1 Ɔlaa wɔ mmle lawa kuata Yeremia di Yuda batii ba bamuu niasiɛ ni di Egipte Kala lɛkyɛ suoto- di Migdol, Tahpanhes ku Memfis- ku Egipte Katoo lɛkyɛ alɛ: 2 "Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Bianya sɛlaa kpile otũ kplɛ se layɔ lawako ni di Yerusalem ku Yuda sekpoo simuu suoto. Miɛ nfɛ site sifukuti ku kalalaa kamɛ 3 ta akpilesaa ya baabla ni oso. Baafiɛ olufui, baasumu kafɔɔ bayaa bamba di mma ee bate lee ditatofo ni diidii baayɔ baakpee mi ɔblɔ. 4 Obe lele lakpee bakpɛmblatɛ nii ɔlaababuɛtɛtɛ nwu baababuɛ alɛ, ‘Bitambla ayududusaa ya mmle lekyidi nii!’ 5 Kafɔɔ batanu ee bakyɔɔ atoko. Batakyi di akpilesaa lɛma ɔbla suoto ee badiɛ olufui ofiɛ ɔta bayaa bamba. 6 Nkpo oso lanyɛɛnɛ lɛblɔfiɛ nii nwu; ni kuafiɛ Yuda sekpoo ku Yerusalem akpaká, ni kuabla sĩ kawɔɔ ka sile ni miɛ nɛ.

7 "Nunua, nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Obe oso biɛyɔ ɔlaa kpile otũ kplɛ wɔ mmle okle biɛwako di suoto lee, biɛwɔɔsa basuɔtɔ ku basanko, babi ku babifɔɔle biediki di Yuda, diɛta alɛ otii kuonwii diebu asiɛ ata ye? 8 Obe oso biɔyɔ asaa ya di nnɛɛ lee lɛbla ni minkpee mi ɔblɔ, biofiɛ olufui minta bayaa bamba di Egipte, di lɛba le biɛwa biɛbasiɛ ni? Bibawɔɔsa suoto lee mimbla kafɔɔ suoto lee lɛkpaanisaa ku lɛmansaa di nnle nwu mmuu kamɛ kaasɔ suoto. 9 Bitooyee asiensiesaa ya di bate lee ku Yuda baka ku baka-sanko labla ni, ku asiensiesaa ya biabla ni ku basɔfɔ lee di Yuda kasɔ suoto ku Yerusalem akpaká? 10 Badiwakosa suoto lɛma kasɔ diɛbase di miɛ dii le mmle ee bayɛkɛ mi, ee batikanko kufiofa nii ku sɛsaabla se latɛ ni di aye ku bate lee anu.

11 "Nkpo oso, nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Lɛtɛ nlɛ kamayɔ sɛlaa kpile otũ n-wako ye di suoto, nin-wɔɔsa kafɔɔ Yuda omuu. 12 Kamawɔɔsa Yuda batii ba niebu basi ni nkpa, baatɛ alɛ boosifi maanasiɛ ni di Egipte kasɔ suoto. Bamuu kamawɔɔ di Egipte; babanɔɔ di kapamii kanya ee mankpi di kɔka-ɔkpɛ kanya. Diɛyɔ ni di obisɔ diɛlaadu ni ɔnɔɔfo, babakpi di kapamii ee kɔka-ɔkpɛ kanya. Babakple lɛkpaanisaa ku lɛyɛkɛsaa, kawɔɔ ku lɛmansaa. 13 Kamananfi mba ninsi ni di Egipte kootoko ku kapamii, kɔka-ɔkpɛ ku ofiɛ kpile fɛ mmle lananfi ni Yerusalem kootoko. 14 Yuda batii ba niebu basi ni nkpa bɛɛkyɛ basi ni di Egipte kuonwii lɛma dilɔbatoso ee awɛ nkpa aapɛankple an-wa ni Yuda kasɔ suoto, nka boomiɛ alɛ baapɛmankple man-wa maamasiɛ nii; kuonwii dilɔbapɛakple, diediki kakpɛ kamɛ batosotɛ basɛɛ lete."

15 Ninfɛ di basuɔtɔ ba bamuu niatofo alɛ basɔfɔ lɛma latoofiɛ ni olufui baatɔɔta ni bayaa bamba, diakyakaa ni di basanko ba bamuu niawɛ ni ninfa- lale ni dikudi kplɛ ninwii- ku batii ba bamuu ninsi ni di Egipte Kala lɛkyɛ ku Katoo lɛkyɛ latɔkɔ Yeremia alɛ, 16 "Bulɔbakyɔɔ atoko di ɔlaa wɔ fatɔɔtɔkɔ wo ni di SAATE nwu leyooto kamɛ! 17 Nwaako bubabla lɛsaa biala le buabuɛ bulɛ bubabla nii: Bubafiɛ olufui munta Osi Ɔkasanko nwu, munkpete nta kasɔ muntɔɔ fɛ mmle okle di awo ku bate loo, baka loo ku banɔɔfotii loo labla ni di Yuda sekpoo kamɛ ku Yerusalem akpaka. Diekye di obe nwu kamɛ yi, buawɛ alesaa kpinwu, lɛlɛ kafɔɔ lalɛ wo, okpile kuonwii kafɔɔ ditatũ wo. 18 Kafɔɔ diayɔ ni di obe wɔ buadiɛ ni olufui ofiɛ ɔta ni Osi Ɔkasanko nwu ku nta okpete kaasɔ ɔtɔɔ ni yi, butawɛ lɛsalɛsaa, ni buatɔɔwɔɔ kafɔɔ di kapamii ku kɔka kanya nɛ."

