1 Ɔlaa di Moab suoto:

Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ:

"Nebo Yɔɔsa, diekye babawɔɔsa nwu.

Babakpee Kiriataim sinunsɔ, mam-mufũ nwɔ;

babakpee kawofakɔ nwu sinunsɔ, mantukusa ka mantɛ kaasɔ.

2 Blɔbasintansa Moab;

batii kamakũ kanwumbe mantɔɔ ampɛ kaasɔ di Hesbon:

‘Biwa, biɛta buta kale nwu kawa kalookɔ.’

Oo Madmen, aye kafɔɔ babata minlo kanana;

kapamii kamatikanko ye.

3 Bikyɔɔ atoko bienu kaku ka nikodie kankye ni Horoniam,

asaa ɔlalaasa kaku kplɛ ku kawɔɔ.

4 Bababibiɛ Moab;

babisɔ nɔɔ kamawi kaku.

5 Bɔɔkata manfe Luhit,

boowi kaku osie kanya bɔɔkata mankyɛ nii;

di osuku wɔ niesoo kuosifi ni Horonaim

boonu ninyinyii kaku di kawɔɔ nwu suoto.

6 Bitoso! Bitoso biefũ nkpa lee;

bibla fɛle lepoo di ɔfaafuu kamɛ.

7 Di obe wɔ bietika ni disi di sɛsaabla ku lɛsaawɛ lee suoto,

aye kafɔɔ babamufũ ye mansifiko,

Kemos kafɔɔ kamasifi sɛlanle kamɛ,

diɛkyakaa ni di olebatatɛ ku banɔɔfotii nɔɔ suoto.

8 Asaawɔɔsatɛ nwu kamataka di okpoo biala suoto,

okpoo kuonwii batii kafɔɔ dilɔbatoso.

Babalalaasa ɔtaata nwu

manwɔɔsa kafɔɔ abokote nwu nsintɛɛ,

diekye SAATE nwu niɛkakatɛ.

9 Biyɔ mmba bikpete di Moab suoto,

diekye abalalaa ante;

sekpoo nɔɔ kamate sifukuti,

di otii kuonwii dilɔbabu aasiɛ sĩ ni kaamɛ.

10 "Lɛkpaani ditika di otii wɔ nimbla ni nkyɔkɔ di Yaa ɔkpɛ suoto!

Lɛkpaani ditika di otii wɔ ninanta kapamii nɔɔ lawii ni ntɔ kaasɔ suoto!

11 "Moab nte kloklo diɛyɔ ni di sibisɔ nɔɔ obe,

fɛle nta be beediɛ ni di dibukii nini kamɛ,

mananyɛɛnɛ mi ni di lɛkyafi ninwii kamɛ bakpete ni di lɛbamba kamɛ-

anadikyɛ ni sɛlanle kamɛ.

Nkpo oso ɔmɛnɛfɛ nɔɔ nte fɛ mmle aate nii,

ɔkɔnɔ nɔɔ kafɔɔ diekyi.

12 Kafɔɔ obe kɔwa,"

SAATE nwu niebuɛ alɛ:

"Kamakpee ni batii ba nimanyɛɛnɛ ni nta di akyafi kamɛ,

maamanyɛɛnɛ nwɔ ni kafɔɔ manwii nii;

babanyɛɛnɛ ninloo klekle di akyafi nɔɔ nwu,

mambibiɛ kafɔɔ dikuuku nɔɔ.

13 Ni sinunsɔ kamakpɛ Moab di Kemos suoto,

fɛ mmle di sinunsɔ lakpɛ ni Israel batii

di obe wɔ baatika ni disi di Betel suoto.

14 "Lɛ oso biobuɛ bilɛ, ‘Bakpɛtɛ bule,

batii ba niɛyakaya ni di kakpɛ kamɛ bule’?

15 Babawɔɔsa Moab manfũ kafɔɔ sekpoo nɔɔ;

babakpaa bakosopo biene nwaa nɔɔ manaalo,"

Ɔka wɔ leyooto ninle ni SAATE wɔ Ninlenke ni niebuɛ.

