1 Nnya ɔlaa wɔ di SAATE nwu kobuɛ ni alɛ: "Tɔɔkyɛ faalaaya kɔtɛ dibukii di dibukiiblatɛ ɔkyɛ. Kpaa batii nwu banɔɔfo bawo ku olebatatɛ bawo fakyakaa di suoto, 2 faadie fatɔɔkyɛ Ben Hinom Ɔtaata, ninkaako ni Dibukii-kakyɛɛ Kayoko kanya. Yie lɛkya di sɛlaa se lɛtɔkɔ fɔ ni ninfa, 3 faabuɛ falɛ, ‘Oo Yuda baka ku Yerusalem batii, binu SAATE nwu ɔlaa. Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Bikyɔɔ atoko! Kamata ɔlaa kpile n-wa di lɛba le mmle suoto ninta alɛ ɔfɔɔ nsifi obiala kotoko ko nimanu nwu nii. 4 Diekye batoosĩ mi ni batɔɔyɔ lɛba le mmle bɛɛbla bafɔɔ bayaa kasiɛkɔ nɛ; batoofiɛ seleɔta ninwu kamɛ bɛɛta bayaa ba di mma ee bate lɛma ee Yuda baka ditatofo ni diidii, ni bɛɛyɔ batii ba ninankpi ni lɛpɔɔ ntɔ beeyiisa lɛba le mmle nɛ. 5 Beetofo aba takale bɛɛta Baal alɛ baafiɛ babi lɛma di ɔtɔ kamɛ fɛ asaaɔta manta Baal- lɛsaa le nintata ni osuku ee mbuɛ nii, ee dibuo ni di disi nii kamɛ. 6 Nioso bilolaa binyu, obe nfɛ kɔwa, di batii dilɔbasinlɛɛ ni lɛba le mmle alɛ Tofet ee Ben Hinom Ɔtaata, kafɔɔ batii Kalokɔ Ɔtaata, SAATE nwu niebuɛ.

7 " ‘Di lɛba le mmle kamata Yuda ku Yerusalem disibu nlalaa nɛ. Kamata ma man-nɔɔ di kapamii kanya di balo lɛma anu, di batii ba ninkomiɛ ni nkpa lɛma dikpile nnɛɛ, kamayɔ bakpi lɛma nta bakansiɛ di kɔfɛɛfɔ ku babɔkɛɛ di lepoo kamɛ di kasɔ suoto fɛ alesaa. 8 Kamakpɔkpɔtɔsa okpoo kplɛ wɔ mmle, mbla nwu kafɔɔ lɛmansaa; dibabla mba bamuu ninwaalɛ manfe ni ninfa ɔkpɛ, mantũkunsa asi, ta nkɔ ninwu mmuu oso. 9 Kamata ma man-wee babisuɔtɔbi lɛma ku babisankobi lɛma sina, babawee kafɔɔ bawo lɛma sina, ta nimiina le di balo lɛma ba ninkomiɛ ni nkpa lɛma dikpile kamatika ma ni di suoto oso.’

10 "Ni biɛ dibukii nwu di obe wɔ di minko mba niɛkyɛ ni ku afɔ konyu ni, 11 faatɔkɔ ma falɛ, ‘Nnya ɔlaa wɔ di SAATE wɔ Ninlenke ni kobuɛ ni alɛ: Kamabiɛ kale ka mmle ku okpoo kplɛ wɔ mmle fɛ mmle di dibukiiblatɛ wɔ mmle dibukii lebiɛ nii, ninɔmasinlɛ ni kafɔɔ ololaa. Babakookaa bakpi di Tofet ninanse di obe wɔ di lɛba kuninwii dilɔbasinte nii. 12 Nle mmle ninle lɛsaa le kamabla ni lɛba le mmle ku mba ninsi ni di lɛba le mmle nɛ, SAATE nwu niebuɛ. Kamabla okpoo kplɛ wɔ mmle fɛle Tofet. 13 Babakpɔnɔfɔsa ayo ya nin-yɛ ni di Yerusalem ku Yuda baka ale fɛle lɛba le mmle, Tofet- ayo ya amuu di nfũ manfiɛ ni olufui di akyà osi manta ni osi asaa amuu mankpete ni kafɔɔ nta asaaɔta kaasɔ manta ni bayaa bamba.’ "

14 Ninfɛ di Yeremia lakple di Tofet, di lɛba le di SAATE nwu lakpee nwɔ alɛ alaabuɛ ɔlaa atɛ ni nɛ. Ni aayila di SAATE nwu olekatakɔ kaflɔnkɔ aabuɛ aatɔkɔ batii nwu bamuu alɛ, 15 "Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: ‘Bikyɔɔ atoko! Kɔwa ɔlaa kpile otũ biala labuɛ ni di okpoo kplɛ wɔ mmle ku sekpoenyii se niɛmana nwu siekyi ni suoto ɔyɔ ɔwako ma di suoto, diekye baabla otokopĩ, batanu ni kafɔɔ ɔlaa nii.’ "