako di SAATE nwu lɛnya akpe ni nkpa, nnwɔ niakpaa Israel batii aadieko ni di katookasɔ, aadieko ni kafɔɔ di nsɔ nwu mmuu di lɛba le aatososa ma aakpee nii.’ Diekye kamakplesa ma n-wako kasɔ ka lata ni bawa lɛma suoto."

16 SAATE nwu niebuɛ alɛ, "Kafɔɔ kanunua yi, kamakyesee kɔkpaku badikitɛ kpinwu mamamufũ ma. Nni sɛmaa kamakyesee bakpantɛ kpinwu, manaakpà ma di kobokote ku lekpenkpe biala suoto ku afuɔnkpaa sebo kamɛ. 17 Anumbi nii kɔnya sisuku lɛma simuu; batawofasa suoto di mi, ee sikpile lɛma siwofa di anumbi nii. 18 Kamase ma koto ɔta sɛnyɔ di amumu lɛma ku sikpile lɛma disi, diekye batɔɔkpɔnɔfɔsa kasɔ nii ku atembi kpɔnɔfɔɔ lɛma ya di nkpa diesi nii. Baayɔ kafɔɔ afiɔ lɛma nwu nikɔkpɛ ni oyududu baayiisa ni atesaa nii kamɛ."

19 Oo SAATE, osie nii ku kawofakɔ nii,

katanikokɔ nii di nimiina obe kamɛ,

ɔkyɛ lɛfɔ di nnle nwu kamawa

babakye kasɔ nwu nyɛntɛlekɔ manwa mamabuɛ alɛ,

"Bate loo ditawɛ lɛsalɛsaa diediki balaatɛ bayaa,

afiɔ ya nintadie ni lɛsalɛsaa batabla ni dibiene kuninwii baata ma nii.

20 Batii mbla mma bamu bayaa?

Yii, kafɔɔ baale bayaa!"

21 "Nkpo oso kamatuo ma-

obe wɔ mmle kamɛ kamatuo ma

osie nii ku nimuɔ nii.

Ni babatofo alɛ

leyooto nii ninle SAATE nwu nɛ.