1 Nnya ɔlaa wɔ niakye SAATE nwu nfũ kuata ni Yeremia di Yuda ɔka Yosia obisuɔtɔbi Yehoiakim sɛka olebee kamɛ alɛ: 2 "Kyɛ faalalɛɛ Rekab leyo kamɛ batii, baawa di kayoee kanwii kamɛ di SAATE nwu leyo, faata ma nta banyi."

3 Nioso lakyɛ lalaakpaa Yeremia* obisuɔtɔbi Yaasania, aale ni Habasinia obisuɔtɔbi, ku babilɛma-suɔtɔbi ku babisuɔtɔbi nɔɔ bamuu- ku Rekab leyo kamɛ batii bamuu. 4 Ni lakpaa ma lawako SAATE nwu leyo, lalaakpee ma di Yikdalia obisuɔtɔbi Hanan, Yaa otii nwu babisuɔtɔbi kayoee kamɛ nɛ. Diakaako banɔɔfotii nwu kayoee ka niatika ni di Salum obisuɔtɔbi Maaseia wɔ niale ni kayoko nyuntɛ leyo osi. 5 Ninfɛ layɔ abukii ya di nta layii ni ku sipũ sewo lase di Rekab leyo kamɛ batii nwu anu, ni latɔkɔ ma nlɛ, "Binyi nta n-wo."

6 Kafɔɔ baadiki kanya alɛ, "Munnyi nta, diekye ɔwa loo Rekab obisuɔtɔbi Yonadab lakpee wo kufiofa ko mmle alɛ: ‘Aye ee banantii lee batannyi nta diidii. 7 Diidii bitantofo kafɔɔ ayo, biakpee alesaa ee bikpɛ nta awosobi kofe; diidii bitan-wɛ asaa ya mmle kuninwii lɛma, kafɔɔ dikpeni biesiɛ di akpaayo kamɛ obe biala. Ni bibasiɛ nkpa minklɛ di kasɔ ka suoto bile ni bafɔɔ.’ 8 Buɔbla di ɔlaa biala wɔ di ɔwa loo Rekab obisuɔtɔbi Yonadab lakpee wo ni kufiofa suoto. Awo ee basɔfɔ loo ee babisuɔtɔbi loo ee babisankobi loo diinyi nta diidii, 9 ee butofo ayo busiɛ kaamɛ ee bukpɛ nta awosobi afe, afe ee bukpɛ alesaa diidii. 10 Akpaayo kamɛ butoosiɛ, buɔbla kafɔɔ di ɔlaa biala wɔ di ɔwa loo Yonadab lakpee wo ni kufiofa suoto. 11 Kafɔɔ di Babel ɔka Nebukadnesar ladieko ni kasɔ ka mmle kakpɛ yi, buabuɛ bulɛ, ‘Biwa, dikpeni buotoso buodie di Babel batii ku Siria batii bakpɛtɛ nnɛɛ buosifi Yerusalem.’ Nioso butɔɔka busi di Yerusalem nɛ."

12 Ninfɛ di SAATE nwu ɔlaa lawa kuata Yeremia alɛ: 13 "Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Tɔɔkyɛ faalaakaalɛ Yuda batii ku Yerusalem batii falɛ, ‘Bilootekete lɛsaa, biɛkyɔɔ kafɔɔ sɛlaa nii atoko?’ SAATE nwu niebuɛ. 14 ‘Rekab obisuɔtɔbi Yonadab lakpee batii nɔɔ kufiofa alɛ batannyi nta, beemufũ kufiofa ko mmle beeklee kafɔɔ. Diɛbadu ni di miɛ dii le mmle mannyi nta, diekye baamufũ ɔwa lɛma kufiofa nwu baaklee. Kafɔɔ ntɔɔkakatɛ lɛta ye, lekple lɛkakatɛ lɛta ye, kafɔɔ bitanu mi ɔlaa. 15 Obe kpinwu lakpee bakpɛmblatɛ nii ɔlaababuɛtɛtɛ bamuu ɔkyɛ lee baababuɛ alɛ, "Dikpeni obiala lee lekyi di amumu sisuku nɔɔ suoto, biese kafɔɔ sɛsaabla lee lɛbla; bitantikanko bayaa bamba biasumu ma. Ni bibasiɛ di kasɔ ka layɔ lata ye ni ku bawa lee." Kafɔɔ bitakyɔɔ atoko ee binu mi ɔlaa. 16 Rekab obisuɔtɔbi Yonadab banantii laklee kufiofa ko di ɔwa lɛma lakpee ma nii, kafɔɔ batii ba mmle dienu mi ɔlaa.’

17 "Nkpo oso, nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: ‘Bikyɔɔ atoko! Kamayɔ sɛlaa kpile otũ se simuu labuɛ latika ma ni di suoto n-wako di Yuda ku batii ba bamuu ninsi ni di Yerusalem. Lakakatɛ lata ma, kafɔɔ batakyɔɔ atoko; lalɛɛ ma, kafɔɔ batatuna.’ "

18 Ni di Yeremia latɔkɔ Rekab leyo kamɛ batii alɛ, "Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: ‘Biɛkyɔɔ ɔwa lee Yonadab kufiofa atoko, bietikanko kafɔɔ sɛlaa nɔɔ simuu, biɛbla kafɔɔ lɛsaa biala le aatɔkɔ ye nii.’ 19 Nkpo oso, nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: ‘Dilɔbawa diidii alɛ Rekab obisuɔtɔbi Yonadab dilaawɛ otii alɛ aabla mi ɔkpɛ.’ "