1 Ɔlaa nwu lawa kuata Yeremia kuakyeko ni Yuda batii bamuu suoto di Yuda ɔka Yosia obisuɔtɔbi Yehoiakim lɛlɛɛ naafa kamɛ, diale ni Babel ɔka Nebukadnesar lɛlɛɛ kasale kamɛ. 2 Nioso ɔlaabuɛtɛtɛ Yeremia latɔkɔ Yuda batii bamuu ku mba bamuu ninsi ni di Yerusalem alɛ: 3 Alɛɛ afosi-anyɔ-atiɛ amu nɛ- diayɔ ni di Yuda ɔka Amon obisuɔtɔbi Yosia lefosi lɛlɛɛ tiɛfa kamɛ diɛbadu ni miɛ dii le mmle yi, SAATE nwu ɔlaa ntɔɔwa kuɔtɛɛ, ntoobuɛ nwu, lekple lebuɛ nwu kafɔɔ lɛtɔkɔ ye, kafɔɔ biɛkyɔɔ atoko.

4 Nu di SAATE nwu kafɔɔ lakpee ye bakpɛmblatɛ nɔɔ ɔlaababuɛtɛtɛ bamuu, aakple aakpee ma yi, bitanu ee bikyɔɔ atoko kuanwii. 5 Baabuɛ alɛ, "Obiala lee akyisa nkpa, di sikpile sisuku lee ku akpilesaa sɛsaabla lee suoto, ni bibafuo osiɛ di kasɔ ka di SAATE nwu lata ye ni ku bate lee dinaa ni kaloo diidii. 6 Bitantikanko bayaa bamba alɛ biabla ma sɛkpɛ minsumu ma kafɔɔ; bitankpee mi ɔblɔ ku asaa ya biɛyɔ nnɛɛ lee biɛbla nii. Ni namabla ye dikpile."

7 SAATE nwu niebuɛ alɛ, "Kafɔɔ bitakyɔɔ mi atoko, ni biakpee mi ɔblɔ ku asaa ya di nnɛɛ lee lɛbla nii, ni biɛyɔ dikpile biɛwako di aye bamu suoto nɛ."

8 Nkpo oso SAATE wɔ Ninlenke ni kobuɛ alɛ: "Ta minankyɔɔ ni sɛlaa nii atoko oso yi, 9 kamalɛɛ katookasɔ batii bamuu ku kpɛmblatɛ nii Babel ɔka Nebukadnesar," SAATE nwu niebuɛ. "Kamayɔ ma n-wako di kasɔ ka mmle ku batii ba ninsi ka ni di suoto ku nnle be mmuu niɛmana ye diekyi ni suoto. Kamawɔɔsa ma klekle, nimbla ma kafɔɔ lɛyɛkɛsaa, lɛmansaa, ku kawɔɔ ka ninaa ni kaloo. 10 Kamanĩisa lɛpɔ̀ ku suoto lɛyɔɔ kudù lɛma nwu kanya, ɔkafɔɔ ku ɔkafɔɔsa sɛlɔ, kukùɔ sɛlɔ ku kandiɛ ɔtɔ ndiki di suoto lɛma. 11 Kasɔ ka mmle kamuu kamakple kasɔ ka niekpi ni, kate ni kafukuti, nnle be mmle kafɔɔ kamabla ɔkpɛ ninta Babel ɔka Nebukanesar alɛɛ afosi-akuɛnsĩ.

12 SAATE nwu niebuɛ alɛ, "Kafɔɔ nse alɛɛ afosi-akuɛnsĩ nwu ntɔɔwa eeloo yi, kamananfi Babel ɔka ku kale nɔɔ, Babel batii kasɔ nwu kootoko, ta lɛpɔɔ lɛma okpi oso. Kamata ka kafɔɔ kankpi kante dinaa ni kaloo. 13 Kamayɔ asaa ya amuu suoto lakakatɛ ni n-wako ninnwu suoto. Asaa ya amuu bɛɛkpana beekpee ni di kukũ ko mmle kamɛ, di Yeremia labuɛ ɔlaa aatɛ ni di nnle nwu mmuu suoto. 14 Mma bamu babale nnle kpinwu ku baka kplɛ balanle; kamase ma koto lɛta di mma bamu sɛsaabla ku nnɛɛ lɛma ɔkpɛ kanya."

15 Nnya ɔlaa wɔ di SAATE Israel Yaa nwu labuɛ aatɔkɔ mi ni alɛ: "Fũ opũ wɔ mmle nieyii ni ku ɔblɔ yakayaka nii nta di kɔnɛɛ nii, faata nnle be mmuu ɔkyɛ lekpee fɔ ni banyi. 16 Nse beenyi nwu yi, babasiɛ́, mankpankpa, mambuo afĩi ta kapamii ka kamakyesee ni di kamɛ lɛma oso."

