Yeremia 37

Sedekia Lakaalɛ Lɛkyakaako Aakyeko Yeremia Nfũ

1 Babel ɔka Nebukadnesar layɔ Yosia obisuɔtɔbi Sedekia aase Yuda ɔka; aale sɛka di Yehoiakim obisuɔtɔbi Konia kanya. 2 Nnwɔɔ ee bakpɛmblatɛ nɔɔ ee kasɔ nwu batii kuonwii lɛma ditakyɔɔ sɛlaa se di SAATE nwu labuɛ aafenko ni di ɔlaabuɛtɛtɛ Yeremia suoto.

3 Kafɔɔ, ɔka Sedekia, lakpee Selemia obisuɔtɔbi Yehukal ku Maaseia obisuɔtɔbi oletatɛ Sefania alɛ bakyɛ ɔlaabuɛtɛtɛ Yeremia nfũ ku ɔlaa wɔ mmle alɛ: "Lekoto pɛ ɔlaa fata SAATE Yaa loo nwu fata wo."

4 Yeremia nfɛ lawɛ osuku aakyɛ, aatookple di batii nwu kamɛ, diekye di obe nwu kamɛ baditɛ nwɔ di leyo katenkɔ. 5 Farao bakpɛtɛ ladie di Egipte, ni di Babel batii ba niamana Yerusalem baakyi ni lanu ni lɛkpanko lɛma, ni baatoso baadie di Yerusalem nɛ.

6 Ninfɛ di SAATE nwu ɔlaa lawa kuata ɔlaabuɛtɛtɛYeremia alɛ: 7 "Nnya ɔlaa wɔ di SAATE nwu, Israel Yaa kobuɛ ni alɛ: Tɔkɔ Yuda ɔka, nnwɔ niekpee fɔ alɛ bawolaa ni asaa kamɛ di ɔkyɛ nii falɛ, ‘Farao bakpɛtɛ ba niedie bɛɛwa alɛ bɔɔbakyakaako fɔ ni kamapɛmankple mansifi kasɔ lɛma kamu di Egipte. 8 N-se Babel batii ntɔɔpɛbeekple bɛɛbadieko okpoo kplɛ wɔ mmle; babafũ nwu, manfiɛ nwu mantɛ kaasɔ.’

9 "Nnya ɔlaa wɔ di SAATE nwu kobuɛ ni alɛ: Bitankyɔnkyɔ suoto lee, biabla disibu bilɛ, ‘Nwaako Babel batii nwu kɔwa wo ɔbadiɛ.’ Blɔbadiɛ wo! 10 Nse bia biefuo Babel batii bakpɛtɛ bamuu ba nikodieko ye ni olenkee, di batii ba niefũ ni nkɔ lete niebu di akpaayo lɛma kamɛ yi, babadie man-wa mamakpee okpoo kplɛ wɔ mmle ɔtɔ manfiɛ nwu mantɛ kaasɔ."

Baamufũ Yeremia Baatɛ Di Leyo Katenkɔ

11 Di obe wɔ di Babel batii bakpɛtɛ lapɛbaakple ni di Yerusalem sɛmaa, ta Farao bakpɛtɛ oso yi, 12 Yeremia ladie di okpoo kplɛ nwu alɛ ɔɔkyɛ Benyamin kasɔ anaafũ kalekɔ nɔɔ di batii nwu kamɛ ninfa. 13 Kafɔɔ aadu ni Benyamin Kayoko yi, banyuntɛ nwu ɔnɔɔfo wɔ leyooto niale ni Yiria, aale ni Selemia obisuɔtɔbi, aale ni kafɔɔ Hanania ɔwa lamufũ nwɔ, ni aabuɛ alɛ, "Footoso fansifi Babel batii nfũ!"

14 Ni di Yeremia labuɛ alɛ, "Kuote nkpo! Nootoso nsifi Babel batii nfũ." Kafɔɔ Yiria ditakyɔɔ nwɔ atoko; kafɔɔ, aamufũ Yeremia, ni aakpaa nwɔ aawako banɔɔfotii nwu nɛ. 15 Ɔblɔ lafiɛ ma di Yeremia suoto, ni baata baapɛ nwɔ baayɔ nwɔ baalatɛ di leyo katenkɔ di kukũ kpanatɛ Yonatan leyo le baayɔ baabla ni leyo katenkɔ nɛ.

16 Baakpee Yeremia di leyo katenkɔ di kutuɛ kunwii kamɛ, aawɛ ninfa diaklɛ. 17 Ni di Ɔka Sedekia lakpee baalaakpaa nwɔ baawako lekayo nɛ, ni aakaalɛ nwɔ di lewofa kamɛ alɛ, "Ɔlaa owo lekye SAATE nwu nfũ kuɔwa?"

Ni di Yeremia ladiki kanya alɛ, "Yii, babayɔ fɔ mankpee di Babel ɔka nnɛɛ."

18 Ninfɛ di Yeremia latɔkɔ Ɔka Sedekia alɛ, "Obe okpile lɛbla di afɔ ee banɔɔfotii lɛfɔ ee batii ba mmle suoto, oso fɛɛtɛ mi di leyo katenkɔ? 19 Ɔfɛ di ɔlaababuɛtɛtɛ lɛfɔ ba niabuɛ sɛlaa baatɛ baata fɔ ni alɛ, ‘Babel ɔka dilɔbadieko ni afɔ ee kasɔ ka mmle’ nkpe? 20 Kafɔɔ nunua yi, saate nii ɔka, lekoto kyɔɔ atoko. Tɛɛ n-yɔ ɔlaa nii ntɛ fɔ di anu: Tankplesa mi faasifiko kukũ kpanatɛ Yonatan leyo, nse diele nkpo kamakpi ninfa."

21 Ni di Ɔka Sedekia lata osuku alɛ bayɔ Yeremia balaakpee di banyuntɛ nwu leyo kaflɔnkɔ, baatɔɔtɔɔ kafɔɔ bloblo wɔ baakyeko ni bloblo bafiɛtɛ lɛkpaka, dii biala dilaase di obe wɔ di bloblo kamaloo ni di okpoo kplɛ nwu kamɛ. Nioso Yeremia lawɛ di banyuntɛ nwu leyo kaflɔnkɔ nwu kamɛ.