1 Nnya ɔlaa wɔ niakye SAATE nwu nfũ kuata ni Yeremia: 2 "Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: ‘Kpana sɛlaa se simuu ntoobuɛ lɛtɔkɔ fɔ ni fakpee di kukũ kamɛ. 3 Obe kɔwa,’ SAATE nwu niebuɛ, ‘Kamakpaa batii nii Israel ku Yuda nkyeko ni sɛlanle kamɛ n-wako ni, nin-se ma ni kafɔɔ lese di kasɔ ka lata ni bawa lɛma nlɛ bayɔ nii,’ SAATE nwu niebuɛ."

4 Nnya sɛlaa se di SAATE nwu labuɛ aakyeko ni Israel ku Yuda suoto: 5 "Nnya ɔlaa wɔ di SAATE nwu kobuɛ ni alɛ:

" ‘Buonu lɛyɛkɛ kudú-

ku difu, diele atoko ɔkyɛ ole.

6 Bikaalɛ bienyu:

Osuɔtɔ kamafuo ɔkɔɔsĩ anlofo babi?

Ni obe oso kɔnya osuɔtɔ sientɛ biala

lɛyɔ nnɛɛ nɔɔ eetika di kafutu nɔɔ fɛle osanko wɔ di lɛmɛ konu ni,

di anu biala lepu ni fututu?

7 Obeeye! Dii nwu nkpe difu lo!

Dii kuninwii dilɔbate fɛle nni.

Dibuo obe dibale ninta Yakob,

kafɔɔ babadiki nwɔ ninni kamɛ.

8 " ‘Di dii nwu nkpo suoto yi,’ SAATE wɔ Ninlenke ni niebuɛ,

‘Kamafee simu owoso nwu ndiki di simu lɛma

nimbubudi kafɔɔ sikũ lɛma;

bafɔɔ dilɔbasin-yɔ ma babla balanle.

9 Kafɔɔ, babasumu SAATE Yaa lɛma nwu

ku ɔka lɛma Dawid,

nnwɔ kamadiki nta ma nii.

10 " ‘Nioso tanyɛkɛ, Ao kpɛmblatɛ nii Yakob;

Ao Israel, tanta nnɛɛ lafee fɔ,’

SAATE nwu niebuɛ.

‘Nwaako kamadiki fɔ nkyeko lɛba kyonle,

ndiki banantii lɛfɔ kafɔɔ nkyeko sɛlanle lɛma kasɔ nwu.

Yakob kamakple an-wɛ atoko ɔkyɛ ole, andiki atoko ansiɛ,

kuonwii kafɔɔ dilɔbakpee nwɔ lɛyɛkɛ.

11 Nsiko fɔ, kamadiki fɔ kafɔɔ,’

SAATE nwu niebuɛ.

‘Kuntɛ lawɔɔsa nnle be mmuu

lasamiisa ye lakpee ni klekle yi,

namawɔɔsa fɔ klekle.

Kamananfi fɔ kootoko, kafɔɔ di osuku kanya lete;

namata fɔ fasifi alɛ ninanfi fɔ kootoko saa.’

12 "Nnya ɔlaa wɔ di SAATE nwu kobuɛ ni alɛ:

" ‘Kakɔ lɛfɔ nwu ninkpi,

kakɔ ka ninankpi ni feefũ.

13 Kuonwii nnaa ababuɛ ɔlaa lɛfɔ anta fɔ nii,

kɔfa nnaa kuɔta ni kakɔ lɛfɔ nwu,

difiɛyɔɔ nnaa diɛta fɔ.

14 Babɔmbɔtɛ lɛfɔ bamuu ntooyee fɔ;

baayɔ nwu ole kuonwii di suoto lɛfɔ.

ntoodieko fɔ fɛ mmle di lo mbla nii,

lananfi fɔ kafɔɔ kootoko fɛ mmle di amumublatɛ mbla ni,

diekye lɛpɔɔ lɛfɔ okpi lɛtɛ dipɔ,

sikpile lɛfɔ kafɔɔ lɛtɛ sipɔ kpinwu.

15 Obe oso foowi di kakɔ lɛfɔ nwu suoto,

di dibuo lɛfɔ le ninaa ni difiɛyɔɔ suoto?

Ta lɛpɔɔ lɛfɔ okpi lemuɔ ni, di sikpile lɛfɔ kafɔɔ mpɔ ni oso

lɛbla fɔ asaa ya mmle nɛ.

16 " ‘Kafɔɔ bababɛbɛɛ batii ba bamuu niabɛbɛɛ fɔ nii;

balo lɛfɔ bamuu kamasifi sɛlanle kamɛ.

Batii ba niafũ fɔ ni kakpɛ kamɛ asaa yi, babafũ mma a-le;

batii ba bamuu niafũ fɔ ni asaa yi, babafũ mma kafɔɔ a-le.

17 Kafɔɔ kamayɔɔsa fɔ ofiɛ

ninta nkɔ lɛfɔ nkpi,’

SAATE nwu niebuɛ alɛ,

‘Diekye bɔɔlɛɛ fɔ alɛ otii wɔ beetososa nii,

Sion wɔ di kuonwii diɛyɔ nwu ni ole di suoto.’

18 "Nnya ɔlaa wɔ di SAATE nwu kobuɛ ni alɛ:

" ‘Kamakple n-se Yakob leyo lɛlɛ ɔyɔ ɔtɔɔ,

n-nya kafɔɔ nsiɛkɔ nɔɔ nyaami;

babase okpoo kplɛ nwu dibudi di kawɔɔkɔ nɔɔ suoto,

lɛkayo nwu kafɔɔ kamayila di kayilakɔ biene nini suoto.

19 Sɛfa ɔpɛ sinu kamakye ɔkyɛ lɛma sinwa

ku suoto lɛyɔɔ sɛlɔ.

Kamata ma mampɔ̀ mankyakaa di lɛpɔ̀ lɛma suoto,

blɔbaklɔklɔɛ kafɔɔ;

kamata ma dibu,

blɔbatɛ ma kaasɔ kafɔɔ.

20 Babi kamate fɛ mmle baate ni di saa obe kamɛ,

okpoo lɛma kamayila kpinkpĩ di anu nii;

Kamananfi batii ba bamuu ninyinka ma ni kootoko.

21 Tunletɛ lɛma kamale mma bamu onwii lɛma;

ɔka lɛma kamataka ankye kamɛ lɛma.

Kamata antɛɛtɛɛ mi, nnwɔɔ kafɔɔ abakpukuti an-wa mi ɔkyɛ.

Diekye owe ninle nnwɔ nimayɔ suoto nɔɔ anta

alɛ ɔɔtɛɛtɛɛ mi ni?’

SAATE nwu niebuɛ.

22 " ‘Nioso bibale batii nii,

ami kafɔɔ kamale Yaa lee.’ "

23 Nyu lo, SAATE nwu afɛɛfɔ

kamakpɛ di ɔblɔ yakayaka kamɛ,

kakitikɔ kɔkpɛ kansoo

di bakpiletɛ asintɛɛ.

24 SAATE nwu lɛblɔfiɛ yakayaka dilɔbakple sɛmaa

ninaase di obe wɔ eeloo ni

otu nɔɔ dibiesaa ɔbla.

Bibanu nle mmle kasɔ

di ayi ya nikɔwa ni kamɛ.