1 Di Israel batii kɔwɛntɛ kuɛnsinle kamɛ yi, Netania obisuɔtɔbi Ismael wɔ niale ni Elisama ɔwa wɔ niakye ni baka leyo kamɛ, aale ni kafɔɔ ɔka ɔnɔɔfotii onwii lɛma, lawa Ahikam obisuɔtɔbi Gedalia nfũ ku basuɔtɔ lefosi di Mispa. Obe wɔ baasi baatoole ni alesaa ninfa yi, 2 ni di Netania obisuɔtɔbi Ismael ku basuɔtɔ lefosi ba niawɛ ni ku nnwɔɔ lataka baalo Ahikam obisuɔtɔbi Gedalia wɔ niale ni Safan ɔwa. Baalo otii wɔ di Babel ɔka ladiki alɛ ale ni abaa kanyayilatɛ ku kapamii di kasɔ nwu suoto. 3 Ismael lalo kafɔɔ Yuda batii ba bamuu niawɛ ni ku Gedalia di Mispa, diakyakaa ni di Babel bakpɛtɛ ba niawɛ ni ninfa.

4 Baalo Gedalia baaloo ni kaleesɛ, fiɛ di otii owo latofo ni yi, 5 batii afosi-anɛ lakye Sekem, Silo ku Samaria baawa, baakpaasu sikusu lɛma, baabɛbɛɛ akpeele, baakyankya kafɔɔ suoto lɛma, diato alɛ basi ni kaku, laklee alesaa asaaɔta ku olufui baawako SAATE nwu leyo. 6 Ninfɛ di Netania obisuɔtɔbi Ismael ladie di Mispa aalaakyakako ma nɛ, oofe nii, aatoowi kaku. Aakyakako ma nii, ni aatɔkɔ ma alɛ, "Biwa buosifi Ahikam obisuɔtɔbi Gedalia nfũ." 7 Di obe wɔ baabuo ni okpoo kplɛ nwu kamɛ, Netania obisuɔtɔbi Ismael ku basuɔtɔ ba niawɛ ni ku nnwɔɔ lalo ma, ni baafuki ma baakpee di ditubiɔ kamɛ nɛ. 8 Kafɔɔ basuɔtɔ lefosi di batii nwu kamɛ latɔkɔ Ismael alɛ, "Tanlo wo! Bukpe kamɔɔ ku akpaa, nnɔnyi ku bablɔ, buokookaa ni di kofe kunwii kamɛ." Nioso aadiɛ ma, ni atalo ma ku babule nɛ. 9 Ditubiɔ le kamɛ aafuki basuɔtɔ ba bamuu aalo ni ku Gedalia bakpi aakpee ni niale Ɔka Asa dibiɔ le aakutu aayɔ aasɛɛ ni Israel ɔka, Baasa osuku nɛ. Ni di Netania obisuɔtɔbi Ismael layɔ bakpi aayiisa dibiɔ nwu nɛ.

10 Ninfɛ di Ismael lamufũ batii bule ba bamuu niawɛ ni di Mispa-ɔka babisankobi ku batii bamba ba bamuu niabu ni ninfa aabla balanle nɛ. Mba di ɔka banyuntɛ kanyayilatɛ Nebusaradan ladiki ni Ahikam obisuɔtɔbi Gedalia aase ni kaanya. Netania obisuɔtɔbi Ismael lamufũ ma selanle, ni aataalɛko ma aasifiko Amon batii nfũ nɛ.

11 Kafɔɔ di obe wɔ di Karea obisuɔtɔbi Yohanan ku bakpɛtɛ banɔɔfotii ba bamuu niawɛ ni ku nnwɔɔ lanu ni akpilesaa ya amuu di Netania obisuɔtɔbi Ismael labla ni yi, 12 ni bakpaa bakpɛtɛ lɛma bamuu baakyɛ baalaakpɛko Netania obisuɔtɔbi Ismael nɛ. Baalaatũ nwɔ di lɛpanta kplɛ ɔlɔɔkɔ di Gibeon. 13 Obe wɔ di batii ba bamuu niawɛ ni ku Ismael lanya ni Karea obisuɔtɔbi Yohanan ku bakpɛtɛ banɔɔfotii ba niawɛ ni ku nnwɔɔ yi, suoto layɔɔ ma. 14 Batii ba bamuu di Ismael lamufũ ni balanle di Mispa lakple baasifi Karea obisuɔtɔbi Yohanan nfũ. 15 Kafɔɔ Netania obisuɔtɔbi Ismael ku basuɔtɔ nɔɔ banɛ lafe Yohanan, ni baatoso baasifi Amon batii nfũ nɛ.

16 Ninfɛ di Karea obisuɔtɔbi Yohanan ku bakpɛtɛ banɔɔfotii ba bamuu niawɛ ni ku nnwɔɔ lakpaa batii ba bamuu niabu baawɛ ni nkpa, mba aafũ ni di Netania obisuɔtɔbi Ismael nfũ di obe wɔ aalo ni Ahikam obisuɔtɔbi Gedalia aaloo ni sɛmaa. Ni aakpaa ma aadieko di Mispa nɛ: bakpɛtɛ, basanko, babisɔ ku kaflɔnkɔ nwu banɔɔfotii ba aakpaa akyeko ni Gibeon. 17 Ni baayefe osuku, baalaayila di Gart Kimham di Betlehem ɔlɔɔkɔ di osuku boofe ni Egipte 18 alɛ baatoso ni Babel batii. Baatɔɔyɛkɛ ma diekye Netania obisuɔtɔbi Ismael lalo Ahikam obisuɔtɔbi wɔ di Babel ɔka ladiki ni fɛ abaa kanyayilatɛ di kasɔ nwu suoto.