1 Nnya ɔlaa wɔ di SAATE nwu kobuɛ ni alɛ: "Soo fakyɛ Yuda ɔka lɛkayo faalaayie ɔlaa wɔ mmle lɛkya ninfa falɛ: 2 ‘Oo Yuda ɔka, afɔ wɔ ninsi ni di Dawid lɛkakpomii suoto- afɔ, banɔɔfotii lɛfɔ ku batii lɛfɔ ba ninfe ni di kayoko ka mmle, binu SAATE nwu ɔlaa. 3 Nnya ɔlaa wɔ di SAATE nwu kobuɛ ni alɛ: Bibla lɛsaa le niesiko ni ku nle ninlɛ ni. Bifũ otii wɔ beeyu ni bikyeko nyinkatɛ nɔɔ nnɛɛ. Bitambla ɔfɔɔ dikpile ee amumu, kuɛbi ee kpisɔfɔ, bitan-wii otii wɔ ninankpi ni lɛpɔɔ ntɔ kaasɔ di lɛba le mmle kafɔɔ. 4 Diekye nse bielolaa bienyu biɛbla di afiofa ya mmle kanya yi, ni baka ba ninsiɛ ni di Dawid lɛkakpomii suoto kamafe di lɛba le mmle n-yoko man-wa, babasiɛ di bakeke ku bapɔnkɔ suoto, diɛkyakaa ni di banɔɔfotii lɛma ku batii lɛma. 5 SAATE nwu niebuɛ alɛ, kafɔɔ nse bieele afiofa ya mmle yi, lɛka di suoto nii nlɛ lɛkayo le mmle kamawɔɔ.’ "

6 Diekye nnya ɔlaa wɔ di SAATE nwu kobuɛ ankyeko ni Yuda ɔka lɛkayo suoto alɛ:

"Kuntɛ fate fɛle Gilead fatɛɛ,

fɛle Lebanon kobokote nsintɛɛ yi,

nwaako kamabla fɔ fante fɛle ɔfaafuu,

fɛle sekpoo se di batii diesi nii.

7 Kamakpee asaabalalaasatɛ di suoto lɛfɔ,

otii biala kamaklee akpɛsaa nɔɔ,

bababudi seda awoso biene lɛfɔ nwu

manfuki mankpee di ɔtɔ kamɛ.

8 "Batii kamakye nnle kpinwu kamɛ mamafe di okpoo kplɛ wɔ mmle ɔlɔɔkɔ mankaalɛ bawo alɛ, ‘Obe oso di SAATE nwu lɛbla okpoo kplɛ-kplɛ wɔ mmle lɛsaa le mmle okle?’ 9 Kanya didikibi nimale alɛ: ‘Ta baasĩ ni SAATE Yaa lɛma nwu kanya ninii, bɛɛlaasumu, bɛɛbla ni kafɔɔ bayaa bamba sɛkpɛ oso.’ "

10 Bitan-wi biata ɔka wɔ niekpi nii ee bisiɛ kaku bita lɛsaa le nieyu nwɔ nii;

kafɔɔ, biwi kaku osie kanya bita otii wɔ ninsi ni di sɛlanle kamɛ,

diekye ɔlɔbapɛakple awa diidii

ee akple anya katefa nɔɔ.

11 Diekye nnya ɔlaa wɔ di SAATE nwu kobuɛ ankyeko ni Yosia obisuɔtɔbi Salum* suoto, nnwɔ niale ni sɛka di ote kakpimaa fɛ Yuda ɔka, kafɔɔ atoodie ninfũ eesifi: "Ɔlɔbapɛakple awa diidii. 12 Abakpi di lɛba le baamufũ nwɔ baasifiko nii; ɔlɔbasinkple anya kasɔ ka mmle."

13 "Yɔɔsa bɔɔta otii wɔ nintofo ni lɛkayo nɔɔ ninanle ni di ɔsaabla tinini kamɛ,

osi nɔɔ ayo di onukwale ɔtanle kamɛ,

anta ni okpoo nɔɔ batii mbla ni ɔkpɛ kasakasa,

ananta ma ni kɔkpɛnto lɛma.

14 Ambuɛ alɛ, ‘Kamatofo lɛkayo kplɛ nta suoto nii

ku osi ayo ya niemuɔ nii.’

Nioso andiki basɛfle kplɛ niini,

ankpee ni seda akloo

anlolaa ni ku kɔfa sɛɛle.

15 "Ninta fɔ fanle ɔka

alɛ faawɛ seda awoso ampɔ ankple ampɔ?

Diele teefɔ ninkpe alesaa ku nta?

Aabla lɛsaa le nialɛ ni ku nle niasiɛko nii,

nioso asaa amuu lalɛ ɔkyɛ aatɔɔ.