19 Ni di basanko nwu labuɛ baakyakaa alɛ, "Nse buafiɛ olufui buata Osi Ɔkasanko nwu, buakpete nta kasɔ buatɔɔ, ni basa loo ditatofo alɛ buatɔɔpɛ ayomboo fɛle letembi nɔɔ buatookpete nta kaasɔ kafɔɔ buatɔɔtɔɔ?"

20 Ninfɛ di Yeremia latɔkɔ batii nwu bamuu, basuɔtɔ ku basanko akyuu nwu anyɔ ba niatoodiki ni sɛlaa kanya baatɔɔtɔɔ ni alɛ, 21 "SAATE nwu ditanyuma, abu nwu disi kafɔɔ di olufui wɔ di aye ku bate lee, baka lee ku banɔɔfotii lee ku kasɔ nwu batii lafiɛ ni di Yuda sekpoo nwu kamɛ ku Yerusalem akpaka? 22 Di obe wɔ di SAATE nwu dilaasinfuo ni otu okpee di amumu sɛsaabla lee ku ayududusaa asaa ya biabla ni suoto yi, kasɔ lee labakple lɛkpaanisaa, kaate kafɔɔ kafukuti di otii kuonwii ditasiɛ ka ni di suoto, fɛ mmle dite ni mmiɛ. 23 Ta biafiɛ olufui biabla ni okpile di SAATE nwu suoto, bitakyɔɔ nwɔ ni atoko ee bitikanko ni kufiofa nɔɔ ee sɛsaabla nɔɔ ee sɛlaa nɔɔ oso di sɛlaa kpile otũ se mmle lɛwa ye di suoto fɛ mmle biɔnya ni kanunua nɛ."

24 Ninfɛ di Yeremia latɔkɔ batii nwu bamuu, diakyakaa ni di basanko nwu alɛ, "Aye Yuda batii ba bamuu ninsi ni di Egipte kasɔ suoto, binu SAATE nwu ɔlaa. 25 Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Aye ku basɔfɔ lee ntodiki bietuo di kɔkpaa didikibi lee le kanya biabuɛ biatɛ bilɛ, ‘Nwaako bubabla di ntam be buaka bulɛ bubafiɛ ni olufui, munkpete ni nta kasɔ kafɔɔ munta ni Osi Ɔkasanko nwu.’

"Binwini, biɛbla nkpo, bibla di nle biabuɛ biatɛ ni kanya! Biklee ntam lee nwu! 26 Kafɔɔ binu SAATE nwu ɔlaa, aye Yuda batii ba bamuu ninsi ni di Egipte kasɔ suoto: SAATE nwu kobuɛ alɛ, ‘Lɛka di leyooto kplɛ nii suoto nlɛ, otii kuonwii niekye ni Yuda, asi ni di kakɔ lele di Egipte kasɔ suoto dilabasinkple alɛɛ ee aka ntam di leyooto nii diidii, "Nwaako di SAATE Kplɛ nwu lɛnya akpe ni nkpa." 27 Diekye onyu konyu ma nta dikpile, diele dibiene; Yuda batii ba ninsi ni di Egipte kasɔ suoto kamawɔɔ di kapamii ku kɔka ɔkpɛ kanya ninaase di obe wɔ di bamuu lɛma bɛɛwɔɔ nii. 28 Mba nimatoso ni di kapamii kanya mandie ni di Egipte kasɔ suoto man-wa ni Yuda kasɔ suoto kamale batii basɛɛ. Ni di Yuda batii ba bamuu niebu basi ni nkpa, mba niakyɛ baalaasiɛ ni di Egipte kasɔ suoto kamatofo otii wɔ ɔlaa nimabla ni ɔkpɛ nɛ- ole mi ee ole ma.

29 "SAATE nwu niebuɛ alɛ, ‘Nle mmle nimale dituosaa ninta ye alɛ kamananfi ye kootoko di lɛba le mmle nɛ, ninfɛ bibatofo bilɛ nwaako dikpile nii ɔbla afunaa di suoto lee kamawa kaanya nɛ.’ 30 Nnya ɔlaa wɔ di SAATE nwu kobuɛ ni alɛ: ‘Kamayɔ Farao Hofra nkpee di balo nɔɔ ba nikomiɛ nwɔ ni kukpi nnɛɛ, fɛ mmle okle layɔ Yuda ɔka Sedekia lakpee ni di Babel ɔka Nebukadnesar nnɛɛ, lo wɔ niatoomiɛ nwɔ ni kukpi.’ "