Yeremia 38

Baamufũ Yeremia Baakpee Di Ditubiɔ Le Di Ntu Diesi Ni Kamɛ

1 Matan obisuɔtɔbi Sefatia, Pasur obisuɔtɔbi Gedalia, Selemia obisuɔtɔbi Yukal ku Malkiya obisuɔtɔbi Pasur lanu ɔlaa wɔ di Yeremia latɔɔtɔkɔ ni batii nwu bamuu di obe wɔ aabuɛ ni alɛ, 2 "Nnya ɔlaa wɔ di SAATE nwu kobuɛ ni alɛ: ‘Otii lele niesiɛ di okpoo kplɛ wɔ mmle kamɛ kamakpi di kapamii, kɔka-ɔkpɛ ee ofiɛ kpile kanya, kafɔɔ otii lele niedie eesifi Babel batii nfũ kamasiɛ nkpa. Abatoso ku nkpa nɔɔ; abasiɛ nkpa.’ 3 Nnya ɔlaa wɔ kafɔɔ di SAATE nwu kobuɛ ni alɛ: ‘Nwaako kamayɔ okpoo kplɛ wɔ mmle nkpee di Babel ɔka bakpɛtɛ nnɛɛ, manfũ nwu.’ "

4 Ninfɛ di banɔɔfotii nwu latɔkɔ ɔka alɛ, "Dikaatɛ alɛ manlo osuɔtɔ wɔ mmle. Ofeesa bakpɛtɛ ba niebu basi ni di okpoo kplɛ wɔ mmle nnɛɛ, diɛkyakaa ni di batii nwu bamuu, di sɛlaa se ɔɔtɔkɔ ma ni kanya. Osuɔtɔ wɔ mmle diloomiɛ batii ba mmle dibiene, kafɔɔ kawɔɔ lɛma."

5 Ni di Ɔka Sedekia ladiki kanya alɛ, "Asi di nnɛɛ lee, diekye ɔka dilɔbafuo lɛsalɛsaa kuninwii ɔbla oyila ye di suoto."

6 Nioso baakpaa Yeremia baalaakpee di ɔka obisuɔtɔbi Malkiya ditubiɔ le niate ni di banyuntɛ leyo kaflɔnkɔ kamɛ. Sikũ baayɔ baasoosa Yeremia baakpee di ditubiɔ nwu kamɛ; ntu ditasiɛ di ditubiɔ nwu kamɛ, apatapata lete niasiɛ, ni di Yeremia lamɛɛ di apatapata nwu kamɛ nɛ.

7 Kafɔɔ Etiopia otii onwii, Ebed-melek, wɔ niale ni ɔnɔɔfotii di lɛkayo kamɛ lanu alɛ batɔɔyɔ Yeremia beekpee di ditubiɔ kamɛ. Di obe wɔ di ɔka nwu lasiɛ ni di Benyamin Kayoko kanya yi, 8 Ebed-melek ladie di lɛkayo aalaatɔkɔ nwɔ alɛ, 9 "Saate nii ɔka, batii ba mmle lediki kɔkpaa dikpile kanya di asaa ya amuu bɛɛbla ni di ɔlaabuɛtɛtɛ Yeremia suoto. Batoofuki nwɔ beekpee di ditubiɔ kamɛ, di lɛba le di kɔka kamalo nwɔ ankpi nii, di obe wɔ di bloblo kuonwii nsinnaa ni di okpoo kplɛ nwu kamɛ."

10 Ni di ɔka latɔkɔ Etiopia otii nwu, Ebed-melek alɛ, "Kpaa basuɔtɔ afosi-atiɛ fakyeko nfũ fakyakaa di suoto lɛfɔ biɛlaadiki ɔlaabuɛtɛtɛ Yeremia di ditubiɔ nwu kamɛ, di mmle anamakpi ni."

11 Nioso Ebed-melek lakpaa basuɔtɔ nwu aakyakaa di suoto, ni baakyɛ leyo le ninsi ni di asaakatɛ kalɔ di lɛkayo nwu kamɛ nɛ. Ni aayɔ sikpilakpi kofole ku abula bɛbɛɛle awo ninfa, ni aasoosa nya ku sikũ aata Yeremia di ditubiɔ nwu kamɛ nɛ. 12 Ninfɛ di Etiopia otii nwu, Ebed-melek latɔkɔ Yeremia alɛ, "Yɔ sikpilakpi kofole ku abula bɛbɛɛle ya mmle fakpee di sɛfankyi lɛfɔ kalɔ di sikũ nwu sisiɛ sĩ kaalɔ." Nioso Yeremia labla nkpo, 13 ni baananfi nwɔ ku sikũ nwu baatakatɛsa nwɔ baadiki di ditubiɔ nwu kamɛ nɛ. Ni di Yeremia lasiɛ di banyuntɛ nwu leyo kaflɔnkɔ nɛ.