16 "Moab kasɔ ɔpɛ ntɔɔtɛɛtɛɛ;

sɛlaa kpile otũ nɔɔ kamawa wla.

17 Biwi bitɔɔ, aye ba bamuu ninsi biekyi nwɔ ni,

aye ba bamuu nin-ye mmle eefũ ni leyooto;

bibuɛ bilɛ, ‘Lɛ nfɛ di kayofo nɔɔ siene nwu lefee,

lɛ nfɛ di ɔkyɛnwoso biene nɔɔ lefee!’

18 "Ao Dibon Okpeele kamɛ basiɛtɛ,

soo di dibu kasiɛkɔ lɛfɔ faawa

fabasiɛ di kasɔ fukuti,

diekye nnwɔ ninwɔɔsa ni Moab

kamataka fɔ di suoto

anwɔɔsa kafɔɔ sekpoo kplɛ lɛfɔ siene nwu.

19 Yila di osuku kotoko faanyu,

afɔ wɔ ninsi ni di Aroer.

Kaalɛ osuɔtɔ wɔ nikotoso ni ku osanko nwu nikokusa ni,

kaalɛ ma falɛ, ‘Obe niɛwa?’

20 Batookpee Moab sinunsɔ, diekye batoobibiɛ nwɔ.

Biwi kaku, biɛfafaa!

Biyie lɛkya di Arnon

bilɛ batɔɔwɔɔsa Moab.

21 Lɛkanko ntɔɔwa di kobokote nsintɛɛ-

diɛta Holon, Yahsa ku Mefaat,

22 diɛta Dibon, Nebo ku Bet-Diblataim,

23 diɛta Kiriataim, Bet-Damul ku Bet-Meon,

24 diɛta Keriot ku Bosra-

diɛta Moab sekpoo simuu, nse niekyo ni ku n-se niɛtɛɛtɛɛ nii.

25 Batoobudi Moab lɛkyà beeyu;

beefee nwɔ kɔnɛɛ,"

SAATE nwu niebuɛ.

26 Bitɔɔ asiɛ nta,

diekye atɔɔkpɔnɔfɔsa SAATE nwu.

Bita Moab apɛamunu di alaa nɔɔ kamɛ;

bitɔɔ ale lɛmansaa.

27 Diele Israel niale ye lɛmansaa?

Bayu kamɛ baamufũ nwɔ

oso fantukũnsa disi lɛfɔ di ditufa kanya di

obe lele fɔɔkakatɛ di suoto nɔɔ?

28 Diɛ okpoo lɛfɔ fatɛ faalaasiɛ di afuɔnkpaa kamɛ,

afɔ wɔ ninsi ni di Moab.

Te fɛle ablonima ya nimbla ni leyo nɔɔ

di ofuɔntuu kanya.

29 "Butoonu Moab lɛkanta nwu-

suoto katoo ɔtakatɛ ku suoto otuo leyii nwɔ kamɛ pɔ,

lɛkanta ku suoto katoo ɔtakatɛ nɔɔ

ku otu nɔɔ kamɛ suoto otuo nwu.

30 N-ye lɛsaatambu nɔɔ nwu kafɔɔ kakyɔnkyɔ dile,"

SAATE nwu niebuɛ,

"lɛkanta nɔɔ nwu kafɔɔ diɛbla lɛsalɛsaa.

31 Nkpo oso kowi kaku nta Moab,

kowi nta Moab omuu,

kowi sɛnyaami nta Kir-Heres basuɔtɔ.

32 Kowi nta fɔ, fɛ mmle di Yaser n-wi nii,

Ao Sibma awosobi awoso.

Sɛla lɛfɔ lefukuti siɛlaadu bia lekpo;

siɛlaadu bia Yaser lekpo.

Asaalalaasatɛ nwu ntɔɔnɔɔ

eetika di awosobi sɛɛle ku awosobi lɛfɔ suoto.

33 Suoto lɛyɔɔ ku lɛpɔ́ nsinnaa

di kɔba ku Moab afe.