17 Nioso lafũ opũ nwu di SAATE nwu kɔnɛɛ, ni lata nnle be mmuu ɔkyɛ aakpee mi ni lanyi ɔblɔ nwu nɛ. 18 Yerusalem ku Yuda sekpoo, baka ku banɔɔfotii nɔɔ, nimbla ma kawɔɔ, lɛyɛkɛsaa, lɛmansaa ku lɛkpaani, fɛ mmle bate ni miɛ; 19 Farao Kplɛ, bakpɛmblatɛ nɔɔ, banɔɔfotii nɔɔ ku batii nɔɔ bamuu, 20 ku bafɔɔ bamuu ninfa; Us kasɔ baka bamuu; Filisti baka bamuu (mba niekye ni Askelon, Gasa, Ekron, ku batii ba niabu ni di Asdod); 21 Edom, Moab ku Amon; 22 Tiro ku Sidon baka bamuu; lekpo kotoko nsɔ baka ba ninkpe ni di lekpo sɛmaa; 23 Dedan, Tema, Bus kasɔ ku mba bamuu nikpe ni di aba ya niekyo nii; 24 Arabia baka bamuu ku bafɔɔ baka bamuu ba ninsi ni di ɔfaafuu kamɛ; 25 Simri baka bamuu, Elam ku Media; 26 ku katookasɔ baka bamuu, mba niɛtɛɛtɛɛ ni ku mba nikpe ni fanfa, onwii, onwii- sɛkanlekɔ be mmuu di kasɔ suoto. Di bamuu lɛma sɛmaa kafɔɔ yi, Sesak ɔka kafɔɔ kamanyi nwu.

27 "Ni faatɔkɔ ma falɛ, ‘Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Binyi, biesiɛ, biɛlaa kafɔɔ, biɛnɔɔ alɛ bilasintaka diidii ta kapamii ka kamakyesee ni di kamɛ lee oso.’ 28 Kafɔɔ nse beesĩ alɛ bloofũ opũ nwu di kɔnɛɛ lɛfɔ banyi yi, ni faatɔkɔ ma falɛ, ‘Nnya ɔlaa wɔ di SAATE wɔ Ninlenke ni kobuɛ ni alɛ: Dikpeni bienyi ɔblɔ nwu! 29 Nyu lo, nfɛ kokye kasɔ n-yɔ ɔlaa kpile n-wako di okpoo kplɛ wɔ nikole ni Leyooto ni suoto. Ni nwaako bibatoso letokonanfi nwu? Bilɔbatoso letokonanfi nwu, diekye kosoosa kapamii di mba bamuu ninsi ni di kasɔ suoto, SAATE wɔ Ninlenke ni niebuɛ.’

30 "Nunua yi, buɛ sɛlaa se mmle simuu di suoto lɛma fatɛ, faatɔkɔ ma falɛ:

" ‘SAATE nwu kamakumii ankyeko osi;

abakpududuu ankyeko kasiɛkɔ nɔɔ klekle nwu

ankumii osie kanya anyila di kasɔ nɔɔ ablasaa suoto.

Abayiisa kudu fɛle balɔɔfiɛtɛ,

babayiisa kudu di batii ba bamuu ninsi ni kaasɔ suoto.

31 Kudú oyiisa kamadie osie kanya di nsɔ nyɛntɛlekɔ,

diekye SAATE nwu kamayɔ sɛlaa di nnle nwu suoto;

abayɔ lɛkanko anwako di batii bamuu suoto,

anlo siensiɛtɛ kafɔɔ ku kapamii,’ "

SAATE nwu niebuɛ.

32 Nnya ɔlaa wɔ di SAATE wɔ Ninlenke ni kobuɛ ni alɛ:

Binyu lo! Ɔlaa kpile kɔkpɛ̀

kunkye kale kunsifi kale;

kɔfɛɛfɔ siene kɔtaka

kunkye kasɔ nyɛntɛlekɔ."

33 Di obe nwu kamɛ batii ba di SAATE nwu lelo ni kamakyaka kakɔ biala- diɛyɔ ni di kasɔ kayɛntɛlekɔ kanwii diesifi ni kabamba. Blɔbawi ma ee basiisa ma ee bakookaa ma, kafɔɔ babate fɛle aku ya ninte ni kaasɔ.

34 Aye bafosobakpatɛ, biwi kaku biɛpɛ mmuntũ;

aye babɔkɛɛ kanyabayilatɛ, bipɛbimunu di kudù kamɛ.

Diekye obe wɔ babalo ye ni ntoowo;

bibanɔɔ mimpupuu fɛle dibukii biene.

35 Bafosobakpatɛ dilɔbawɛ kakɔkaakɔ batoso bafe,

babɔkɛɛ kanyabayilatɛ dilɔbawɛ lɛba kuninwii batoso basifi.

36 Nu bafosobakpatɛ kaku owi,

babɔkɛɛ kanyabayilatɛ mmuntũ,

diekye SAATE nwu nfɛ kɔwɔɔsa sɛfa kaweekɔ lɛma.

37 Babalalaasa batii ba ninsi ni di atoko ɔkyɛ ole kamɛ mantɛ

ta SAATE nwu lɛblɔfiɛ yakayaka nwu oso.

38 Abadiɛ kasiɛkɔ nɔɔ antɛ fɛle kyata,

kasɔ lɛma kafɔɔ kamakpi kante

ta nyinkatɛ kapamii nwu

ku SAATE nwu lɛblɔfiɛ yakayaka oso.