1 Di Yeremia latɔkɔ batii nwu sɛlaa se simuu di SAATE Yaa lɛma nwu lakpee nwɔ alɛ atɔkɔ ma nii, aaloo ma ni ɔlaa biala ɔtɔkɔ yi, 2 ni di Hosaia obisuɔtɔbi Asaria ku Karea obisuɔtɔbi Yohanan ku basuɔtɔ ba bamuu nintakatɛ ni suoto katoo latɔkɔ Yeremia alɛ, "Fɔɔlaa! SAATE Yaa loo nwu diekpee fɔ alɛ babuɛ falɛ, ‘Bitankyɛ Egipte bialaasiɛ ninfa.’ 3 Kafɔɔ Neria obisuɔtɔbi Baruk nikoyiensa fɔ ɔtɔ di suoto loo alɛ faayɔ wo fankpee di Babel batii nnɛɛ, alɛ baalo wo ee baakpaa wo mansifiko sɛlanle kamɛ di Babel."

4 Nioso Karea obisuɔtɔbi Yohanan ku bakpɛtɛ banɔɔfotii nwu bamuu ku batii nwu bamuu ditakyɔɔ atoko di SAATE nwu ɔlaa wɔ aabuɛ ni alɛ basiɛ ni di Yuda kasɔ suoto. 5 Kafɔɔ, Karea obisuɔtɔbi Yohanan ku bakpɛtɛ banɔɔfotii nwu bamuu lakpaa batii nwu bamuu niabu ni di Yuda, mba niapɛbaakple baawa baabasiɛ ni di Yuda kasɔ suoto, baakye ni nnle be mmuu baasamiisa ma baakpee ni kamɛ. 6 Baakpaa kafɔɔ basuɔtɔ, basanko ku babisɔ ku ɔka babisankobi bamuu ba di ɔka banyuntɛ kanyayilatɛ Nebusaradan ladiɛko ni, Ahikam obisuɔtɔbi Gedalia wɔ niale ni Safan ɔwa, ku ɔlaabuɛtɛtɛ Yeremia ku Neria obisuɔtɔbi Baruk baasifiko. 7 Nioso baabuo Egipte kasɔ, diekye batakyɔɔ SAATE nwu ɔlaa atoko, ni baalaabuo bia Tahpanhes okpoo nɛ.

8 Ninfɛ di SAATE nwu ɔlaa lawa kuata Yeremia di Tahpanhes alɛ: 9 "Yɔ afuɔ kplɛ awo fakookaa di atɛnkudi ya bɛɛtɛ ni di Farao lɛkayo kayokontũ di Tahpanhes, di obe wɔ di Yuda batii konyu ni. 10 Ni faatɔkɔ ma falɛ, ‘Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Kamakpee manlɛɛ kpɛmblatɛ nii Babel ɔka Nebukadnesar manwako, nin-yɔ lɛkakpomii nɔɔ nse di afuɔ ya mmle lekookaa ni ninfũ suoto; abafuti sɛka nɔɔ kalekɔ akpanta di suoto lɛma. 11 Abawa aamadieko Egipte, an-yɔ kukpi anwako mba beediki bɛɛta ni kukpi, an-ta mba beediki bɛɛta ni sɛlanle ole nsifi sɛlanle kamɛ, kapamii kafɔɔ anta mba beediki bɛɛta ni kapamii. 12 Abakpee ɔtɔ di Egipte bayaa selentakɔ; an-fiɛ selentakɔ lɛma nwu, an-yɔ kafɔɔ bayaa lɛma ansifiko sɛlanle kamɛ. Fɛ mmle di fosokpatɛ n-yɔ akpeele wua nɔɔ am-minisa ni di suoto yi, nkpo abayɔ Egipte am-minisa di suoto nɔɔ andie ninfa ansifi di lelenkee kamɛ nɛ. 13 Di kufĩ olekatakɔ nwu di Egipte ninfa, ababibiɛ afuɔ akpaka klekle nwu, an-fiɛ kafɔɔ Egipte bayaa selentakɔ nwu antɛ kaasɔ.’ "