16 Aakpɛ aata bapiitɛ ku mba diafĩ nii,

nioso asaa amuu lalɛ ɔkyɛ ɔtɔɔ.

Diele nni ninle lɛsaa le niatuo alɛ baatofo mi nɛ?"

SAATE nwu niebuɛ.

17 "Kafɔɔ anumbi lɛfɔ ku otu lɛfɔ

ntika di onukwale ɔtanle lɛsaawɛ lete suoto,

di batii ba ninankpi ni lɛpɔɔ ntɔ owii kaasɔ suoto

ku batii onyinka ku asaa ofũ osie kanya di batii nnɛɛ."

18 Nkpo oso nnya ɔlaa wɔ di SAATE nwu kobuɛ ankyeko ni Yosia obisuɔtɔbi Yehoiakim, Yuda ɔka nwu suoto alɛ:

"Blɔbawi batɔɔ alɛ:

‘Ao, obiloo-suɔtɔbi! Ao, obiloo-sankobi!’

Blɔbawi batɔɔ alɛ:

‘Ao, saate nii! Ao, dibu ɔka!’

19 Babɔkɛɛ ba nintuka ni atoo lekookaa babakookaa nwɔ-

babawududusɔɔ mansifiko manafuki nwɔ man-yu

di Yerusalem n-yoko nwu sɛmaa."

20 "Kata fakyɛ Lebanon faalaafaa,

faata banu fɔ sɛlɔ di Basan,

faa osie kanya fakyeko Moab abokote*,

diekye batɔɔwɔɔsa basɔnɔ lɛfɔ nwu bamuu.

21 Lasĩ ɔlaa lata fɔ di obe wɔ faanyu falɛ fanaa ni olè,

kafɔɔ faabuɛ falɛ, ‘Nɔmakyɔɔ fɔ atoko!’

Nkpo fate diɛyɔ ni di sekpeele lɛfɔ obe nɛ;

fankyɔɔ mi ɔlaa atoko.

22 Kɔfɛɛfɔ kamatuka bafoso bakpatɛ lɛfɔ bamuu ansifiko

basɔnɔ lɛfɔ nwu kafɔɔ kamasifi sɛlanle kamɛ.

Ni babakpee fɔ sinunsɔ, sinunsɔ kafɔɔ nkpɛ fɔ

ta asiensiesaa lɛfɔ amuu oso.

23 Afɔ wɔ ninsi ni di ‘Lebanon,’

fasi ni di sedar awoso ayo kamɛ,

fabatũni nse ninyinyi lɛwa fɔ di suoto,

dibuo fɛle lɛmɛlakatɛ wɔ nikɔkpɛ ni kolofo!

24 SAATE nwu niebuɛ alɛ, "Nwaako lɛnya nkpe ni nkpa, nse bia afɔ Yehoiakim obisuɔtɔbi Konia, Yuda ɔka, fale nsũ ɔtɛ lɛkɔnii di koletanɛɛ nii yi, kamananfi fɔ ndiki. 25 Kamayɔ fɔ nkpee di batii ba nikomiɛ alɛ balo fɔ ni nnɛɛ, mba fanyɛkɛ nii-Babel ɔka Nebukanesar ku Babel batii. 26 Kamayɔ afɔ ku yaafɔ wɔ nialofo fɔ ni nfuki n-yu di kasɔ bamba suoto, nfũ mananlofo ni kuonwii lee, nfa kafɔɔ di akyuu lee anyɔ nwu kamakpi nɛ. 27 Bilɔbasinkple biwa kasɔ ka biomiɛ bilɛ biɔpɛminkple minwa ni suoto diidii."

28 Dibukii le niebiɛ ni di osuɔtɔ wɔ mmle Konia n-le,

lɛsaa le di otii kuonwii dilomiɛ ni?

Obe oso baafuki nnwɔɔ ku babi nɔɔ man-yu,

manfuki ma mantɛ di kasɔ ka manan-ye ni suoto?

29 Ao kasɔ, kasɔ, kasɔ,

nu SAATE nwu ɔlaa!

30 Nnya ɔlaa wɔ di SAATE nwu kobuɛ ni alɛ:

"Bitɛ osuɔtɔ wɔ mmle nsũ fɛ otii wɔ ninaa ni obi,

osuɔtɔ wɔ di lɛlɛ dilɔbalɛ ni di nkpa nɔɔ osiɛ kamɛ,

diekye dilɔbalɛ dita kafutu nɔɔ obi kuonwii,

kuonwii lɛma dilɔbasiɛ di Dawid lɛkakpomii suoto

ee akple ale sɛka di Yuda kasɔ suoto."