Ntɔɔta nta lebudi di nta n-wankɔ;

kuonwii dilosin-wa nta ku suoto lɛyɔɔ kudú.

Kuntɛ kudú nkpe yi,

diele suoto lɛyɔɔ kudú kule.

34 "Kaku lɛma owi kudú kodie

kunkye Hesbon kun-wa Eleale ku Yahas,

kunkye Soar kunaadu bia Horonaim ku Eglat-Selisiya,

diekye bia Nimrim sekle ntɔɔsɔɔ.

35 Kamata kunloo Moab

di mba ninta ni asaaɔta di ntakalekɔ

manfiɛ ni kafɔɔ olufui manta ni bayaa lɛma,"

SAATE nwu niebuɛ.

36 "Nioso otu nii n-wi sɛnyaami kunta Moab fɛle kakyukyoe;

kuowi sɛnyaami fɛle kakyukyoe kunta Kir-Hareset batii.

Lɛsaawɛ le baawɛ ni nsinnaa.

37 Bɛɛkpaasu disi biala

beenwiɛ kafɔɔ okusu biala;

bɛɛkyankya kɔnɛɛ biala

beenyukunsa ɔtɔ̀ biala kafɔɔ leboko.

38 Di leyo lɛkyà biala osi di Moab

ku okpoo akpaka yi,

lɛsalɛsaa kuninwii nnaa dilenkee kaku owi,

diekye ntoobibiɛ Moab

fɛle dibukii le di otii kuonwii diloomiɛ nii,"

SAATE nwu niebuɛ.

39 "Nyu mmle atoobibiɛ nwɔ ni! Mmle boowi ni kaku!

Nyu mmle di Moab lemunikĩisa ni kamaa nɔɔ ku sinunsɔ!

Moab ntookple lɛmansaa,

eekple ni lɛyɛkɛsaa ɛɛta ni batii ba ninsi beekyi nwɔ ni."

40 Nnya ɔlaa wɔ di SAATE nwu kobuɛ ni alɛ:

"Nyu lo! Klikpo onwii kosoo an-wa kasɔ,

oofukuti afoko nɔɔ antĩi Moab.

41 Babamufũ Keriot mansifiko

manfũ kafɔɔ nwofakɔ nɔɔ.

Di dii nwu nkpo kale Moab bakpɛtɛ situ

kamate fɛle osanko wɔ di kolofo konu ni otu.

42 Babawɔɔsa Moab fɛ kale,

diekye aakpɔnɔfɔsa SAATE nwu.

43 Ao Moab batii,

difu, dibiɔ ku dikyĩ nte ata fɔ,"

SAATE nwu niebuɛ.

44 "Otii lele nimatoso difu,

kamakpa ambuo di dibiɔ kamɛ,

otii lele niɛkata eedie di dibiɔ nwu kamɛ yi,

dikyĩ kamamufũ nwɔ;

diekye kamayɔ Moab

lɛlɛɛ nɔɔ letokonanfi n-wako nwɔ di suoto,"

SAATE nwu niebuɛ.

45 "Batii ba nietoso ni kakpɛ banaa ni lɛkyakaako

nsi di Hesbon kunyii kamɛ,

diekye ɔtɔ ntoodie kuokye Hesbon,

ɔtɔ wɔ niekye ni Sihon kamɛ;

kunfiɛ Moab amɛ ku abokote,

bakantatɛ ba ninyiisa ni kudú disi akufi.

46 Ao afɔ Moab, yɔɔsa!

Batɔɔwɔɔsa Kemos batii;

batɔɔkpaa babisuɔtɔbi lɛfɔ beesifiko sɛlanle kamɛ

beemufũ kafɔɔ babisankobi lɛfɔ beesifiko.

47 "Kafɔɔ kamakplesa Moab lɛlɛ ntɔɔ

di ayi ya nikɔwa ni kamɛ,"

SAATE nwu niebuɛ.

Nfũ di Moab lɛkanko lese nɛ.