1 Di obe wɔ di Babel ɔka Nebukadnesar lakpaa ni Yuda ɔka Yehoiakim obisuɔtɔbi Yekonia ku banɔɔfotii, asaabawolatɛ ku Yuda batii ba nin-ye ni kɔnɛɛ kamɛ sɛkpɛ aadieko ni di Yerusalem aasifiko ni sɛlanle kamɛ di Babel sɛmaa yi, ni di SAATE nwu latuo mi abue nkyikyɛ nnyɔ di SAATE nwu olekatakɔ anu nɛ. 2 Abue ya nialɛ ni nwaa lasiɛ di kakyikyɛ kanwii kamɛ, fɛle n-ya nialekatũ aasɛɛ nii; n-ya niasiɛ ni di kakyikyɛ nyɔɔfa kamɛ lale abuɛ ya nintalɛ ni saa, aatɛ aalalaa alɛ alaalɛ ole.

3 Ninfɛ di SAATE nwu lakaalɛ mi alɛ, "Yeremia, Obe lɛsaa fɔɔnya?"

Ni ladiki kanya nlɛ, "Abue. N-ya ninlɛ ni lɛtɛ alɛ nwaa, kafɔɔ n-ya ninanlɛ ni lɛtɛ ɛɛlalaa alɛ alaalɛ ole."

4 Ninfɛ di SAATE nwu ɔlaa lawa kuatɛɛ alɛ: 5 "Nnya ɔlaa wɔ di SAATE, Israel Yaa nwu kobuɛ ni alɛ: ‘Fɛ mmle okle di abue ya mmle nlɛ ni yi, nkpo lɛnya Yuda batii ba niekye ni sɛlanle kamɛ, mba latososa ni di lɛba le mmle lasifiko ni Babel batii kasɔ suoto nlɛ balɛ nɛ. 6 Anu nii kamanyu ma ninta dibiene lɛma. Kamakplesa ma kafɔɔ n-wako kasɔ ka mmle suoto. Kamatakatɛ ma nse, namata ma bapɛ kaasɔ; kamasɔ ma, diele osifi kamasifi ma. 7 Kamata ma otu alɛ baatofo mi, alɛ ami ninle SAATE nwu nɛ. Babale batii nii, ami kafɔɔ kamale Yaa lɛma, diekye babapɛmankple man-wa ɔkyɛ nii ku otu lɛma omuu.

8 SAATE nwu niebuɛ alɛ, " ‘Kafɔɔ fɛle abue ya ninanlɛ nii, n-ya niɛtɛ ɛɛlalaa ni alɛ alaalɛ ni ole yi, nkpo kamablako Yuda ɔka Sedekia, banɔɔfotii nɔɔ ku mba niekye ni Yerusalem beebu basi ni nkpa ɔkpɛ nɛ. Kuntɛ bɛɛka di kasɔ ka mmle suoto ee basi di Egipte. 9 Kamabla ma diyududusaa ku dikpilesaa nta kasɔ sɛkanlekɔ mmuu, ninunsɔsaa ku okyonsanu, lɛmansaa ku lɛkpaani di lɛba lele letososa ma lekpee. 10 Kamata kapamii, kɔka-ɔkpɛ ku ofiɛ kpile n-wa di suoto lɛma ninaase di obe wɔ bɛɛwɔɔ beedie ni di kasɔ ka layɔ lata ma ni ku bate lɛma.’ "