Sedekia Latɔkɔ Yeremia Alɛ Atɔɔ Disibu

14 Ninfɛ di Ɔka Sedekia lata baakpaa ɔlaabuɛtɛtɛ Yeremia baawako SAATE nwu olekatakɔ kayoko tiɛfa nɛ. Ni di ɔka latɔkɔ Yeremia alɛ, "Kamakaalɛ fɔ lɛsaa ninwii, tan-yɔ lɛsalɛsaa kuninwii faawofasa mi."

15 Ninfɛ di Yeremia lakaalɛ Sedekia alɛ, "Nse lediki fɔ kanya, flɔbalo mi? Nse bia lɛkà fɔ yi, flɔbakyɔɔ mi atoko."

16 Kafɔɔ Ɔka Sedekia laka ntam be mmle di lewofa kamɛ aata Yeremia alɛ: "Nwaako di SAATE nwu nkpe ni nkpa, nnwɔ niɛta wo ni ninwuna, namalo fɔ ee n-yɔ fɔ nkpee di batii ba nikomiɛ alɛ balo fɔ ni nnɛɛ."

17 Ni di Yeremia latɔkɔ Sedekia alɛ, "Nnya ɔlaa wɔ di SAATE Israel Yaa wɔ Ninlenke ni kobuɛ ni alɛ: ‘Nse fɛɛyɔ suoto lɛfɔ fɛɛta Babel ɔka banɔɔfotii nwu yi, babata fɔ fansiɛ nkpa, afɔ ku leyo lɛfɔ kamɛ batii kamasiɛ nkpa; ni blɔbafiɛ kafɔɔ okpoo kplɛ wɔ mmle batɛ kaasɔ. 18 Kafɔɔ nse flɔbayɔ suoto fata Babel ɔka banɔɔfotii nwu yi, ni babayɔ okpoo kplɛ wɔ mmle mankpee di Babel batii nnɛɛ, manfiɛ nwu mantɛ kaasɔ; afɔ omu lɛfɔ flɔbatoso fadie di nnɛɛ lɛma.’ "

19 Ni di Ɔka Sedekia latɔkɔ Yeremia alɛ, "Kɔyɛkɛ Yuda batii ba nitoodie beesifi ni Babel batii nfũ, diekye Babel batii kamafuo mi ɔyɔ okpee di nnɛɛ lɛma, mambla mi amumu."

20 Ni di Yeremia ladiki kanya alɛ, "Blɔbayɔ fɔ bakpee ma ninnɛɛ, kyɔɔ SAATE nwu kotoko, faabla lɛsaa le lɛtɔkɔ fɔ ni. Ni dibalɛ ɔkyɛ ninta fɔ, manta fɔ fansiɛ nkpa. 21 Kafɔɔ nse feesĩ suoto ɔyɔ ɔta yi, nnya lɛsaa le di SAATE nwu lediki eetuo mi ni alɛ: 22 Babadiki basanko ba bamuu niebu ni di Yuda ɔka lɛkayo kamɛ manwako Babel ɔka banɔɔfotii nwu. Basanko nwu kamatɔkɔ fɔ alɛ:

" ‘Basiɛwo lɛfɔ ba feefũ feenu nii-

lakyɔnkyɔ fɔ, ni baalenkee fɔ nɛ.

Nkpaa lɛfɔ ntɔmɛɛ di apatapata kamɛ;

basiɛwo lɛfɔ ntootoso beediɛ fɔ.’

23 "Babakpaa basɔfɔ lɛfɔ ku babi lɛfɔ bamuu manwako Babel batii nfũ. Afɔ omu lɛfɔ flɔbatoso fadie di nnɛɛ lɛma, kafɔɔ Babel ɔka batii kamamufũ fɔ; manfiɛ okpoo kplɛ wɔ mmle mantɛ kaasɔ."

24 Ninfɛ di Sedekia latɔkɔ Yeremia alɛ, "Tanta otii kuonwii lanu lɛkakatɛ le mmle, nse diele nkpo fabakpi. 25 Nse banɔɔfotii nwu lenu alɛ lɛkakatɛko fɔ, bɛɛwa fɔ ɔkyɛ bɛɛbabuɛ alɛ, ‘Tɔkɔ wo ɔlaa wɔ feebuɛ fɛɛtɔkɔ ni ɔka ku ɔlaa wɔ di ɔka lebuɛ ɛɛtɔkɔ fɔ ni; tan-yɔ nwu faawofasa wo, se diele nkpo bubalo fɔ,’ 26 tɔkɔ ma falɛ, ‘Lekoto latootikiti ɔka nlɛ atankplesa mi aasifiko Yonatan leyo alɛ kaakpi ninfa.’ "

27 Ninfɛ di banɔɔfotii nwu bamuu lawa Yeremia nfũ baabakaalɛ nwɔ sɛlaa nɛ. Ni aatɔkɔ ma ɔlaa biala wɔ di ɔka latɔkɔ nwɔ alɛ abuɛ ni nɛ. Nioso batasimbuɛ ɔlaa kuonwii baatɔkɔ nwɔ, diekye otii kuonwii ditanu lɛkakatɛ nɔɔ ku ɔka.

28 Ni di Yeremia lasiɛ di banyuntɛ nwu leyo kaflɔnkɔ dialaadu di dii le baafũ ni Yerusalem nɛ.